AK SÖZEN
Halypa pedagog Hojamguly Rejebowa.
Sypaýar tellerňi sähra şemaly,
Ak sözenim, päk sözenim, täk sözen!
Alyslardan ülpüldeýän şem ýaly,
Ak sözenim, päk sözenim, täk sözen!
Ýeller saňa derdin diýer syr etmez,
Gije ýyldyz seni ýekesiretmez,
Barybir ýalňyzlyk ýarasy bitmez,
Ak sözenim, päk sözenim, täk sözen!
Sähra asman, sen bir guş göge galkan,
Sähra umman, sen bir onda ak ýelken,
Sen sähraň kalbynyň aýdymy belkem?!
Ak sözenim, päk sözenim, täk sözen!
Bir däl, iki ýanan, syk hem berk bolan,
Ýazda ýaşyl ýaýlalara görk bolan,
Senden meňzeş agaç barmy türkmene
Ak sözenim, päk sözenim, täk sözen!
Sen görene guwanç, päklige salgy,
Gözellige nusga, saplyga selgi.
Diýýän ýaly: “Hanha, seret, Öňaldy”
Ak sözenim, päk sözenim, täk sözen!
Gurbandurdy ORAZOW
