Arzuw

ARZUW

Şeýda duýgulara erkini bermän,
Akyl öz ýerinde hereket etse,
Paýhasyň donuny ýelbegeý alyp,
Dana pikirleriň çuňlugna gitse,

Ynsanyň gül ömri reje bilen
Uzalyp giderdi geljege sary.
Ahmyrly puşmanlaň urbasy ýitip,
Joşgun saz ederdi ýüregiň tary.

Ýaýdanma bolmazdy ynsan kalbynda,
Tap bilen akardy ynsap derýasy.
Gam-gussa sokulup ýedi gat ýere,
Bolmazdy ömürleň zaýa-yrýasy.

Bir ganaty ynsap, birisi wyždan
Bagyt guşy gökde perwaz ederdi.
Ýolunda badyna garşylyk görmän,
Ynsan magsat-myradyna ýeterdi.

Şyhymyrat ABDYLLAÝEW.