Aýdym

AÝDYM

Bu aýdym kasam däl, wada-da däl bu,
Bu aýdym ömürlik ýoldaşym meniň.
Kalbymda dörände ganatly arzuw,
Synlamda başlanşyn her täze günüň,
Hiňlenýän joş alyp, guşlaň sazyndan
Hem säher çygyna ýüzümi ýuwup:
«Gitmejek bolaryn dünýäň ýüzünden,
Şu eziz topraga bergidar bolup...»

Baharda sähramyň ogşap güllerin,
Gyşda garlaryma oýkap bagrymy,
Daglaryň, çölleriň, deňiz-kölleriň
Taryp edip ýazan wagtym şygrymy,
Hiňlenýän, ýene-de özüm-özümden
Öýkeliräk galyp, närazy galyp:
«Gitmejek bolaryn dünýäň ýüzünden,
Şu eziz topraga bergidar bolup...»

Öz bütin ömrüni topraga baglan,
Hut şoňa bagş edip güýçdür kuwwatyn,
Toprak gülse, gülen, aglasa, aglan
Ak sakgally goja sataşan wagtym,
Hiňlenýän, many alyp her bir sözünden.
Hiňlenýän çal başyn ýüzüme sylyp:
«Gitmejek bolaryn dünýäň ýüzünden,
Şu eziz topraga bergidar bolup...»

Toprak üçin şirin janyn berenleň
Mazaryn gül bilen örten çaglarym,
Şu gün onuň göwsün bezäp ýörenleň
Tozlaryn gözüme sürten çaglarym,
Hiňlenýän, keşplerin saklap gözümde,
Wesýetlerin bolsa ýüregme salyp:
«Gitmejek bolaryn dünýäň ýüzünden,
Şu eziz topraga bergidar bolup...»

Hatda kyn pursatda taşlap topragyn,
Namysyn-wyždanyn çalşyp bäş şaýa,
Bu günem utanman, açyp kükregin,
Duşsam gezip ýören näkes, bihaýa,
Hiňlenýän gazaply garap yzyndan
Hem onuň deregne gyzaryp, solup:
«Gitmejek bolaryn dünýäň ýüzünden,
Şu eziz topraga bergidar bolup...»

Italmaz NURYÝEW.