AÝSYZ GIJE AÝ DOGUPDY GARŞYMDA...
Aýsyz gije Aý dogupdy garşymda,
Aý dolupdy keşbin alyp perimiñ.
Gujagymda dem alypdy ses-üýnsiz,
Gujagymda ýerleşipdi Zeminim.
Şonda men bagtlydym - kämil bagtdadym,
Duýgularym däliräpdi Jeýhun deý.
Gujagymda gobsunanda gara göz,
Serim sermest bolup, göýä meý hum deý,
Meýe dönen hyjuwlarmy şagladyp,
Barlygymy bir şo gözde jemledi.
Adyn tutdum sandyradyp sesimi,
A ol bolsa ýuwaşjadan "hüm"-ledi.
Dünýäñ ähli bagtyn alana dönüp,
Hatda, öz-özümem tanamandym men.
Bir gijede - Aý dogmadyk gijede,
Aý gözeliñ humaryndan gandym men.
Süýji düýşden soñky ýagdaý içinde
Gujagymdan sogrulanda aýñaldym.
Aýsyz gije Aý dogupdy garşymda.
...Dünýäm, hawa, şo gije sen Aý bolduñ!
Sapa HOMMADOW.
|
