Bürgüt

BÜRGÜT

Men ýaraly bürgüt, ganaty gyrlan,
Seniň gözleriňden dökülýär ganym!
Men ok degen ýolbars, ýüzüne urlan,
Oturan kürsiňe serilgi hamym.

Wagt ömrüme talaň salýar birehim,
Ýoldaşym gam-gussa, dilberim elem.
Ýene-de gapyňa maňlaý diredim,
Saman deý saralan ýyllarym bilen.

Indem ýalyn bilen edýärin oýun —
Şygyrda şazada, yşkda guldur men.
Seniň heseriňe egýärin boýun,
Yşk janym almasa, ajal öldürmez.

Är ömrüne hasrat içre ýugrulan,
Boýna asyp ýörin gyltyzlary men.
Gündizler pyrlanýan Günüň ugruna,
Gije ýakyp goýdum ýyldyzlary men.

Huzuryňa geldim, bolup gutlajak,
Uludyr söýgimiň biçak gerimi.
…Indem çöpläp ýörün seýik tutmajak
döwülen göwnümiň gyýçaklaryny.

Men ýaraly bürgüt...

Ysmaýyl TAGAN.