00:26

Dostlar..

Gudrat birle Hakdan bizge perman boldy,
Düýpsüz deňiz içre ýalňyz düşdüm, dostlar.
Ogan Izim ol deňizge perman kyldy,
Byhamdulla, suhty-telim geçdim, dostlar.

Ýaşym ýetdi, ruhum gitdi, göge uçdum.
Bahre daşdy, nebsim gaçdy, ýere düşdüm,
Nebsi şeýtan heýli birle köp uruşdym,
Sabru-ryza makamyna aşdym, dostlar.

Dokuzymda dükan düzdüm, tokunmadym,
On ýaşymda oň ýol tapdym, gaýrylmadym,
Onbirimde öz nebsime zabyt boldum,
Pakru-pena makamyna aşdym, dostlar. 

On ikimde barça erwah kelam kyldy,
Hüýrler garşy gelip maňa salam kyldy,
Syr şerbetin saky bolup, maňa sundy,
Edep birle ondan alyp, içdim, dostlar.

On üçümde guwwas bolup derýa çümdüm,
Magrypetiň göwherlerniň syryn tirdim,
Şemin görüp, perwana dek özüm urdum,
Bihuş bolup, aklym ýitdi, çaşdym, dostlar.

On dördümde toprak sypat, harlyk dartdym,
«Hüw-hüw» diýu başym birle tünler gatdym,
Müň altynlyk gyýmatyny bire satdym,
Ondan soňra ganat tokup, uçdum, dostlar.

Onbäşimde dergähiňe ýa:nyp geldim,
Ýazyk bile her iş kyldym, hata kyldym.
Toba kylyp Haka boýun sunup geldim,
Toba kylyp, ýazyklardan gaçdym, dostlar.

Jebraýyl wahyý getirdi Hak Resulga,
Aýat geldi: «Zikr eýlegil, juzwe-küllge»,
Hydyr babam saldy meni işbu ýolga,
Ondan soňra derýa bolup daşdym, dostlar.

Şerigatyň bossanynda jöwlan kyldym,
Tarykatyň gülzarynda seýran kyldym,
Hakykatdan ganat tokup, taýran kyldym,
Magrypetiň işigini açdym, dostlar.

«El est»  hamryn piri-mugan doýa berdi,
Içiberdim, mukdarymça guýyberdi,
Gul Hoja Ahmet, içim-daşym köýüberdi,
Talyplara dürri-göwher saçdym, dostlar.

 23 

Yşk syryny beýan kylsam aşyklara,
Takat kylmaý, başyn alyp gider, dostlar.
Daga-daşa başyn urup, bihut bolup,
Ähiliýal, hany-mandan öter, dostlar.

Yşk şitdeti başa düşse aşyk ýyglar,
Bigäneler daşlar atyp, ony kowlar,
Diwana diýip, başyn ýaryp, gana bular,
Şäkir bolup, hamdu-sena aýdar, dostlar.

Yşksyzlaryň hem jany ýok, hem imany,
Resulalla sözün aýdym, magny-käni,
Niçe aýtsam eşitgiji dana kany?!
Bihabara aýtsam köňli gatar, dostlar.

Yşk göwheri düýpsüz derýa içre pynhan,
Jandan geçip göwher alan boldy janan,
Bulhöwesler aşyk men diýip, ýolda galan, 
Dinlerini püçek pula satar, dostlar.

Aşyk bolsaň tün ukyny kylgyl haram,
Gije-gündiz Haky istäp, ýygla mydam,
Ondan soňra Hakdan gelgeý saňa peýam, 
Has gullary Hak nuruna batar, dostlar.

Oda köýdüm, jandan doýdum, haýran boldum,
Bu niçik ot, köýmeý-ýanmaý bürýan boldum,
Muhabbetiň adyn eşdip, girýan boldum,
Gözi girýan myradyna ýeter, dostlar.

Zar eňräban gan ýyglagyl, rehmi gelsin,
Ýoldan azsaň rehm eýläban ýola salsyn,
«Ämin» diýgin, piri-mugan goluň alsyn,
Hyzmat kylan ahyr myrat tapar, dostlar.

Zamana ahyry bolsa huýyň gitdi,
Resulalla wadalary ýawuk ýetdi,
Has gullary ýagşy söze gulak tutdy,
Ýaman gullar günden-güne beter, dostlar.

«Külli ýowmun beterün»  diýdi, Hak Mustapa,
Ymmat bolsaň, gulak salgyl ähli-wepa,
Ýagşylaryň ejrin berer, betge jepa,
Kyýamat gün jezalaryn dartar, dostlar.

Pysky-pujur howa kylyp ýerni basmas,
Ruza-namaz kaza kylyp, miswak asmas,
Resulalla sünnetlerin gözge almas,
Günäleri günden-güne artar, dostlar.

Dünýedarlar malyn görüp, howa kylar,
Men-menlikden ol dagwyýe-Huda kylar,
Öler wagtda imanyndan jyda galar,
Jan bererde ýyglaý-ýyglaý ýatar, dostlar.

Kamug dünýä ýykanlary walla, gördüm, 
Jan bererde: «Niçik sen?» diýp, halyn sordum,
Şeýtan aýdy: «Imanyňa çeňgal urdum»,
Öler wagtda hasrat bile gider, dostlar.

Gul Hoja Ahmet, aşyk bolsaň, janyň köýsün,
Sydkyň birle Alla diýgil, Taňry söýsün,
Doga kylgyl, mömin gullar dünýä goýsun,
Dünýä goýan ahyrýetin tapar, dostlar. 

 24 

Ýaradan, Biribarym ýolun yzlap,
Şeýtan-lagyn ýollaryndan gaýdyň, dostlar.
Yhlas birle muhabbetiň jamyn alyp,
Jan-u dilden Hak zikrini ediň, dostlar.

«Hüw» zikrini aýdyp içgen jamy-şerap,
Ýol üstünde eziz başy misli turap,
Alla üçin haly harap, bagry kebap,
Jan-u dilden Hak zikrini ediň, dostlar.

Astanaga başyň goýup zary kylgyl,
Halka gurup, kim zikr etse ýary bergil,
Zikrin edip, halka içre dürler tirgil,
Jan-u dilden Hak zikrini ediň, dostlar.

Alla diýen, gand-u-asal peýda kyldy,
Jany-dilin Hak ýolunda şeýda kyldy,
Munda mähnet, onda rahat garşy geldi,
Jan-u dilden Hak zikrini ediň, dostlar.

Amal kylmaý, alym ylmyn basyp ýörgeý,
Taňla barsa, dar lahatda jany köýgeý,
Alla Resul: «Diniň kim?» diýp, haýbat kylgaý,
Jan-u dilden Hak zikrini ediň, dostlar.

Müňkür-Nekir «Men rebbik» diýp, sowal kylgaý,
Kal ylmyndan bir nuktesi kär kylmagaý,
Wa hasrat-a, amalsyzlar niçik kylgaý,
Jan-u dilden Hak zikrini ediň, dostlar.

Kalyň-çyrag, halyň-pelte, ýagy-ýaşyň,
Niçe aýtsam, bähre almas içu-daşyň,
Ýol üstünde toprak bolsun eziz başyň,
Jan-u dilden Hak zikrini ediň, dostlar.

Zahyr bitip, batyn düzüp, alym bolsaň,
Ruzy-magşar goluň tutar, taňla barsaň,
Wa-weýleta, nedamat ýip ýolda galsaň,
Jan-u dilde Hak zikrini ediň, dostlar. 

Essiz alym amal kylmaý ýolda galar,
Okap-okmaý düne malyn golga alar,
Men-menlikde essiz ömrün zaýyg kylar,
Jan-u dilden Hak zikrini ediň, dostlar.

Alym ol kim, jandan geçip ýola girse,
Dünýä goýup, ahretniň gamyn iýse,
Hakdan gorkup, şamu-säher «Rebbim» diýse,
Jan-u dilden Hak zikrini ediň, dostlar.

Ondag alym iki gözi girýan bolar,
Hak ýolunda bagry köýüp, bürýan bolar,
Gurhan okap, Hakdan gorkup, nalan bolar,
Jan-u dilden Hak zikrini ediň, dostlar.

Pany kylgyl şum nebsiňi, pana gitsin, 
Gyna nebsiň, bu dünýäden ýyglap gitsin,
Toprak bolgul, älem halky basyp ötsün, 
Jan-u dilden Hak zikrini ediň dostlar. 

Harlyk dartyp Hak Mustapa ymmat diýdi,
Asy-japy ymmatlarnyň gamyn iýdi,
Onuň üçin ymmatlary kuwwat aldy,
Jan-u dilden Hak zikrini ediň, dostlar.

Ymmat üçin bagrynda ýok zerre bütin,
Ymmat diýse damagyndan çykar tütün,
Hak Mustapa kylgaýmykan bizni ötün,
Jan-u dilden Hak zikrini ediň, dostlar.

Gul Hoja Ahmet, alaý diýseň Hakdan ülüş, 
Baýezit dek nebsiň bile tün-gün uruş,
Eý bihabar, ymmat erseň budur röwüş,
Jan-u dilden Hak zikrini ediň, dostlar.

 25 
                            
Kaýu mahluk Halygyna mutug bolsa,
Älem halky oşol gulny söýer, dostlar.
Ýadyn aýdyp, bagry bişip, içi köýse,
Dem urarda, sansyz uçgun uçar, dostlar.

Dili, köňli, sydky birle zäkir bolup,
Üç ýüz altmyş damarlary nura dolup,
Ýazydaky bilbil guş dek wala bolup,
Saýra kylyp, şahdan-şaha gonar, dostlar.

Bul köňülniň bossanydyr ajap bossan,
Içinde saýraşar bilbil hezar dessan,
Tün-gijeler bir şah üzre dürli elwan,
Nygmatlarnyň bişenini görer, dostlar.

Zahyrdaky kyýas birle aýdyp bolmas, 
Zahyr gözni tutmuş gaflat, bakyp bolmas,
Batyn nygmat şükürini gapyl kylmas,
Batyn gözi ir açylsa, görer, dostlar.

Batyn gözi ir açylsa galmas perde,
Janyň gözi girýan bolar oşol ýerde,
Ruhy munda, teni baryp gara ýerde, 
Iman nury birle bakyp, görer, dostlar.

Gul Hoja Ahmet Ýasawynyň işbu sözi,
Ajap ermes, bakyp görer syrny gözi,
Penafille makamynda öznüň-özi,
Penalyk içire bakyp, görer, dostlar.

 26 
                
Muhabbetiň şerabyndan dadyrmasa,
Jan-u köňlüm hasrat birle gider, dostlar,
Alla ýadyn wird eýlemeý ölüp gitsem,
Essiz ömrüm hasrat birle öter, dostlar.

Alla diýen aşyklary Byrak mündi,
Magşugyndan jepa degse boýun sundy,
Tarykatyň bazarynda jöwlan kyldy,
Hakykatyň derýasyndan öter, dostlar.

Hakykatyň göwherinden alan kişi,
Özi muňlug, köňli synyk, gözde ýaşy,
Harlyk-zarlyk, muşakgatlar daýym işi,
Bu dünýäni püçek pula satar, dostlar.

Hakykatly çyn aşyklar köňli ölük,
Üç ýüz altmyş, dört ýüz kyrk dört — erer sülük, 
Sözi zerrin, hulky-huşy ýüz-müň dürlük,
Didaryny talap kylan tapar, dostlar.

Aryp-aşyk bolaý diýseň, elem dartgyl, 
Didaryny talap kylsaň, tünler gatgyl, 
Bu dünýäniň eşretlerin taşlap ötgül, 
Taşlap ötseň maýu-menlik gider, dostlar.

Günä kylyp, toba kylmaý gidenleri,
Hakdan gorkmaý, gaflat bile ýatanlary,
Dünýä üçin iman-yslam satanlary,
Syrat atly güzergähde tutar, dostlar.

Kyýamatnyň şitdetini bilmegenler,
Gatyg azap, dar lahatdan gorkmaganlar,
Hak gahryndan gorkup ýaşyn dökmegenler,
Dowzah içre ýüz-müň azap dartar, dostlar.

Ötdi ömrüm şerigata ýetelmedim,
Şerigatsyz tarykata ötelmedim,
Hakykatsyz magrypete batalmadym,
Gatyg ýoldur, pirsiz niçik öter, dostlar.

Gul Hoja Ahmet, nebsim saldy işbu ýola,
Onuň üçin gaçdym dostlar, çölden-çöle,
Alla diýdim, hiç bakmadym öňden-sola, 
Alla diýen şowk-şerabyn dadar, dostlar.

 27 

Gözüm nemli, köňül gamly, jan elemli,
Niçik alaç ederimni bilmem, dostlar.
Bu hasratda, nedamatda başym gatyp,
Kaýu tarap giderimni bilmem, dostlar.

Dürli-dürli alam kylar boldy Huda,
Ýüregimde jerahatlar boldy peýda,
Bu dünýäde lahza paryg bolmak kaýda,
Niçik alaç ederimni bilmem, dostlar.

Alla üçin ogul-gyzym ýetim kylsam,
Jandan geçip, maldan geçip, garyp bolsam,
Beýabanda ýalňyz gaz dek nala kylsam,
Niçik alaç ederimni bilmem, dostlar.

Has gullar dek gijelerde gaýym bolsam,
Merdanlar dek gündizlerde saýym bolsam,
Gijeleri aram almaý «Rebbim!» diýsem,
Niçik alaç ederimni bilmem, dostlar.

Tohmy-usýan bihet seçdim, tagatym az,
Ötdi ömrüm gaflat birle hem gyşy-ýaz,
Ýakyn durar, janym guşy kylsa perwaz,
Niçik alaç ederimni bilmem, dostlar.

Gul Hoja Ahmet, hyzmatynda jan bermese,
Daýhan imes, kätmen çapyp nan iýmese, 
Nesim degmeý gül-gunçaga nem bolmasa,
Niçik alaç ederimni bilmem, dostlar.

Bendäm diýseň, Gul Hoja Ahmet kemniň-kemi,
Ruzy-gaflat ötgermesem sensiz demi,
Iş ötensoň kylmas kabul bu tobamy,
Taňrym kabul ederini bilmem, dostlar.

 28 
                                    
Hoş gaýypdan ýetişdi, bir jemagat derwüşler,
Batynynda «Hüw» diýrler, syrry-nahan derwüşler.

Dynmaý rowan ýörerler, dynsa tekbir aýdarlar, 
Tapsa söhbet tutarlar, hoş söhbetlik derwüşler.

Jindeleri pür-selah, tesbihleri «Illallah»,
Hyzmat kylsaň eý, wallah, billahurdyr derwüşler.

Asly pahryn bilseler, wujud şährin gezseler,
Zahyr-batyn düzseler, sagadatlyk derwüşler.

Meşaýyhlar syr-esrar, hyzmatynda bol zynhar,
Pygamberden ýadygär galan erer derwüşler.

Jindeleri egninde, asalary elinde,
Izim ýady köňlünde, Alla diýer derwüşler. 

Gul Hoja Ahmet misgin bol, misginlerden many sor,
Derwüşlere huzur goý, guş dek uçar derwüşler. 

 29 
                            
Hak ýadyny eden köňül röwşen bolar,
Zikr ýadyn etse köňül nurga dolar,
Pysk-u pesat zeňgarlary açlyp durar,
Köňül gözün açyp onda görer, dostlar.

Hak zikrini köňül içre ja kylmasa,
Özden geçip, halka tehi-pa bolmasa,
Açyk ýüzli, gül-gunça dek wa bolmasa,
Maksadyna niçik onda ýeter, dostlar. 

Piri-kämil hem mükemmel bolan kişi,
Şemsi-kamar ýanlyg erer içi-daşy, 
Zerre galmas, köňül içre gallu-gaşy,
Nazar kylsa her ýanyny görer, dostlar.

Töwekgelni rast kylanlar ýola girdi,
Endişeden köňül üzen, haly kyldy,
Hak wehminden göz ýaşyny jary kyldy,
Hakdan gorksaň, barça senden gorkar, dostlar.

Gul Hoja Ahmet, masuwadan köňül üzdür,
Hümmet kylsa, Hak ýadyna köňül gözdür,
Erenleriň hikmetinde işbu syrdyr,
Hümmet kylan syr derýaga batar, dostlar. 

 30 

Şerigatyň ýollarynda tahsyl kylyp,
Hak ýoluna rastlyk birle girgüm geler.
Pygamberiň sünnetini terk etmeýin, 
Sorap-istäp, erenleri görgüm geler.

Terk ediban bu dünýäni tarykatda,
Şowklanyban köýüp-ýanyp magrypetde,
Teslim edip işbu jany — hakykatda,
Pena bolup, Hak didaryn görgüm geler. 

Pena bulup Haky söýen erenlerden,
Ylham geldi, jan içinde jananlardan,
Menem munda geçip jümle hany mandan,
Ol makamda Haka ýakyn bolgum geler.

Görmeý, bilmeý, lap urmagyl rast ergüseň,
Ol makamy-a:ly erer, eger bilseň,
Rastlyk bile Haky söýgül, aşyk erseň,
Görüp, bilip Hak ýoluny sorgum geler.

Erenleriň hyzmatynda ýügrüp-ýelip,
Hak Tagala lutf eýlese nazar salyp,
Hakykat(yň) manysyndan dürler alyp,
Gymmatyny bilgen halka satgum geler.

Misgin Ahmet Hak ryzasyn yzlar imdi,
Aşyklar dek didaryny gözlär imdi,
Ýaşy dynmaý, hikmet sözni sözlär imdi, 
Kabul bolsa, didaryny görgüm geler. 

 31 

Aryp-aşyk Hak mülkünde elem dartsa,
On sekiz müň, kamug älem, gul-gul bolar.
Köňül guşy şowk ganatyn tokup uçsa,
Jümle wujut ýadyn saýrar, bilbil bolar.

Muhabbetiň bossanyna özün salsa,
Magrypetiň meýdanynda jöwlan kylsa,
Syr şerbetin içip aşyk ruhy gansa,
Müweddetiň gülzarynda hoş gül bolar.

«Elest» hamryn berse kime oşol saky,
Bilgil mydam esru durar meňgu-baky,
Tenin-janyn köýdürer ol şowk-yhraky,
Içi köýer, ýakylyban hem kül bolar.

Zahyrlaryn ady bile bezegenler,
Batynlaryn ýady bile düzegenler,
Şowk oduny köňül içre gizlegenler, 
Masuwalla birle haçan meşgul bolar.

Erenleri Hak ýadyndan gapyl ýörmes,
«Rijälun lä tülhihum»  diýr, Halykynnäs,
Eren ýolun tutan hergiz ýolda galmas,
Ol hezretde syr esrary makbul bolar.

Tarykatdyr oşol ýolny bilse derwüş,
Magrypetiň matagyny alsa derwüş,
Özge ýolny bady-howa sansa derwüş,
Hakykatyň meýdanynda är ol bolar.

Gatyglangyl, eý, Gul Ahmet, ýola girgil,
Gulny görseň guly bolup, magny sorgul,
Hak ilähim ruzy kylsa, magny algyl,
Magny alan erenleri çyn gul bolar.
 
 32 

Suhan eýäm bendesine lutf eýlese,
Içi köýüp, daşy ýanyp, bürýan bolar.
Pir etegin tutup aşyk ýola girse,
Haky yzlap, iki gözi girýan bolar.

Yşk ýolunda gije-gündiz ýyglaganlar,
Jandan geçip, bilin mäkäm baglaganlar,
Hyzmat kylyp Hak syryny aňlaganlar,
Tün ukyny haram kylyp, nalan bolar.

Wadaryg-a, yşk ýolunda janyň bermeý,
Guwwas bolup ol derýadan göwher tirmeý,
Hakdan özge gaflatlary arka salmaý,
Taňla barsa nedamatlar çendan bolar.

Janyň gynap, zakgum çeýnäp, aşyk bolgul,
Başyň oýnap, dyzyň bükläp sadyk bolgul, 
Ondan soňra dergähine laýyk bolgul,
Janyň berseň, rehm eýlese janan bolar.

Diwanaýy-juludamu Hakny tapan,
Şemşiri Hak gola alyp, nebsni çapan,
Kaýda barsa gözni ýumup, syrny tapan,
 Ondag syrny tapan kişi merdan bolar.

Aşyk bolsaň Baýazit dek özüň satgyl,
Walla-billä dünýä haram, taşlap ötgül,
Ganlar döküp gözleriňden, tünler gatgyl,
Bir lahzada şeýtan mülki weýran bolar.

Daň atynça zikrin etgil janyň birle, 
Dag-u çöli bossan kylgyl, ganyň birle,
Daşdan gaty daşda ýatgyl, ýanyň birle,
Ýoldan azan ýüz-müň gapyl merdan bolar.

Daşdan gaty başy görseň, bihabarlar,
Ukba işin arka taşlap, dünýä yzlar,
Aýat, hadys beýan kylsaň gaty sözlär,
Zahyr adam batynlary şeýtan bolar.

Zikrin etgil, ganlar aksyn gözleriňden,
Hikmet aýtgyl, dürler damsyn sözleriňden,
Güller össün, her bir basan yzlaryňdan,
Güle baksaň, gül açylyp, bossan bolar.

Säherlerde irte gopup, ganlar ýuwtgul,
Piri-mugan eteklerin mäkäm tutgul,
Haka aşyk bolan bolsaň, jandan ötgül,
Jandan geçen çyn aşyklar urýan bolar.

Bu älemde pakyrlyga takat kylan, 
Harlyk dartyp muşakgaty rahat bilen,
Gul Hoja Ahmet ýagşylara hyzmat kylan, 
Kyýamat gün  ondag kişi soltan bolar.

 33 

Alla ýadyn aýdar gullar magny bilen,
Bimagnyga hergiz köňül bermes bolar. 
Alla diýen aşyk gullar daýym mydam,
Hak ýadyndan zerre gapyl bolmas bolar.

Gapyl bolmas Hak ýadyndan tünler tamam,
Halal lukma talap kylar, iýmes haram,
Derwüş gerek oşol sypat birle mydam,
Gul bolar ol, gullugyndan dänmes bolar.

Gul boluban gulluk kylar hojasyna,
Tenin, janyn aýamas ol jepasyna,
Sabr bolup, umyt tutar wadasyna,
Wadasyndan çyn aşyklar dänmes bolar.

Jepa çekmeý aşyk bolmas diňle, gapyl,
Jepa çekip sabyr bolgul, bolma jahyl,
Ryza bolup, gulluk kylan bolar a:kyl,
Jahyl adam gullugyna ýa:nmas bolar,

Gul men diýban, Hak emrini kylmaganlar,
Gudratyny görüp ybrat almaganlar,
Iman-yslam ahkamlaryn bilmegenler,
Ulug günde gyzyl ýüzli bolmas bolar. 

Hak ýolunyň şowky köpdür bilgenlere, 
Gorkunç bile ýetgil oşol ölgenlere,
Asan görner ýoly mydam ýörgenlere,
Ondag gullar gör azabyn bilmes bolar.

Alla diýgil Gul Hoja Ahmet, ýaşyň akgaý,
Ötgen aryp hümmet birle goluň tutgaý,
Rehmi gelse Rahym, Möwlüm rehim kylgaý,
Hoja gulny hergiz zaýyg goýmas bolar.

 34 

Kaýu ýerde ezizlerniň jemgy bolsa,
Hal ylmyny oşol ýerde aýtgum geler.
Men olaryň söhbetine hoşlansam men,
Özümni (men) özlerige gatgum geler.

Hoş söhbetlik ezizlere janym bersem,
Häki-paýyn gözlerime sürme kylsam,
Hyzmat kylyp ýagşylardan doga alsam,
Ondan soňra şowk-şerabyn datgum geler.

Şowk-şerabyn dadan kylar dünýä talak,
Hydyr babam gelip oňa berer sapak,
Dünýä ukbun depip bergil ýüz-müň talak,
Ondag äre eziz janym bergüm geler.

Wadaryg-a, hemme huplar ýyglap ötdi,
Enesinden dogdy erse, matam tutdy,
Gözüm ýumup tä açynçam, ömrüm ötdi,
Bu dünýäni püçek pula satgum geler.

Zamana ahyry bolsa akyl gitgeý,
Adam ogly bir-birini tutup, depgeý,
Dünýä üçin iman-yslam dinin satgaý,
Nadanlara bu sözleri aýtgum geler.

Dili birle «ymmat men» diýp, ýalan sözlär,
Kişi malyn almak üçin herýan gözlär,
Halalyny munda goýup haram yzlar,
Alymlara Hak sözüni aýtgum geler.

«Ymmat men» diýp, kylalmasaň ölen ýagşy,
Gara ýeriň garnyn ýaryp, giren ýagşy,
Gyzyl ýüzüň reňgi gidip, solan ýagşy,
Piri-mugan hyzmatyna ýetgüm geler.

Aşyk bolsaň göz ýaşyňy saçyp ötgül,
Edhem sypat tagty-bagtdan geçip ötgül,
Baýezit dek dünýä ukbun depip ötgül,
Lutf eýlese, dünýäsinden ötgüm geler.

Melaýyklar bir gün ýyglyp söhbet gurdy,
Raksy-semag urmak üçin ýügrüp ýördi,
Magraç üzre hak Mustapa muny gördi,
Imdi men hem raks-u semag urgum geler.

Magraç üzre Hak Mustapa özden gitdi,
Jebraýyly Muhammediň başyn tutdy,
Gudrat birle Suhan eýäm zikr ögretdi,
Ymmat bolsam, men hem zikrin aýtgum geler.

Gul Hoja Ahmet, dünýä görseň zynhar gaçgyl,
Zikrin edip, tarykatyň ýolun açgyl,
Aýat, hadys sözler birle dürler saçgyl,
Erenlerden dürri-göwher algum geler.

 35 

Dostlaryga açmyş Izim göwherini, 
Asan birle bu göwherden alsa bolmas.
Renç dartmaýyn, gelip piriň hyzmatyna,
Işbu syryň saraýyna girse bolmas.

Aşyk gullar hülle geýip, Byrak müner,
Hüýru-kusur, öňde-solda perişteler,
Ol Byraga bakyp onda haýran galar,
Aşyk bolmaý ol Byraga münse bolmas.

Aşyk bolmaý, münse bolmas ol Byraga,
Byrak münmeý ýetip bolmas, ýol yraga,
Rahman Taňrym rehim kylyp, girgiz ýola,
Kylawuzsyz işbu ýola girse bolmas.

Erenleriň yzyn yzlap ýola girseň, 
Geçgil pany dünýäsinden çyn gul erseň,
Kylawuzsyz işbu ýola girer bolsaň,
Yzlap ony tapmagynça girse bolmas.
 
Muhabbetiň derýasyna çümüp, batgyl,
Aşyklaryň söhbetine özüň gatgyl,
Muhabbetiň bazarynda özüň satgyl,
Özüň satmaý Hak rehmetin alsa bolmas.

Şerigatyň meýdanyna özüň salmaý,
Tarykatyň bossanynda jöwlan kylmaý,
Hakykatyň derýasyndan göwher almaý,
Magrypetiň edebini bilse bolmas.

Gul Hoja Ahmet, Hak ýolunda durgul mydam,
Aşyklara derman berer alatdowam,
Zagyp gulnuň arzuwydyr Daressalam,
Aşyk bolmaý Daressalam girse bolmas.

 36 

Muhabbetiň derýasyna çümmeginçä,
Eý dostlarym, yşk göwherin alsa bolmas,
Daň atynça perýat urup, yňranmaýyn,
Sarraf bolup, yşk derdini bilse bolmas.

Yşk derdini bilgen kişi dünýä deper,
Nala kylyp, köýüp-ýanyp ýaşyn seper,
Muhabbetden habar beren Hakny tapar, 
Ýaşy akmaý, ryýazatda solsa bolmas.

Haka aşyk bolanlaryň seňgi mähek,
Bu älemde mekan kylmas jaýy pelek,
Nebsi ölük, köňli tirik, misli melek,
Mundag bolmaý, syrdan bähre alsa bolmas.

Tirik ölmeý mejazyga ras sözlemes,
Hakykatyň şahy birle, raz edilmes,
Jandan geçip, baş oýnamaý halys bolmas,
Halys bolmaý, dünýä ukbun salsa bolmas.

Yhlas gerek eý-a talyp, aşyk bolsaň,
Myradyňy berer ahyr sadyk bolsaň,
Muhup bolup, dergähine laýyk bolsaň,
Laýyk bolmaý didaryny görse bolmas.    

Aşyklara derd-u-bela, apat gerek, 
Hakdan bizar, jan berere rahat gerek,
Melamata, ihanata takat gerek,
Takat kylmaý, Haka aşyk bolsa bolmas.

Yşksyzlarny gördüm erse bürýan bolar,
Mömün men diýp, imanlaryn weýran kylar,
Ruzy-magşar didar görmeý, sersaň bolar,
Piri-mugan nazar kylmaý, görse bolmas.

Aşyklary mähnet istär, jandan bizar,
Ruza-namaz, tesbihleri Perwerdigär,
Dynmaý daýym tesbih aýdar, bolup bidar,
«Ýar istemeý, bende men» diýp, ýörse bolmas.

Tarykatyň şowky-zowky köýmek-ýanmak,
Hakdan özge bigäneden gaçyp-tänmek,
Ýüz-müň dürli jepa kylsa, boýun sunmak,
Boýun sunmaý yşk dükanyn gursa bolmas.

Nadan kim diýp sorsa aýdyň, bihabarlar,
Hakdan gaçyp näjynslary sorap, yzlar,
Aýat, hadys beýan kylsa, gatyg sözlär,
Hemdem bolup, nadan birle ýörse bolmas.

Zynhar-zynhar gaçagörgül, bolsa nadan,
Hak ýadyny her kim etse oşol merdan,
Janny-jana peýwent kylsa, bulgaý janan,
Ursa-sökse ol ezizden dänse bolmas.

Teperrikdir ol ezizden ülüş alyň,
Astanasyn ýassanyban ýolun soruň,
Ýol görsetse, jany-dilni berbat kylyň,
Berbat kylmaý Hak ýoluna girse bolmas.

Aşyklaryň halk içinde syry pynhan,
Ahy-serdi göge ýeter, reňgi hazan,
Gözi girýan, bagry bürýan, hana weýran,
Mundag bolmaý, Hak ýoluny bilse bolmas.

Gul Hoja Ahmet, zahyt bolma, aşyk bolgul,
Bu ýollarda bibäk ýörme, sadyk bolgul,
Başdan-aýak derde dolgul, kanyg bolgul,
Kanyg bolmaý, yşk dawasyn kylsa bolmas. 

 37 

Gudrat birle perman kyldy Möwlam bizge, Ýerde-gökde janly mahluk galmas ermiş.
Kabyz kyldy, Ezraýyly älem üzre,
Eziz jany almagynça goýmas ermiş.

«Başym meniň ýaş turar» diýp ýörer erdim,
Herne hasyl bolsa «az» diýp, aýdar erdim,
Dürli-dürli, ýalan dagwa kylar erdim,
Imdi bildim, men aýtgan dek bolmas ermiş.

«Dünýä meniň mülküm» diýgen soltanlara,
Älem malyn sansyz ýygyp alganlara,
Eşret birle meşgul bolup ýörgenlere,
Ölüm gelse biri wepa kylmas ermiş.

Magrur bolmaň, eý, dostlarym eşret edip,
Eşret birle gije-gündiz bihut ýatyp,
Jan alyjy geler ermiş bir gün ýetip,
Mundag ýerde gapyl ýörse, bolmas ermiş.

Gul Hoja Ahmet, öleriňni bilegörgül,
Ahyretniň ýaragyny kylagörgül,
Öler men diýp, ýol başynda duragörgül,
Melekül-möwt gelse pursat goýmas ermiş.

 38 

Aryp-aşyk şowky birle kyýamat gün,
Huda birle bahsy-jowap kylar ermiş.
Bu älemde dartgan jebru-jepalaryn,
Göwsün ýaryp, Hak gaşyna serer ermiş.

Bu älemde kyldyň meni halka ryswa,
«Didarymny görer sen» diýp, kyldyň şeýda,
Älem halkyn duşman kylyp, saldy gowga,
Hudaýyga baryp arz kylar ermiş.

Didarymny arzuw kylsaň gije ýatma,
Bu dünýäniň tagmasyndan zerre datma,
Haldan sorsa, nadanlara syrny satma,
Mundag ärler feýz-u-futuh alar ermiş.

Didarymy görer bolsaň, arşa bakgyl,
Ahyň birle arş üstünde otlar ýakgyl,
Ymmat bolsaň Mustapaga, kabyh datgyl,
Çyn aşygy Suhan Izim synar ermiş,

Eşdip aşyk raksy-semag urup ýörgeý,
Melaýyklar ýyglyp gelip, söhbet gurgaý,
Arşy-kürsi, lowhy-galam dada gelgeý, Ýer tebredip haka zary kylar ermiş.

Eý, ýer-u-gök, aşyklardan heder kylyň,
Otlug ahy çykar bolsa häzir boluň,
Göge bakyp, nagra dartsa gorkup duruň,
Bir ah ursa, älem ýegsan bolar ermiş.

Çyn aşyklar zaýyf kylyp, salam bergeý,
Gudrat birle perde içre «aleýk» algaý,
«Didar üçin köýgenlerim geliň, diýgeý,
Lutfun görüp, çyn aşyklar güler ermiş.

Saffan-saffan aşyklardan nida gelgeý,
Ýüz ýigrimi aşyk bolup, bir sap bolgaý,
«Jennet gir» diýip, Ilähiden ylham gelgeý,
Jennet girmeý didaryny tilär ermiş.

Nida gelgeý melaýyga zynjyr salgyl,
Gyllar dakyp, magşargähe alyp bargyl,
«Didar üçin köýenlerim myhman kylgyl»,
Aşyklary bihut bolup, durar ermiş.

Aýdanlaryn kylgan aşyk didar görgeý,
Waslyn bulup, magşargähde döwran sürgeý,
Efganyndan ýedi dowzah örtäp, köýgeý,
Melek gelip oňa tagzym kylar ermiş.

Aşyklaryň haýbatyndan melek gaçgaý,
Gorkup baryp, dowzah içre otlar saçgaý,
Wehim birle zäher-zakgum doýa içgeý,
Gudratyndan älem haýran bolar ermiş.

Meleklerden aşyklar köp, eý, bihabar,
Bir ah ursa älem bolar zir-u-ziber,
Zahyt, salyk aşyklardan yşk mugteber,
Yşksyz adam walla ýolda galar ermiş.

Gul Hoja Ahmet, didar üçin geda bolgul,
Geçgil ähl-u-aýalyňdan, jyda bolgul,
Alla haky bular duşman, sowa bolgul,
Jyda bolan Hak waslyny görer ermiş. 

Категория: Goşgular | Просмотров: 541 | Добавил: Нawеran | Теги: Hoja Ahmet Ýasawy | Рейтинг: 3.5/2
Awtoryň başga makalalary

Goşgular bölümiň başga makalalary

Sumbaryñ kenarynda / Goşgular - 01.01.2024
Was-wasylara... / Goşgular - 23.01.2024
Goltugy daşly adam / Goşgular - 05.01.2024
Çarwa arabyñ söýgüsi / Goşgular - 10.02.2024
Lenç edilen nakyl / Goşgular - 05.02.2024
Ömrümiñ manysy bolmaly zenan / Goşgular - 05.02.2024
Alabahar / Goşgular - 21.03.2024
Puluň başarnygy barada agymtyl goşgy / Goşgular - 10.01.2024
Moskwadan görýärler / Goşgular - 30.01.2024
Kyrk ýaşa ýeteniñde / Goşgular - 03.02.2024

Teswirleriň ählisi: 0
Teswiri diňe saýta agza bolan ulanjylar goşup bilýär.
[ Agza bol | Saýta gir ]