Eňňerede

ÝERE GAÇÝAR

Zemin dowul tapyp, lerzana geler
Seni gözläp ahy-nala çekşimden.
Daglaň depesiniň garlary erär
Howuryndan, lowlap ýanýan yşkymdan.

Bütin barlyk doňup galar tisginip,
Damagyna dili gider pelegiň.
Gökde ýalňyz özi uçýan söýgimiň
Görersiň sen ýere gaçýan ýelegin.

Oturansyň dişläp dodaklaryňy,
Puşman edip, öz-özüňe gargynyp.
Uçup giden ap-ak guş deý söýgimiň
Ak ýelegi ýere gaçýar gar bolup.

*  *  *

SEN KIM?

Şahyr Myrada

Ýaşymyzda tapawut kän, aralyk,
Mekgä giden ýaly uzak, gaty daş.
Kalba talaň salýar, mähire zarlyk,
Derdiň paýlaşara dogan ýok, gardaş.

Ýazan goşgularňy okap göremde
Öz ykbalym gaýtalanýar barynda.
Meň durmuşym aýdyp berdimi biri,
Özüme bildirmän gijäň ýarynda?

Ýa sen meniñ juda ýaşka ýitiren
Mährine zar bolup ýören agammy?
Dişim gysyp, ýüregimde dert baglan
Gözýaşymdan kemal tapan agymmy?

Gara dutar perdesinde ot alan
Heňine söz ýazyp bolmaz sazymmy?
Bir säw bilen aýra düşüp, ýat bolan
Sen meniň ruhummy ýa-da özümmi?

*  *  *

EŇŇEREDE

Ýalaňaç galan baglaryň
Ýel göçüren ýapraklaryn.
Gyrawlap doňupdyr suwy
Siňmän galan ol ýaplaryň.

Sessizje aýazy bardy
Bildirmeýän bu ýanwaryň.
Ýap boýunyň gamyşlary
Ýere beripdir ýanlaryn.

Boşap galan atyzlarda
Sygyr padasy ýör indi.
Deminden sypyp bolmaýan
Hy:rsyz garawul ýok indi.

Çatma biziň düşelgämiz,
Adyň tutýan ýok, hezillik.
Ýatyrdy bitaý köwüşi
Hem sapy döwülen gezlik.

Sahy ÖWEZOW