Duşuşmarys

DUŞUŞMARYS

Gezip ýörüs bir-birimiz ýat saýyp,
Ýöne ökünmändim men seni söýüp.
Her ýyl bahar geler, begresin geýnip,
Bägüller duşuşar, biz duşuşmarys.

Ýyllar geçer ýüwrük ýelkenler bilen,
Elim ýetmez saçyň tolkunlaryna.
Tolkunlaryn goşup tolkunlaryna,
Derýalar duşuşar, biz duşuşmarys.

Bu gün maňa gara göründi Aýam,
Bilýän, ýaşlyk uçar ganatyn ýaýyp,
Alysda bir ýerde, asmanda gaýyp,
Arzuwlar duşuşar, biz duşuşmarys.

Çyn aşyk däl, söýenine ökünen,
Bu derdi seň üçin kimler çekişer?!
Agşamara Gün Ýer bilen öpüşer —
Älemler duşuşar, biz duşuşmarys.