Gelin

GELIN

Miweler ýygnalyp, hasyl sowulyp,
Daragtlar goluny gerende gyşa.
Joralarnyň arasyndan sogrulyp,
Oba gyzy çykyp gitdi durmuşa.

Utanjaň gyz edep üçin aglady,
Gözýaşlary patrak ýaly seçildi.
Gyzlyk bilen gelinleriň arasy,
Şagalaň-şowhunly toýda geçildi.

Ynjalanok giň otagda aýlanyp,
Çagalygna uçup gidýär hyýaly.
Otyr gelin durşy bilen şaý bolup,
Täze ýyl bezelen arça mysaly.

Orazgylyç ÇARYÝEW.

"Edebiýat we sungat" gazeti, 20.08.1982 ý.