Gezer ikisi

GEZER IKISI

Jüp käkilik bir hatara düzülmüş,
Höwründen aýrylmaz, gezer ikisi.
Darar zülpün, gerden üste çözülmiş,
Hünji bilen merjen düzer ikisi.

Birini meñzetdim algyr laçyna,
Birini meñzetdim misli dogana,
Beýle mynasyplar gelmez jahana,
El göwsünde hyzmat eder ikisi.

Birini meñzetdim bakja gülüne,
Birini meñzetdim selbi dalyna,
Döwedin, galamyn almyş eline,
Soltana arzy-hal ýazar ikisi.

Garajaoglan diýer, ilden illere,
Akyp gidem boz bulanyk sillere,
Göwel ördek kibi kölden köllere
Çyrpyna-çyrpyna ýüzer ikisi.

■ LÄLEMIDIR, ALMYDYR?

Bir çeçek açyldy Bilal özünde,
Lälemidir, sünbülmidir, gülmüdir?
Ülpül-ülpül eder ýaryñ ýüzünde
Zülüpmidir, käkilmidir, telmidir?

Ehnine al geýer, üstünden ýekta,
Al meni, söwdügim, goýnuñda sakla,
Gara gaş astynda birki, nokta baý,
Iýamydyr, ýa şinmidir, dalmydyr?

Näzli ýar ilinden bir salam geldi,
Ajal şerbeti-de bagrymy dildi,
Näzli ýar alnyna bir ýaglyk çaldy,
Ýaşylmydyr, lälemidir, almydyr?

Ak ellere al hynalar ýakarlar,
Ala göze syýa sürme çekerler,
Bir ýigidiñ söýdügine bakarlar,
Edepmidir, ekrammydyr ýolmudyr?

Heý, janadyr, Garajaoglan, heý, jan-a,
Dostum müşk çalynmyş syýa saçyna,
Süzülmişdir bir pyýala içine
Şekermidir, şerbetmidir, balmydyr?

■ ÝOLLARA BAKAR AGLARYN

Eý, pelek, seniñ eliñden
Nalalar çeker aglaryn.
Şam-u säher gözüm ýaşlap,
Jigerim ýakar aglaryn.

Çagyraryn Tañry diýip,
Gel, aglatma meni diýip,
Kimi görsem, seni diýip,
Ýollara bakar aglaryn.

Rehm eýle, begim, urýandyr,
Gözýaşym ýagyş ㅡ barandyr,
Gaýgyly göwnüm weýrandyr,
Hijriñi çeker aglaryn.

Medet senden, eý, Allahym
Boýundyr saña bu janym,
Magşar gününde kepenim
Boýnuma dakar aglaryn.

Garajaoglan, düşüp derde,
Gije-gündiz otda ㅡ narda,
Hak kazy boldugy ýerde
Gabrymdan çykar aglaryn.

■ BENT ETMIŞ

Diñläñ, bir gözeliñ waspyn aýdaýyn,
Bir meñi bar, şirin jany bent etmiş.
Bir meñi bar göz hem gaş arasynda,
Bir meñi-de ak gerdeni bent etmiş.

Bir meñi başymyñ täjidir täji,
Bir meñi Käbede hajydyr hajy,
Bir meñi Urumdan alar hyrajy,
Bir meñi-de aşygyny bent etmiş.

Bir meñiñ bahasy Gürji-Gürjüstan,
Bir meñiñ bahasy Hind-u Hindistan
Bir meñiñ bahasy ol Arabystan,
Bir meñi-de Tatar hany bent etmiş.

Bir meñi bent etmiş Şamy, Halaby,
Bir meñi bent etmiş Müsür, Antebi,
Garajaoglan diýer, näzlimiñ lebi,
Bir meñi-de Aly Osmany bent etmiş.

■ DAG BOLMAZ

Atym, galk gideli dagdan ýokary,
Beýle daglar goç ýigide dag bolmaz.
Ýedi ýerden ýaralarym syzylar,
Bu ýarany çeken ýigit sag bolmaz.

Miwe bermez serwi ile söwüdi,
Men özüme bersem indi öwüdi,
Elleri goýnunda gezen ýigidi,
Ýigit özün görkezmese beg bolmaz.

Öwüt bersem, öwütlerim kär etmez,
Ol ýaryñ hyýaly ýadymdan gitmez,
Bäzbent daksa, görgün golum bag tutmaz,
Dostuñ zülpi dañmak üçin bag bolmaz.

Garajaoglan, gorkaram men haramdan,
Aýra düşdüm ýurtdan-harap hanamdan,
Bir ýigidi aýyrsalar eneden,
Enesinden aýra düşen sag bolmaz.

■ GARA GÖZLIM

Küýze alyp, çeşmä ol suwa gelmiş,
Terlenmiş mämeler ýañy görülmiş,
Has ýyldyz düwmeler çapraz urulmyş,
Säherde göwsüñi çöz, gara gözlim.

Ne biler gözeli söýmäni akmak?
Sogapdyr gözeliñ ýüzüne bakmak,
Pursatyn tapyp-da, ýañakdan öpmek,
Jan jepa götermez, tez, gara gözlim.

Ýene dumanlandy ýüzi howanyñ,
Göwni belent bolar gözel söýeniñ
Terlenmiş mämeli bir ýar söýeniñ
Ýüregi dos-doly köz, gara gözlim.

Ir ertir säherde mundan geçersiñ,
Ýörelgedir ak göwsüñi açarsyñ,
Bir gün bolar, gollaryma düşersiñ,
Ahmyrym alaryn, gyz, gara gözlim.

Garajaoglan aslyñ ㅡ soýuñ soý bolsa,
Inçe biliñ, uzyn boýuñ boý bolsa
Berdigiñ öpüşiñ bary bu bolsa
Wallahy-billahy, az, gara gözlim.

■ ÝÜREK DOÝARMY?

Ala gözleriñi söýdügim, dilber,
Şirin sözleriñden ýürek doýarmy?
Men bir diwana men, hiç zat bilmezem,
Gözel bolmadygy göwün söýermi?

Düşündim topragy, ýassandym daşy,
Gözümden akdyrdym gan bile ýaşy,
Seni jan-u dilden söýmeýän kişi,
Geçer-de garşynda boýun egermi?

Örtenip uzakdan görmäge geldim,
Jemalyñ gördüm-de diwana boldum,
Rehimiñ gelmezmi, ynha men öldüm,
Rehmi bolan aşygyna gyýarmy?

Garajaoglan diýer, ynan sözüme,
Goşa hal düzülmüş Aýyñ ýüzüne,
Ýarym, seniñ dürli-dürli näziñe,
Jan sabr eder, emma ýürek duýarmy?

Hasan GARAJAOGLAN.