10:03 Gündogar şahyry | |
GÜNDOGAR ŞAHYRY Şahyryň gadyryn bilýär musulman, Gündogar şahyryň gadyryn bilýär. Seždegäh edinip şahyr guburyn Mukaddes mazary arzylap gelýär. Şahyr — Gündogarda — ruhuň pitnesi, Şahyr — Gündogarda — Allaň hikmeti. Ýöne ýere däldir gan içen şalaň Gelip-gelip bir şahyra bitmesi. Gündogarda şahyr şygry pentdir pent, Doga barabardyr — sözüň hümmeti. Dünýäni mergi deý gyran Teýmir leňk Ýasawa gurdurýar köşk deý kümmeti! Tersa Nesiminiň hamyn sypyryp, Dirikä çekdirip gabyr azabyn, Nije asyr bäri külli musulman Togap edip gelýär onuň mazaryn. Nobatguly, üýtget, efrenji ugruň, Buýsan, aklyň ýetmejek bu halkyňa, Ürgençde Nejmetdin Kubraň guburyn Deňläpdirler ol hut Mekgäniň hajyna. Gündogar şahyryň gadyryn bilýär, Bilýär ol şygyryň sarpasyn saklap. Bak, Nazymy dara çekjek general Aglap ýatyr guburyny gujaklap. Ýatyr Mäne baba kümmet astynda, Ýatyr Sagdy, Haýýam, Rumy, Jamy-da. Köşkden zyýat ol türbetler aslynda Nesip etmez dünýäň her bir şasyna. Azan bilner, Aýat bilner, Em bilner, Pyragynyň gelýän sesi Çendirden. Gündogarda hakdan içen şahyrlar Pygamber ýok çagty — pygamberdirler! | |
|
√ Kyrk ýaşa ýeteniñde / Goşgular - 03.02.2024 |
√ Garaş maňa / Goşgular - 17.02.2024 |
√ Tazy / Goşgular - 30.01.2024 |
√ Dünýe... / Goşgular - 11.02.2024 |
√ "Bagşylara" / Goşgular - 07.02.2024 |
√ Sumbaryñ kenarynda / Goşgular - 01.01.2024 |
√ "Gelin jan..." / Goşgular - 26.03.2024 |
√ "Gitdim senden ilerledip ümzügi..." / Goşgular - 01.01.2024 |
√ Meniñ monologym / Goşgular - 01.01.2024 |
√ Ýagyş damjasy / Goşgular - 24.03.2024 |
Teswirleriň ählisi: 1 | |
| |