12:25

"Gyrgyz depderi" / goşgular toplumy

"GYRGYZ DEPDERI" goşgular toplumyndan

■ ARKADAGLY TÜRKMEN GELDI SALAMA

«Dost» sözüne taý tapylmaz dünýäde,
Gujak-gujak toý çemeni elinde.
Köňül içre doga sözi dilinde,
Arkadagly türkmen geldi salama.

Ýagşylykdan, haýyr işden ýalkanyp,
Ganatlanyp, bedew ata atlanyp,
Kerwen geçen Ýüpek ýoldan galkynyp,
Arkadagly türkmen geldi salama.

Eger röwşen bolsa köňül çyrasy,
Galan zadyň bolar sözsüz çäresi,
Gülleýip, gül açyp göwün parçasy,
Arkadagly türkmen geldi salama.

Oguzhan ataly, Gorkut dädeli,
Görogly agaly, ýyldyz dideli,
Hakdan içen Magtymguly danaly,
Arkadagly türkmen geldi salama.

«Gözel Bişkek» nama bolup, galama,
Alkyş sözler ylham berip kelama,
Aýtmatowyň hatyraly toýuna,
Arkadagly türkmen geldi salama.

■ TÝAN-ŞAN

Men seni synladym, synladym uzak,
Pikirlerim, hyýallarym oraşan.
Gözümiň alnynda barýardy uzap,
Kert gaýaly, belent başly Týan-Şan!

Hasylly kalbymyň joşy deý ylla,
Arzuwlarym wysalyna gowuşan.
Zerewşan asman deý öwüsýän tylla,
Durkuň ajap, belent başly Týan-Şan!

Säher çygy gerşden-gerşe syrygyp,
Akarlarda tolkunlary öpüşen.
Ýaşaýyşyň zowky ýaly bugaryp,
Durşuň ajap, belent başly Týan-Şan!

Degre-daşy gülzar, ýaşyl lälezar,
Gyrgyz topragyna şöhrat hem-de şan.
Mähelleli goýnuň toýlar bezeýär,
Kert gaýaly, belent başly Týan-Şan!

Kerwen geçen Beýik Ýüpek ýol içre,
Tarypyň bar taryhyma galtaşan.
Dünýä meşhur gözel Yssyk köl içre,
Geljegiň bar, belent başly Týan-Şan!

■ YSSYK KÖL

Degre-daşy tokaýlyk,
Ortasynda mawy köl.
Goýnunda müňläp baýlyk,
Bereketli Yssyk köl.

Bir görseň-ä, gündizlik,
Baş aýagy belli däl.
Bir görseňem, gijelik,
Ak güneşli Yssyk köl.

Şemal kowup akary,
Köýnegimi etdi öl.
Gök asmanyň ülkeri,
Aý-ýyldyzly Yssyk köl.

Daşyny gurşap daglar,
Oba eltýär daglyk ýol.
Synlasaň, göwnüň çaglar,
Ak arzuwly Yssyk köl.

Ene sugunly kenar,
Gör olary, synla gel!
Jennet sapaly Diýar,
Ak gülşenli Yssyk köl.

Şahynda ak sallançak,
Ene Bugu! Meger şol.
Myhmana açýar gujak,
Güler ýüzli Yssyk köl.

■ TÜRKMEN «GÖROGLUSY», GYRGYZ «MANASY»

Bir derýanyň suwun içen, megerem,
Ikisi-de bir daragtyň şahasy.
Bir-birine sazlaşyp dur şygyram,
Türkmen «Göroglusy», gyrgyz «Manasy».

Jygalybeg, Ýakup baýyň derdi bir,
Daglary sarsdyrmyş olaň nalasy.
Iki halkyň Alp gerçegi, merdi bir,
Türkmen «Göroglusy», gyrgyz «Manasy».

Gojalykda gujagyna dolanda,
Gudrat bolup, dünýà inen balasy,
Towsaklady ýaşululaň elinde,
Türkmen «Göroglusy», gyrgyz «Manasy».

Iki epos, bir bitewi, bir göwre,
Düýp özeni meňzeşdir oň manysy.
Nurly şuglasyny saçyp dur döwre,
Türkmen «Göroglusy», gyrgyz «Manasy».

Annatuwak KAKAÝEWA.

Категория: Goşgular | Просмотров: 381 | Добавил: Нawеran | Теги: Annatuwak Kakaýewa | Рейтинг: 3.0/1
Awtoryň başga makalalary

Goşgular bölümiň başga makalalary

«В янтарном забытьи полуденных минут…» / Goşgular - 01.02.2023
Bagbanym / Goşgular - 06.01.2023
Февраль / Goşgular - 31.01.2023
"Yhlas bilen ak tozgañy seçeläp..." / Goşgular - 11.02.2023
Sestra derýasy / Goşgular - 29.01.2023
«Месяц серебряный смотрится в волны морские…» / Goşgular - 11.01.2023
«Как некий юноша, в скитаньях без возврата…» / Goşgular - 07.02.2023
Kalbyň ýaz, läläm / Goşgular - 01.01.2023
Сочувственное послание Сарре, графине Джерсей, по поводу того, что принц регент возвратил ее портрет м-с Ми / Goşgular - 10.01.2023
Ýeller, maňa yşk hakynda aýdaýyň! / Goşgular - 06.01.2023

Teswirleriň ählisi: 1
0
1 Kokos  
Annatuwak gelje, saýtda özüñizem bar ekeniñiz. Goşgularyñyzy paylaşsañyz, bizem okasak smile

Teswiri diňe saýta agza bolan ulanjylar goşup bilýär.
[ Agza bol | Saýta gir ]