Sansyz belaga

SANSYZ BELAGA

Köñlümni berdim bir biwepaga,
Köýdi ýüregim jebri-jepaga.

Eý näzeninim, maña rehim kyl,
Galdym sen diýip sansyz belaga.

Bimary-yşkyñ boldum neter men,
Ne çäre eýleý jebri-jepaga.

Peýkamyñ oky degdi ýürege,
Barmy dogalar uşbu ýaraga?

Dünýede çekdim men ahy-zary,
Sabyr kylawer uşbu jepaga.

Zalym rakyplar bigäne kyldy,
Eýle terahhum men binowaga.

Andalyp sen diýip geçer janyndan,
Kylgyl enaýat müflis gedaga.

■ IKI GAŞGA

Piri-mugana bende bolup, pendin algaý men,
Bu nowg birle dehr era şaýysta bolgaý men,
Uşşak mezhebide ýok erse uýalgaý men,
Mährapga ne parz ki men sežde kylgaý men,
Kyldygymdyr sežde men ol iki gaşga.

Baksam dolar gözümge sireşk ol kuýaşga,
Ýokdur ýüzüñ nazarda gözlerim doldy ýaşga,
Zulmuñ zyýada boldy meni-dilharaşga,
Zülpüñ hyýaly düşgeli şuryda başga,
Gam başga öldürer meni hijran başga.

Tutdum özümge dehr işigide hüýrümni,
Itler bile sypalydan içdim nagymny,
Zar agladym köñülge salyp ençe bimni,
Istegimni gan görüp diýdi görgül ýetimni,
Burny ganady, agzy ýetişgende aşga.

Boldy zyýada yşk ody köýdürgeli meni,
Ýok rehm birle bir kişi gaýgyrgaly meni,
Zülpüñ belasy gahr ile ýazgargaly meni,
Gaş-gözüñ talaşadyr öltürgeli meni,
Öldür meni, goýma ikewni talaşga.

Ol Andalyby hasta men zara ogşady,
Fersuda jesm gam ýüki astyda gowşady,
Uşşak oduny rast surudyda başlady,
Jamy bir ah çekdi anyñ köñli ýumşady,
Ahym oduny gör, ne eser kyldy daşga.

Nurmuhammet ANDALYP.