04:40

Päk dowamatyñ ýaraşygy / hekaýa

PÄK DOWAMATYÑ ÝARAŞYGY

Günüň howrunyň gaýdyşanyna göz ýetiren Annadursun ene pensiýasyndan alan kemputdyr kişmişlerini täzeje ýelýyrtana düwüp, agtyk gyzynyňka ýola düşdi. Içindenem “Iki köçe aňyrda ýaşabam, heý, bir aýlap gara bermän oturyp bormy?” diýen pikir bilen gelýän öýüne nädip ýeteninem bilmedi. Ony gudasy Gözel daýza hemişeki hoşamaýlygy bilen garşy aldy:
- Annadursun guda geleweri, içiň-daşyň saglykmy?
- Edenine şükür, bir mydar bardyr. Özüňiz sag-gurgunlykmy? Biz-ä bir aý bäri gara bermedik gyzyň gara gözüni göräýeli diýip gelendiris.
- Tüweleme, Gülälek jan öz otagyndadyr. Şu günler agtyjagym Oraz jan ýoňlap, barymyzyň iki aýagymyz bir gonçdadyr. Hany, men ony çagyraýyn. Oraz jany özüm üwrärin.
Gözel daýzanyň habary bilen Gülälek dessine enesiniň ýanyna geldi. Ol enesinden öýleri, ejesi dagyň ýagdaýy hakynda sorag bermäge durdy:
- Ene özüň geläýdiňmi? Ýagdaýlaryň ýagşymy? Ejem dagam oňatmy?
- Sen gelmeseň özüm geläýerin. Balam, ýa-da ötüki Gözel seni goýberenokmy? –
diýip, Oguldursun ene Gülälege syrly nazaryny dikdi. Gülälek enesiniň soragyna myssa ýylgyrdy. Ol:
- Wah, enem jan, balalarynyň üstünde janserek enem. Öňem aýdýana hiç kim maňa atam öýüme gitme diýmeýär. Ýöne çagalarym bilen başagaý bolaýýan käte. Ýoňlasalar-a bar onda. Diňe ýassyga başymy goýanymy bilýän birem hä diýmän daňyň atanyny – diýip, enesiniň käsesine demini
alan çaýdan guýdy. Şol pursat eneli gyzyň gürrüňini öýde myhmanyň bardygyna üns bermedik Begenjiň azymlyrak sesi bozdy:
- “Gülälek, meň portfelimi nirde goýduň. Hälden bäri ýer ýykyp tapamok”.
Begenjiň bu bolşy ozalam içini gepledip oturan Oguldursun enäň ikirjiňlenmeleriniň üstüne urna boldy. Ol agtygy bilen hoşlaşyp, öýüne geldi. Eşiklerinem çalşyrman gapböwürde duran sandyga arkasyny diräp oýa batdy. “Bää, gyzyňy berdiň eliňi çekem-ä” diýipdirler. Onda-da ýürek-dä. Hemme diýeniňi edäýýämi näme?!” diýip, oturşyna gelni Hallygözele içini dökdi:
- Hallygözel jan diýýän-ä, Begenç Gülälek jana gatyrganýan eken. Ýaňy öýlerindekäm eşidäýdim.
Öz gaýynenesine belet Hallygözel:
- Enesi, näme, Sonaň agtygyna gygyrylsa bolýa-da, Oguldursunyň agtygyna gygyrmaly dälmi? - diýip, öz işleri bilen gümra boluberdi.
Oguldursun ene: “Wah, arzyňy kime aýtdyň diýsene, heýem ýatdan syrdaş bolarmy” diýip, daşaryk çykdy.
Aslynda Annadursun ene diýseň mylaýym, eli çeperlikde, dili süýjülikde öňüne adam geçirmeýän tüýs “Eden işi gülpäpe” diýilýän zenanlardan. Ýöne juda sadalygy, balalarynyň üstünde kökenekligi ony biraz yňra ýaly görkezýär. Dogumyna bäs gelip bilmeýşi ýalam ýene öňküligine dolanyp gelmegi başarýar. Onuň bu bolşuny maşgalasynda hiç kim ýazgarmaýar, göwnüne-de almaýar. Gaýtam onuň bu bolşuna begenýärler. Käbir sözlerine degişýärler.
Maşgalanyň üçünji gyzynyň durmuşa çykýandygy sebäpli, Eneşdir Gülälek dilleşip, toýuň öňüsyrasy atasy öýlerine geldiler. Agtyklarynyň gelmegine sabyrsyzlyk bilen garaşan Annadursun ene adaty endigine görä, gelinlere dürli-dümen tagamlary bişirdip başyna gaý bolup ýör. Otagyň merkezinde uzaboýuna ýazylan saçagyň üstündäki tagamlary görmäge bolsa göz gerek. Hatda çaýam demlenip basyrylyp goýlupdyr. Iýilip içilenden soňra Annadursun ene durmuşa çykjak gyzyň sepini – bukjasynyň taýýarlygyna esewan etdi. Ol gyzlaryň “Ene, özümiz ederis. Sen diňe seredip oturyber” diýen sözlerine pisint etmän, gözüne äýnegini dakynyp, el keşdesi lowurdap duran donlaryň jähegini çalmaga başlady. Arasynda-da myhman gelen gyzlaryna sowal baryny berdi:
- Eneş jan, oglum, gürrüň berip otyr. Amanjahan guda nähili?
Eneş enesiniň özlerine ýakymly täsir edýän sözlerini eşitmek gürrüňe başlady.
- Ýagşy ene, ýöne birazajyk gysygrak diýäýmeseň.
- O nähili gysygrak bolýa, gyz?
- Aý, hemme zady gysganýar menden.
- Meselem, esasan, nämäni gysganýar?
- Ogluny gysganýar, ene!
- Ýogsa-da, gabansa gabansyn, gyz. “Gargaň gaz çagasy, her kimiň öz çagasy” diýipdirler. Waý-waý, senem şony göwün eden bolýaňmy? Heh, jürtmek ýaly ogluna derek boýly gyzym-a beýlesine geçirdi.
- Ene, beý diýmesene. Azat pälwan diýilýän ýigitlerden. Ne artykmaç ýeri bar, ne-de kem ýeri -
diýip, Eneş hezil edip güldi. Ol sowalynyň jogabyny eşitmek üçin enesine maý berdi. Arasynda-da uýasy Gülälege “Diňle” diýen terzde gaş kakdy. Oguldursun ene giýew adynyň tutulanyny eşidip, endigine görä ýakasyny tutdy, soňam yzyna atylan ýaşmagyny bilen agzyny büredi. Ol:
- Waý, gürleme, gyz, gürleme. Ataň öýüňde giýewiň adyny tutup oturmak aýypdyr, toba! – diýip, bu sözleri erkek göbekliniň hernä eşitmediginden howatyrlanyp, daş-töweregine seretdi. Soňra ýene-de elindäki işine üns berip, sözüni dowam etdirdi:
- Goýsana, balam, edil beýle däldir-le. Amanjahan guda biziň garyndaşymyz-a. Biz-ä onuň hiç haçan içimtaplygyny görmedik. Agyz, görýän welin, seňem syrçaň suw göterenok öýdýän.
Oguldursun ene gudasyny ýamanladasy gelmedi. Ol sözüni dessine beýleki agtygy Gülälege tarap gönükdirdi. Eneşe beren soraglaryny oňa-da tekrarlady. Gülälek bolsa, Eneşiň tersine öz gaýynenesini öwüp başlady:
- Ene, men-ä gaýnymy, Hudaýa şükür, senden, ejemden aýry göremok. Ol gaty dözümsiz, eli açyk. Hormat goýmagam, goýdurmagam başarýar. Tüýs süýji dilli, päk göwünli diýilýän ynsan-da.
Indi näme jogap berer-kä diýen nazarlaryň bary Oguldursun enäniň mähriban, nurana ýüzüne gönükdi. Ol biraz ekezlendi-de, jaýtyja burnuny bir gapdala öwrüp:
- Hmm, şeý diýsene. Balam, Gözelem bizden üýtgeşik däldir-le – diýip, özüne göwnüýetijilik bilen gepledi.
Gyzlar bu jogaba öz ýanlaryndan – enelerine duýdurman ýylgyrdylar. Onuň sadalygyna, sap göwünlidigine buýsandylar.
Ine, gyzyň göçüriljek güni gelip ýetdi. Otagynyň merkezinde daş –töweregine ýakym berip duran gyz sepi – bukjasy, onuň daşynda döwre gurap oturan gyz-gelinler “Bu ýere ýaz göçüp gelipdir” diýdirýär. Maşgalanyň päk dowamatynyň ýaraşygy bolan Oguldursun ene bolsa ozalam iki gyzy göçürendigine garamazdan, ýene-de tolgunmalara berlip otyr. Ol beýleki gyzlarda edişi ýaly ýuwaşlyk bilen agtygynyň ýanyna bardy we onuň alnyndan öpüp, ak pata berdi:
- Baran ýeriňe haýyrly bol, balam. Niredekä diýip gözletme, islenmedigi sözletme. Alnyňy Hak açsyn!
Oguldursun enäniň ak patasy gyzlarynyň ak bagtyna berilýän patady. Ol enesinden miras galan bu ajaýyp dilegleri, indi öz agtyklaryna geçirýärdi.
Ugradanyň ugur alsyn, Oguldursun ene. Seniň görüm-göreldäň indiki nesilleriňe-de nusga bolup, türkmen maşgalasynyň sarsmaz päkligini ebedilik saklasyn.

Gurbanjemal ANNAKOWA.
Категория: Hekaýalar | Просмотров: 444 | Добавил: Мylayym | Теги: Gurbanjemal Annakоwa | Рейтинг: 4.0/2
Awtoryň başga makalalary

Hekaýalar bölümiň başga makalalary

Haýsy gowy? / Gündogar hekaýaty - 05.03.2024
Pedofiliň ölümi / nowella - 04.01.2024
Kyrk ýyldan soñ gaýdyp gelen şol aýazly gün / hekaýa - 19.01.2024
Ahmyryň awusy / hekaýa - 13.01.2024
Surat / nowella - 14.03.2024
«Daglaryň ruhy» / hekaýa - 07.03.2024
Umyt – bu dem / hekaýa-esse - 26.01.2024
Ýolagçy / hekaýa - 12.01.2024
Mertlik hemme kişä berilmeýär / hekaýa - 16.01.2024
Başky söýginiñ müşki / hekaýa - 04.01.2024

Teswirleriň ählisi: 0
Teswiri diňe saýta agza bolan ulanjylar goşup bilýär.
[ Agza bol | Saýta gir ]