Rubagylar

RUBAGYLAR

“Şygyr äleminiň iň beýik dagy,
Kimkä?” diýip, biri soraýsa dagy,
Bir agyzdan jogap berer adamzat:
Beýik Pyragydyr, beýik Pyragy!”

***

Ol Hakdan içipdi, (biz bolsa ýapdan),
Joşgun dyňzap, “sözledipdi her bapdan”,
Ol hakda gürleýän, ýazýan kän arman,
Beýik Magtymgula düşünmän düýpden.

***

Goý, aýdym şekilli, şekilsiz bolsun,
Emma, manyly hem ýakymly bolsun,
Esasy zat: dana bolsun diňleýji,
Aýdyjy ussat hem akylly bolsun.

***

Eý durmuş, men neneň söýmäýin seni,
Bir tarapyň şahyr, bir ýanyň bagşy,
Eýläň—elwan güller, beýläň—gözeller,
Şu dört zat dälmikän dünýäniň nagşy.

***

Türkmen şygyrýeti ussatlara baý,
Men olara hormat goýup gezerin,
Emma, olaň hiç birine öýkünmän,
Men goşgymy özümçeräk ýazaryn.

***

Indi körzehinler “şahyr” bolup ýör,
Garaçomak bary Tahyr bolup ýör,
Zehini daş ýarýan guýmagursaklar,
Ýüze çykyp bilmän pahyr bolup ýör.

***

Şahyryň-da ýazman gezýän wagty bar,
Şahyrlykdan “elin üzýän” wagty bar,
Boşap galan kalba täze güýç toplap,
Hyjuw bilen dynman ýazýan wagty bar.

***

Dözümli daramaň setirlerime,
Olar meniň jigerimdir, janymdyr.
Men däldirin şygrymdaky “Men” diýýän,
Ol meniň liriki gahrymanymdyr.

***

Utanman, münberde köp durup bilseň,
Öwgi baryn dilden sypdyryp bilseň,
Saňa “tüýs dilewar” diýjeklerem bar,
Illerden artygrak çypdyryp bilseň.

***

Meni öňden tanaýanlar, bilýänler!
Bu görýänňiz men däl, ýagşy esediň,
Ölsem-de, ýük edip süýräp ýörenim—
Heniz ölüp gutarmadyk jesedim.

***

Öz-özüňe nazar salmagy başar,
Öz kemiňi özüň bilmegi başar,
Käte-käte öz-özüňi sud edip,
Özüňden hasabat almagy başar.

***

Şükür, böwrek iýdim “pök-pök” etmedim,
Dalak iýdim, emma, “tak-tak” etmedim,
Nebsime erk etdim Pyragy kimin,
Böwen çişik kimin “güp-güp”etmedim.

***

Boljak işler bolup dynsa kem däldir,
Öljek hassa ölüp dynsa kem däldir,
Aýrylyşjak aýal bulanyp ýörmän,
Talak hatyn alyp, dynsa kem däldir.

***

Kimleriň sakgala ýüzi gelşenok,
Kimiň ýuwan, suwjuk sözi gelşenok,
Kim bütinleý mynasyp däl sakgala,
Onuň tutuşlygyna özi gelşenok.

***

Bir akyldar şeýleräk söz diýipdir:
“Nadanlara akyl satmak haýypdyr”
Emma, köp zat bilýän danalara-da,
Nadan bilen ýaňkalaşmak aýypdyr.

***

Girelim bäri men dünýäň çetinden,
Gepden gaçyp, galdym kän-kän nepimden,
Etsem-de il-güne diňe ýagşylyk,
Gutulyp bilmedim iliň gepinden.

***

Bagşy bar kükräp, haýkyryp aýdar,
Bagşy bardyr uwlap, waýkyryp aýdar,
Hakyky bagşylar berk guşap bilin,
Çyny bilen “ýele tüýkürip” aýdar.

***

Köp zat gördük: gyş hem ýaz gabat geldi,
Garga dönüp giden gaz gabat geldi,
Etmiş edip, ýene Alladan görüp,
Özünder görýänler az gabat geldi.

***

Altmyş ýaşda has-da berkärmiş köki,
Eger çynar bolsa ömür nahalyň.
Ýokuş degýär eken oýundan çykmak,
Ýaňy ussatlyga ýeten mahalyň.

***

Gözel köp-de, göwne ýarar dilber gyt,
Owadan daşlar kän, emma göwher gyt,
Az däl alym, bagşy, şahyr-ýazyjy,
Emma, sözleri dür, akly jöwher gyt.

***

Adam ýamanlamak, ýa gep içirmek,
Erki gowşak, pes adamyň işidir.
Emma oňa güpbe ynanýanlar hem,
Pöwhe, nadan, yňdarma bir kişidir.

***

Dünýäni gülzarlyk edýän aýal bar,
Jenaýatdyr, zorluk edýän aýal bar,
Ýeri gelse är işini bitirip,
Merdanalyk, ärlik edýän aýal bar.

***

Ýaýnamadym, ýaman geldi howasy,
Bişip ýetişmedim, güýze galdym men;
Deň-duşlarym ýetdi arzyly pellä,
Ýüküm agyr boldy, yza galdym men.

***

Tämizi diýr, çekseň çydamsyz derdi,
Naçarlama, bolgun mertleriň merdi,
Sensizem bu heňňam aýlanyp durdy,
Dünýe ýetim galmaz öleniň üçin.

Pygamberguly GURBAN TÄMIZI.[

2000-2005 ý.