Şahyrlaryñ aýdyşygy

ŞAHYRLARYŇ AÝDYŞYGY

Döwrangeldi Agalyýew:

— O nämedir, ýalkym saçar zer ýaly,
O nämedir, joşa geti:r derýany,
O nämedir, älem-jahan seýrany?
Şahyr bolsaň, şondan bize habar ber.

Akmyrat Rejebow:

— Ol bugdaýdyr, ýalkym saçýar zer ýaly,
Ol tolkundyr, joşa geti:r derýany,
Ol arzuwdyr, älem-jahan seýrany,
Bizden salam bolsun, jogap şeýledir.

D. Agalyýew:

— O nämedir, çöl içinde köl bolan,
O nämedir, sähra nagyş-göl bolan,
Agşamlarna şugla saçyp köz bolan?
Şahyr bolsaň, şondan bize habar ber.

A. Rejebow:

— Ol köl — «Altyn asyr» Türkmen kölüdir,
Täze oba sähraň nagyş-gölüdir,
«Garagum ýalkymy» alaw közüdir,
Bizden salam bolsun, jogap şeýledir.

D. Agalyýew:

— O nämedir, açylyp dur gül ýaly,
O nämedir, nura beslär dünýäni,
Ol nämedir ynsanýetiň binýady?
Şahyr bolsaň, şondan bize habar ber.

A. Rejebow:

— Ol göwündir açylyp dur gül ýaly,
Ol döwürdir nura beslän dünýäni,
Ol ömürdir adamzadyň binýady,
Bizden salam bolsun, jogap şeýledir.

D. Agalyýew:

— Ol nämedir, toý-baýramda çalarlar,
Bagşy-sazandalar ele alarlar,
Owazyna ganman gulak salarlar?
Şahyr bolsaň, şondan bize habar ber.

A. Rejebow:

— Ol dutardyr, toý-baýramda çalarlar,
Bagşylarmyz joşup ele alarlar,
Owazyna ganman gulak salarlar,
Bizden salam bolsun, jogap şeýledir.

D. Agalyýew:

— O nämedir, jana geler tebigat,
Ol nämedir, ynsanýete ybadat,
Ol nämedir gülleýişden alamat?
Şahyr bolsaň, şondan bize habar ber.

A. Rejebow:

— Bahar pasly jana geler tebigat,
Ol Watandyr, ynsanýete ybadat,
Bagtyýarlyk gülleýişden alamat,
Bizden salam bolsun, jogap şeýledir.

D. Agalyýew:

— Haýsy ýurtdur, rowaçlygyň Watany,
Özgerişi haýran edýän jahany?
Ak mermerli binalarnyň hatary,
Şahyr bolsaň, şondan bize habar ber.

A. Rejebow:

— Türkmenistan — rowaçlygyň Watany,
Özgerişi haýran edýär jahany,
Barha artýar binalaryň hatary,
Bizden salam bolsun, jogap şeýledir.

D. Agalyýew:

— Ol nämedir, ýurda ýaň salýan şowhun,
Ol nämedir, gökde atyp dur owsun?
Arkadaga şöhrat bolsun, şan bolsun!
Şahyr bolsaň, şondan bize habar ber.

A. Rejebow:

— Garaşsyzlyk toýy — ýaň salýan şowhun,
Ýaşyl Baýdagymyz atyp dur owsun.
Eziz Arkadaga şan-şöhrat bolsun!
Bizden salam bolsun, jogap şeýledir.