Şatlyk paýlananda, gam paýlananda...

Şatlyk paýlananda, gam paýlananda,
Meň kalbyma gam düşüpdir bol-telki.
Şu gün — täze ömrüň ilkinji güni,
Ýa ömrümiň soňky günüdir belki.

Gije birmahalky gijä meňzänok —
Tutuksy. Garaňky. Alanok erki.
Şu gün — täze ömrüň ilkinji güni,
Ýa ömrümiň soňky günüdir belki.

Duýgulary gorjamaga sebäp ýok,
"Aglara agy ýok, gülere — gülki".
Şu gün — täze ömrüň ilkinji güni,
Ýa ömrümiň soňky günüdir belki.

Bu duýgy umydyň şuglasy ýa-da
Ertirimiň elhenç tümüdir belki...
Şu gün — täze ömrüň ilkinji güni,
Ýa ömrümiň soňky günüdir belki.

24.02.2019ý.    22:28

Sapa Hommadow.