Ýaraly duýgular

ÝARALY DUÝGULAR

Swetofor ýaşyl yşygyny ýakanda geçesim gelenok...
Bilgeşleýin...

* * *

Hümürdäp aýdylan aýdymlar ýarpy galýar...
Bilgeşleýin ýoýup aýdýan...
Skripkamyñ sesi-de öñküsi ýaly däl...

* * *

Öñler ýekşenbe günleri tebigat, daş-töwerek, it-pişikler, guşlar, delfinler, deñiz, gury ýer, köl, dereler hakda ýazardym...
Köp wagt bäri gezek ýetenok...
Syýasy partlamalar şeýle bir gazaply bolýar welin, ýüreklerimiz ürken serçeler ýaly aýnalara urla-urla çyrpynýas...
Şygyrlar manysyzlaşdy...
Bilgeşleýin başy bilen ortasyny ýatdan çykarýan...

* * *

Hiç kimse öñküsi ýaly gülenok...
"Saýrylaşdyrma" ýalany astynda saýrylaşdyrlan kimliklerimiz ýüzümizde şatlyk uçganaklarynyñ ýerine yzgytsyz şekiljikleri döredýär...
Gussa bar roýumyzda...
Salamlarymyz ürkek...
Sowallarym düýrükdiriji...
Bakyşlarymyz nemli...

* * *

Men okyjylarymy uzakdan gelişlerinden tanaýan...
Göz göz kaklyşanda, bir-birimiziñ doglan wagtyny bilýän ýaly hamala... Entek ýüzüni görmedik "öýdäkilerimiziñ" hal-ahwalyny soraşýarys...
Bir köçede ylgan ýaly bir günde, bir wagtda, setirleriñ arasynda ýa-da iki setirlik bellikde biri-birimiziñ ganaýan dyzyny gujaklaýas...
Gujaklaýas...
Soñky günlerde biri-birimizden gözümizi sowýas...
Bir seredýäs, aglan ekenik...
Soñra bir-birimiziñ aýasyna galdyran ýekeje parça umydy ýüreklerimize basa-basa hoşlaşyp arany açýas…

* * *

Kämahal dünýä suw-sil, ýagyş, palçyk, harasat bolsa-da, "Howa nähili gowy" diýýän...
Bilgeşleýin...
Sizem diýiñ...
Ýaraly duýgularyñyzy saramak lazym...

* * *

Näme etjek bolýañyz?..
Her jemgyýetiñ özüne meñzeşini tapyp-tapyşdyrýandygy nädereje dogry bolýan bolsa...
Tebigatyñ bize ýalan sözlemeýändigi-de gümansyz hakykat...
Hatyrjem boluñ...
Ol bahar hökman geler...

Bekir JOŞKUN.

"SÖZCÜ" gazeti, 06.04.2014 ý.