Ýetim oglanyñ monology

ÝETIM OGLANYÑ MONOLOGY

Dymmagy saýlaýan ilkinji gezek...
Ir säher oýanýan.
Ýerbe-ýer bar zat.
Göýä meň gözlerim şatlykdan doly.
Asmana garaýan, şeýle päkize,
Şonda-da göwnüme bir zat kem ýaly.

Ýuwunýan, ardynýan, garbanýan biraz,
Howlukman ugraýan okuwa sary.
Mähirli görüşýän deň-duşlar bilen,
Şonda-da göwnüme bir zat kem ýaly.

Gezelenje çykýan ýakyn-uzaga,
Synlaýan durmuşy, ýodany-ýoly.
Durmuş gyzgalaňda, ýol şüweleňde,
Şonda-da göwnüme bir zat kem ýaly....

Öýlendim, jaý gurdum, ulag edindim.
Daşyndan synlasaň, bar zat jem ýaly.
Çagalarym oýnap ýörler howluda,
Şonda-da göwnüme bir zat kem ýaly.

Kyblam atam!
Käbäm enem! –
Ezizlem!
Sizsiz bu durmuşym gury gum ýaly.
Ne ýaşlykda, ne ömürde many bar,
Ýürek gamdan doly, dünýe hum ýaly.
Bir uly kürsini eýeläp ýörün,
Şonda-da göwnüme bir zat kem ýaly...

2008 ý.

Sapa HOMMADOW.