Portugaliýanyñ Azor arhipelagynda 48 sagatda 1100 ýer yranmasy

PORTUGALIÝANYÑ AZOR ARHIPELAGYNDA 48 SAGATDA 1100 ÝER YRANMASY

Magnitudasy 1,9 bilen 3,3 ball aralygynda üýtgeýän ýer yranmalarynyñ 63-ni ýerli halk syzdy.

Portugaliýanyñ Azor arhipelagyndaky Sao-Jorge adasyndaky seýsmiki işjeñligiñ emeli hemradan alynan kartasy (Reuters)

Portugaliýanyñ Azor arhipelagynda kyrk sekiz sagadyñ dowamynda hasaba alynan azyndan 1100 sany kiçi ýer yranmasy degişli ýolbaşçylary gyssagly "adatdan daşary ýagdaý" meýilnamasyny güýje girizmäge iterdi.
Ýer yranmalarynyñ bolandygy şenbe güni öýleden soñ orta Atlantikadaky wulkaniki ada San-Žoržiden mälim edildi. Ygtyýarlylar ýerli halky howsala düşmezlige we resmi maslahatlara eýermäge çagyrdy.
Azor arhipelagynyñ "Civisa" seýsmo-wulkaniki gözegçilik merkeziniñ başlygy Kwi Markes duşenbe güni "Reuters" habarlar gullugyna ýer yranmalarynyñ ululygynyñ 1,9 bilen 3,3 ball aralygynda üýtgäp durandygyny aýtdy. "Lusa" habarlar gullugynyñ habar bermegine görä, bularyñ 63-ni ýerli halk bilipdir.
Markes ýer yranmalarynyñ köpüsiniñ adanyñ günortasyndaky Welas obasy bilen demirgazyk kenarýakasyndaky Fajã do Ouvidor-nyñ arasyndaky sebitde emele gelendiginj we häzire çenli hiç hili ýykgynçylyk döretmändigini aýtdy.
San-Žoržiniñ Urzelina wulkany iñ soñky gezek 1808-nji ýylda atylanam bolsa, Azorlar Raýat goranyş edarasy seýsmiki işjeñlikdäki artyşyñ geçen ýyl Ispaniýanyñ La Palma adasynda Kumbre Wýeha wulkanynyñ atylmagyndan öñ anyklanan ýer yranmalar tapgyryny ýatladandygy sebäpli sebitiñ wulkaniki gözegçilik merkezinden ýörite hünärmenleriñ pikiri soraldy.
Agzalýan ýere ýene iki sany seýsmiki-gözegçilik beket gurmaga toparyny ugradan "Civisa" bu pes ýygjamlykly ýer yranmalarynyñ yzyndaky sebäbini heniz anyklap bilmedi. Toparlar wulkaniki hereketiñ görkezijisi hökmünde ýer gazlaryny-a ölçemegi meýilleşdirýär.
"Portuguese American Journal"-yñ habar bermegine görä Markes "Ýagdaýy sypdyrman yzarlaýarys, ýöne bu krizisiñ nämä äkitjekdigi boýunça gutarnykly bir zat aýdardan heniz ir" diýdi.
Markes, "Şumat bu sistema boýunça endişämiz islendik işjeñ wulkanik sistema boýunça endişämiz bilen birmeñzeş. Elimizde seýsmiki krizise degişli işjeñ wulkaniki sistema bar. Yzarlamagy dowam etdireris" diýip, sözüniñ üstüni ýetirdi.
Beýleki bir ýandan Welas munisipalitetiniñ başlygy Luis Silweýra seýsmiki hereketlerden soñ öñüni alyş çäresi hökmünde gyssagly "adatdan daşary ýagdaý" meýilnamasyny güýje girizdi.
8 müñ 400-e golaý adamyñ ýaşaýan San-Žorži Azor arhipelagyny emele getirýän dokuz adanyñ biri.
Arhipelagyñ merkezi böleginiñ bir parçasy bolan San-Žoržide Faial we Piko ýaly turistik ähmiýetli ýerler bar.

Namita SINGH.

Çarşenbe, 23.03.2022 ý.