TÄZE TALAP - TÄZE HIL! Hormatly okyjylar! Mundan beýläk saýt iki adminstratoryñ gözegçiliginde dolandyrylar: @Moderator - ýagny, baş redaktoryñ ornunda saýtda paýlaşylýan eserleriñ hiline we ýazuw düzgünine gözegçilik eder; @Inžener - ýaş ýazyjy Rahman Zulfikarow, saýtyñ tehniki işleýşine we dizaýnyna jogapkär.
Saýtda dört agza hemişelik awtorlar toparynda galdyrylmaga mynasyp görüldi:
@Garaýolly - şahyr we halypa mugallym Şyhymyrat Abdyllaýew; @Garadag - şahyr, ýazyjy Sylapberdi Muhamow; @Gökböri - terjimeçi Guwanç Mämiliýew; @Geldimyrat - ýaşuly şahyrymyz Geldimyrat Seýidow.
Mundan başga-da ýagdaýlara we şertlere görä 5-10 agza myhman awtorlyga saýlanyp bilner.
(Bular öñki tertipde (diñe öz galamyndan çykan) eserlerini tölegsiz paýlaşyp bilerler. Hemişelik awtorlarymyzyñ sanyny 10-a ýetirmekçidigimiz üçin tanymal ýazyjy-şahyrlarymyzyñ ýene bäşisinden geljek seslenmelere garaşýarys. Şeýle-de, ýagdaýlara we şertlere görä, awtorlarymyzyñ düzümi azalybam, köpelibem biler).
Saýtda eseriñi paýlaşmak tölegli görnüşe geçiriler. Munuñ üçin ilki adminstrasiýanyñ salgysyna (haweranm@mail.ru) eseriñi ugradandan soñ, gözegçilikden geçendigi we saýtyñ talaplaryna doly gabat gelýändigi hakda oñyn jogabyñyzy alanyñyzdan soñ, görkezilen telefon belgä eseriñ göwrümine görä kesgitlenen nyrhda pul geçirmeli bolarsyñyz. Pul geçenden soñ eseriñiz saýtda okyjylaryñ dykgatyna ýetiriler.
Şu ýerde bir zady bilmegiñizi isleýäris. Tölegli görnüşe geçmek bilen maksadymyzyñ gazanç etmek däldigini, tersine; toplanan pullaryñ hasabyna talyplara we beýleki höwesjeñ göçürijilere el hakyny töläp çeper edebiýatymyzyñ saldamly eserlerini kompýutere geçirtmekdigini we olary gaýtadan giñ okyjylar köpçüligine ýetirmekdigini, dünýäniñ islendik künjeginden saýtymyza girmek elýeterlidigi üçin türkmen dilli edebiýatymyzy, edebi mirasymyzy dünýä ýaýratmakdygyny aýratyn belläp geçesimiz gelýär.
Göçürtmek üçin birinji göz öñüne tutýan materiallarymyz:
- Nargylyç Hojageldiýewiñ "Bagyşla ýarym", "Gülle degen sünbüller" romanlary; - Atajan Taganyñ "Saragt galasy" romany; - Ýazmyrat Mämmediýewiñ "Şapak" romany; - Sapargeldi Annasähet Iner oglynyñ "Ygrar" romany we powestleri; - Çary Aşyrowyñ "Ganly saka", "Lalyñ ogly", "Gökýaýlanyñ ýigitleri" poemalary we beýleki taryhy romanlary; - Esen Ataýewiñ taryhy romanlary; - Gylyç Kulyýewiñ taryhy romanlary; - Arap we Täşli Gurbanowlaryñ kyssa eserleri; - Türkmen tankytçylary Öde Abdyllaýewiñ, Abdylla Myradowyñ, Saýlaw Myradowyñ, Durdymuhammet Nuralyýewiñ we beýlekileriñ tankydy makalalary; - Lew Tolstoýyñ türkmen dilinde çap edilen köptomlugyna girizilen eserleriñ hemmesi we beýleki rus klassyklarynyñ türkmen diline geçirilen eserleri; - Magtymguly hakda ýazylan ähli çeper eserleri we ylmy makalalary; - Türkmen ýazyjylarynyñ we daşary ýurt edebiýatynyñ sowet döwründe we Garaşsyzlyk ýyllarynda türkmen gazet-žurnallarynda çap edilen hekaýalary, powestleri, romanlary, makalalary.
(Şu ýerde Sizi begendirip biljek ýene bir gowy habary dykgatyñyza ýetiresimiz gelýär. Nargylyç Hojageldiýewiñ Russiýanyñ arhiwlerine gatnap, azap çekip ýazan bäş tomluk "Gökdepe" taryhy epopeýasy kompýutere geçirilen görnüşde okyjylaryna ýetirilmegine garaşýar. Elbetde, munuñ üçin saýt Nargylyç aganyñ hossarlaryndan ilkinji bolup awtorlyk hukugyny satyn almaly).
Öz eserini ugradyp, saýtda okyjylara ýetirmek isleýänler üçin tölegleriñ möçberini häzirlikçe şeýdenimizde maksadalaýyk bolar pikir edýäris.
Bir goşgy üçin - 5 manat; Bir poema (3-6 word sahypalyk) üçin - 15 manat; Bir hekaýa (2-5 word sahypalyk) üçin - 15-20 manat; Bir powest üçin - 50-60 manat. Bir roman üçin - 150-200 manat.
Şeýle-de, islegler boýunça hem haýyşlary kabul ederis. Çeper edebiýatyñ muşdaklary okamak isleýän eserleriniñ adyny ýazarlar we munuñ üçin (eger islese) göçürijilere tölejek el hakymyza gatanç üçin görkezilen belgä pul geçirip bilerler. Unutmañ, Siziñ eden maddy kömekleriñiz, ýene Siziñ özüñize, tutuş il-günümize, çeper edebiýatyñ muşdaklaryna elýeterli ediljek eserler bolup gaýdyp barar!
Biz kän gezek göwrümli çeper eserleri göçürip ýa göçürdip, saýtda okyjylaryñ dykgatyna ýetirmek isledik. Az iş hem edilmedi. Bäş ýarym ýylyñ dowamynda (biziñ üçin kän wagt, emma ýetirilen eserleri az görýäris) Öwezdurdy Nepesowyñ "Uzak-uzak ýyllar", "Pyragy", "Zyýarat", "Kyýamat-magşara çenli", "Iñ soñky tomus", "Parlamentiñ synmagy", Tañryguly Taganowyñ "Magtymguly", Gowşut Şamyýewiñ "Ynsabyñ yzasy", Annatagan Nurgeldiýewiñ "Baýram han" romanlary, Annageldi Nurgeldiýewiñ birnäçe detektiw powesti, gyzy Enejan Hydyrowanyñ ýardam etmeginde satirik ýazyjymyz Gurbangylyç Hydyrowyñ hekaýalary, Baýramgeldi Çaryýewiñ dürli ýyllarda gazet-žurnallarda çap edilen makalalary öz tagallalarymyz bilen saýtda paýlaşyldy. Ýöne bu zatlar köp wagt we köp zähmet talap edýän irnik iş. Işimiziñ daşyndan şu depgini gowşatman dowam etdirmek mümkin däl. Talapkär okyjylarymyz bolsa saýtyñ gorunyñ üstüniñ ýetirilip durulmagyny isleýär. Şonuñ üçin höwesjeñ göçürijileriñ el haky berlip höweslendirilse, depgini hasam güýçlendirip bolar diýip pikir edýäris. Munuñ iñ gowy mysalyny žurnalist Döwran Agaly iş ýüzünde subut edip görkezdi. Döwran aga belli ýazyjy Osman Ödäýewiñ aýalynyñ hemaýatkärlik etmeginde göçürijiniñ el hakyny töläp, onuñ öñ çap edilen we edilmedik hemme eserlerini kompýutere geçirtdi we şahsy hasabyna 34 tomdan hem agýan köptomluk edip çykartdy (eserleriñ aglaba bölegi saýtda paýlaşyldy). Biz uly ýazyjylarymyzyñ edebi mirasyny toplamak bilen bu asylly işi dowam etdirmek isleýäris.
Ýokarda bellenip geçilenler, entek başlangyç teklipler. Kimiñ näme teklibi bolsa, bir hepdäniñ dowamynda teswirlerde ýazyp biler. Näme edende has gowy bolar, näme edenimizde has köp eserleri il-halkymyza, giñ okyjylar köpçüligine elýeterli edip bileris? Bilelikde maslahatlaşyp, iñ gowy netijä gelmek Size bagly, mähriban okyjylar!
Bir hepdeden soñ aýdylan tertibe geçeris. Teklipleriñize garaşýarys.
Saýta reklama alsaňyz, has amatly bolaýmasa. Töleg töläp eser paýlaşjak awtor tapylar öýdemok, tapylaýan ýagdaýynda-da örän az bolar, ondan gelen girdeji bir kitap göçürtmäge-de ýetmez öýdýän. Näme etseňizem şowly bolsun.
Manitizasyýaň başgarak görnüşleri hem bar. Mysal üçin öz materýallaryny ýerleşdirýäne we saýtyň adminstrasyýasyna hem girdeýji bolar ýaly. Ýöne saýty başga platforma geçirmeli bolýar. "Awtortoday" platformaň mysalynda bir zatlar etseň bolmagy mümkin? Awtorlar öz materýallaryny çap edýärler we käbir materýallary okajak bolsaň tölegli, ýa-da belli belli awtorlara abuna ýazylmaly, şol bir bada materýallary PDF görnüşde satyn alyp bolýar. Garaz ugryna çyksaň her tüýsli zatlar etseň bolýar, ýöne biziň "Kombinatymyz" azajyk gabanjaň-da, ösüberseň känbir halanok...))))
Atajan Tagan - "Saragt galasynyň" üstünde işläp, romanyň adyny "Gowşut han" etdi. Ony elektrona geçirdip yörmegiň geregi yokmuka diyyän. Gaytam gojanyň öz yanyna baryp, puly şoňa berseňiz (gonorar hokmunde) hem-de ozunden elektron wariantyny we rugsadyny alsaňyz, has gowy bolar.
Öwezdurdy Nepesden "Döwletbaşy" romanyny alyp bilseňizem gyzyklanma bilen okardyk.
* * *
Sanawa Taňryguly Taganyň Magtymguly hakdaky romanyny goşubam oňarypsyňyz. Pyragy hakda henize çenli yazylan iň saldamly iş hasaplayan şony özüm-ä.
* * *
Baba Annanowyň "Kärizgen" powesti hem-de hekayalary hem elektrona geçirilmeli. Okyjylar ne gözel eserlerden, guyçli aktyoryň zehinli yazyjy bolanlygyndan bihabar
Az-maz üýtgedilip, "Saragt galasynyñ" "Gowşut han", "Pereñli ýesiriñ ýatlamasynyñ" "Keseki" edileninden habarymyz bar. Soñky üýtgedilenlerden öñki wersiýalaryny has saldamly görýäris.
* * *
Hökman däl. Geregi çyksa, ýaşulyñ özünden alarys.
* * * "Döwletbaşy" saýtda berildi. Okap bilersiñiz.
* * *
Sanawa goşamzok. T.Taganowyñ "Magtymgulysynyñ" saýtda öñ berilendigini aýdýarys.
* * *
Baba Annanowyñ ýazyjylygyndan okyjylar bihabardyr öýdemok. Diñe sowet döwründe däl, Garaşsyzlyk ýyllarynda hem onuñ hekaýalaryny "Edebiýat we sungat" gazeti yzygiderli çap edip geldi. http://kitapcy.ru/news/salpygulak/2019-07-27-7716 Ol hakda ýazylan ýatlamalarda, makalalarda hem bu barada agzalyp gelindi.
Salam hemmelere. Menem çap ediji bolup işleyän. Eger sayta gerek bolsa menem tölegsiz çap etmeli eser bolsa ederdim. Çünki saytdan okap peydalanýan zadymyz juda kän.
Göçürtmek üçin birinji göz öñüne tutýan materiallarymyz: - Nargylyç Hojageldiýewiñ "Bagyşla ýarym", "Gülle degen sünbüller" romanlary; - Atajan Taganyñ "Saragt galasy" romany; - Ýazmyrat Mämmediýewiñ "Şapak" romany; - Sapargeldi Annasähet Iner oglynyñ "Ygrar" romany we powestleri; - Çary Aşyrowyñ "Ganly saka", "Lalyñ ogly", "Gökýaýlanyñ ýigitleri" poemalary we beýleki taryhy romanlary; - Esen Ataýewiñ taryhy romanlary; - Gylyç Kulyýewiñ taryhy romanlary; - Arap we Täşli Gurbanowlaryñ kyssa eserleri;
Emma, bularyň barysy hem internetde başga saýtlarda bar ahyry, olary täzeden göçüriip bu ýerde goýmagyň näme manysy bar?
* * *
Meniň pikirimçe, Siziň saýta eser goýmakçy bolýanlardan töleg aljak bolmagyňyz nädogry we bu ýagdaý saýta gatnaşyjylaryň azalmagyna getirer. Sebäbi, olaryň köpüsi goýulýan eserleriň awtory däl we olar şundan hiç-hili maddy haýyr görenok. Meselem, ine ýokardaky Akjemal näme üçin şu taýyk kitap goýany üçin özi çykdajy etmeli, gaýta tersine zähmedi üçin oňa tölense dogry bolaýjak ýaly)). Garaz, tölegli bolsa hiç kim şeýtmez we saýtda kem-kem materiallar hem-de netijede okyjylar azalar. Şonuň üçin, ýokarda bellenişi ýaly saýta reklamaçylary çekseňiz we umuman beýleki saýtlaryň iş tejribesini öwrenip, şeýle işleri ýola goýsaňyz dogry bolardy diýip, pikir edýärin.
Bularyñ barsy öñ goýlan bolsa skanirowat (fotokopiýa) edilip goýlandyr, elde ýygyp goýulanok. Ýagny, hiç biri-de göçürilmedik. Şoña görä hem olary elektron kitaplar hasaplap bolmaýar.
* * *
Üns beriñ: biz saýta öz eserini goýmakçy bolýan awtorlardan töleg almaly bolarys diýýäris we onam nämä sarp etjegimizi, ýagny göçürijiniñ zähmetine pul tölejekdiginizi aýdýarys, indi goýulýan eserleriñ awtorlaryndan başgalara eser paýlaşmak mümkinçiligi aradan aýryldy. Düşünmez ýaly zat ýok. Agza sany azalsa azaldygy bolar, paýlaşylýan bloglaram şeýle, "az bolsun, uz bolsun", biz öñem sana kowalaşmadyk, indem kowalaşmarys.
Saýtyñ eýesi pul ber diýse, bermeli bolar-da (asyl ol girdeji hiç zada ýetmejegini köplere düşnüklem bolsa) yogsamam zadyñy berenok. Saýt öziniñki haky bar-dyr-a?!
Umuman köpçüligiñ pulsuny barlamak, kimiñ näme diýip, kimiñ nähili hyşy-wyşy etjegini, kimleriñ kireýsiz kilim kakyp okyjylar köpçülugine muzdasyz hyzmat etjegini-etmejegini ýa-da özlerine ýazyjy-şahyrdyryn öýdüp ýören soñky birtopar ösdürimleriñ aslynda gep-gybatdan başga zat bilen işleriniñ ýokdugyny bilmek üçin saýtda şular ýalyrak feýk maglumat ýazyp goýaýmak gerek eken. Garşylaşan manzaram öñden garaşyşymdanan beter, sözüñ doly manysynda fiasko boldy!
* * *
Asyl-ha saýtdan pul gazanmak niýetimiz bolmady. Indem bolmaz. "Pul bermeseñ, zadyñy çykarmaýan edipdir" diýip, kesesinden hyşy-wyşy edip ýañsylap ýörenleriñem çeper edebiýat diýilýän mukaddes dünýäniñ adamy däldigini, ýazyjy-şahyr-a asla däldigini ýene bir mertebe göz ýetirdik.
* * *
Şu blogy goýanymyzdan soñam saýtyñ meniñ nukdaýnazarymdan ygtybarly hasaplaýan agzalarymyz salgymyza goşgularyny ugratdylar we olary gepsiz-gürrüñsiz paýlaşyp geldik. Agza bolmasa-da başgalar ýa biziñ özümiz tarapyndan eserleri paýlaşylýanlaryñ hemmesi gaçyp gitdi. Gaýtam gepimizi etdiler, pul bermelimi indi diýip. Bize entek ömründe bir gezegem ýüzbe-ýüz duşup ýa iş salşyp, ýagşy ýa ýaman tarapymyzy gözi bilen görmedik ýa-da bütinleý tersine: güler ýüzüñ bilen öýüñe çagyran, duz-emek bolan adamlaryñ oñ-muñ gepi bilen bize gaýybana häsiýetnama berip bilýärler. Aglajakmy, güljekmi. Nähili düşünjesiz, telper, arzan adamlar eken... Haýp. Şu ýurtda okyjydan pul alyp däl-de, okyja pul berip eseriñi okadyp bilseñem zor boldugyñdygyny bilmeýäniñ döredijilik adamsydygyna şübhäm bar.
* * *
Dünýäde gowy adamlaryñ sanyça erbet adamlaryñ hem bardygyny-bolmalydygyny bilýän, ýöne göwnüme bolmasa biziñ ýaly kiçijik halka bular ýaly zibiller - onda-da halky agzyna garatmaly sowatly adamlaryñ arasynda has köpmükä diýýärin. Käbirleriniñ ýüzüni görmek beýlede dursun, ady tutulsa añryñ bäriñe gelýär. Olar ýok ýaly ýaşamak, olary hasap etmezlik, öz tutan dogry ýoluñda dogry işleri etmek nähili gowy. Ile peýdañy ýetirmeseñem, iñ bolmanda adama, diliñi, zyýanyñy ýetirmän gezmek şeýle kyn bolarly.
* * *
Bu saýta, biziñ salgymyza oklanmadyk çüý, zyñylmadyk kesek galmady. (Hemme yzasy biziñ synamyzda we şeýle bolmagyna diñe özümiz günäkär. Adamdyr öýdüp, hemmelere gyradeñ garajak bolduk, nämynasyp adamlara ýüz berdik, käbirlerini gereginden artyk mahabatlandyrdyk. "Suw akar, daş galar". Alla ýol berse, janymyz sag-başymyzam dik bolsa, başardygymyzdan biz hyzmatymyzy dowam etdireris, biziñ saýtymyz çüý oklansa-da, arkadan hanjar bilen urulsa-da, barybir gül döredýän şahyr ýüregi kimindir.
* * *
Meni gynandyran zat: öz işimiñ, birgiden öý-hojalyk işimiziñ daşyndan puldan gymmat wagtymyzy, saglygymyzy, gerek ýerinde çykdajysyny sarp edip, öz ýazyp biljek we ýazmaly zadymyzy ýazman başgalaryñ zadyny toplap okyjylara ýetirip ýörşümize-de, eger başarsalar el kömegini-dil kömegini bermegiñ deregne şaltakly dillerini ýetirip bilenligi. (Soñky agzalardan Remezan Mämetgurbanowdan başgasy çap etjek eserine pul berip biljekdigini aýdan bolmady. Ýöne biz oña-da näçe goşgy paýlaşmak islese, salgymyza ugratmagymy we paýlaşyp biljekdigimi, munuñ ü.n pul gerek däldigini, ýöne pul ugratmak islese, el haky bilen hekaýalary göçürmek isleýän talyplara geçirip biljekdiginizi aýtdyk. Hut şeýle edibem @Kungfu agzanyñ salgysyna onuñ geçirmek islän puluny geçirdik. Saýtda çap edilýän birgiden proza eserlerini göçürtmek üçin öz hasabymyzdanam az pul çykarmadyk. Öz jigim hem garamagyndaky okuwçylara birgiden eserleri mugtuna göçürdip berdi. Elbetde, muny bize hiç kim et diýenok, mejburam edenok. Şeýdipdiris diýip hiç kime minnetimiz-de ýok. Pul nämedir gadyrdanlar, eliñ kiridir-dä. Bu gün bar, ertir ýok ýa-da şu gün ýok, ertir bar... Puluñ gaýgysyny eden etsin! Il-günüñ sagbol-tañryýalkasynyna mynasyp bolmakdan uly pul bolup bilermi!)
Muña derek saýtda eserlerini çap etdirip ýören ýaşuly ýazyjy-şahyrlaryñ birnäçesi tölegli bolsa, tölegini geçireli diýip, birem kyn görmediler. (Ýene çeper edebiýatyñ nämedigini bilýän we okyjylaryñ bagtyna azajyk bolup galanam bolsalar, şolar bar! Şumatky ýaşlara bil baglap, türkmen edebiýatyny menzil aşyrtjak bolsag-a, waý günümize!) Emma biz muny pul üçin däl-de, käbir warryklary ýöne barlamak niýeti bilen edendimi aýdyp, birindenem ýeke teññe pul almadyk. Diýmek şu saýt açylany bäri gözüñ üstünde gaşyñ bar eken diýilmän, çykyş etmäge mümkinçilik döredilen şahyrlar biziñ saýtymyzy mugtuna ulanyp ýören eken-dä? Meni bagyşlañ welin, eger hemme zady pul bilen ölçemeli bolsa, şeýle netije çykarman bilemok. Ýagdaý şeýle bolýan bolsa, biz näme üçin olara özümizi ulandyrmaly? Orta ýaşdan geçen, maşgalaly, çeper döredijiligiñ abyny-tabyny alan tejribeli, giñden tanalýan ýazyjy-şahyr bolmasa dagy, aýal-gyzlaryñ-a asla ýazan zady gerek däl! Okyja ýetirmäge materialymyz ýetik. Romanlaryny, birgiden başga-da proza eserlerini, makaladyr poemalaryny köpçülige ýetirmäge nobatyna garaşyp duran ýaşuly ýazyjylarymyz barka, ýaş-ýeleñleñ, aýallañ ýa-da aýalça ýok kellesine ýaglyk oraýmalylaryñ bäş-üç sany kel goşgusyny ýa hekaýasyny goýmañda, saýta gelmeýän bolsalar, gazminden añry gitsinler. Saýty gugaryp galar, özünden başga adam girmez diýip heşelle kakanlaryñ arzuwyny gursagynda garradyp, edebi saýtlaryñ içinde iñ saldamlysy bolmagyñ, okyjy sany köplüginiñ añyrsynda, ine, şular ýaly abyrsyz uly zähmetler, ownuk hysyrdylar, şeýle ýüregagyrdyjy gepleri eşdibem ajy ýylgyrmalar bilen işiñi dowam etdirmegiñ äwmezekligi ýatyr. Biziñ bu zatlar üçin Hudaýdan başgasyndan tamakinçiligimiz ýok. Biz eden işinden kireý gözleýän ýa öwgüli söze garaşýan, "gürrüldili el çarpyşylýan, gujagyna gül, jübüsine-de ogrynça pul gysdyrylýan" jemendeleriñ adamy däl...
* * *
Iñ ýamany näme, bilýäñizmi: Bu zatlar üçin özüni ýazyjy-şahyrdyr öýdüp, edebi saýtlarda boş çişip ýörenleriñ ýekesiniñem (elbetde soñky ösdürimler) edebiýat üçin, halk üçin ýeke teññe-de çykaryp bilmejekleri. (Beýtjek bolsañyz, gümüñizi çekiñ-de, oñarjak işiñiziñ başynу tutuñ-da!) Olaryñ biri-de edebiýatyñ adamy däl. Olar ýazyjy-şahyrlykdan başga hemme zady oñarýan ekenler: Gep-gybaty, myjabaty, töhmeti - gowulykdan başga hemme zady! Olar muny maña däl-de, şu saýta girýän okyjylara subut edip berdiler. (Maña şundan uly ýeñiş bolup bilermi). Paýzy Orazyñ dili bilen men olara: "Eý, siz, warryklar!" diýýärin. Başga diýjek zadym ýok.
Essalawmaleýkim! Saýtyň täze düzgünnamasy bilen ýene bir gezek tanyşdyranyňyz üçin sag boluň! Täze düzgünnamany geçen ýyl hem goldap habar iberipdim. “Ýagşy niýet—ýarym döwlet”. Işiňiz rowaç bolsun, abraý gazanyň! Saýtyň bölümleriniň sanynyň köpelenine begenýäs, ýöne käbir rubriklar bir-birini dublir (gaýtalanýan) edýän ýaly. Bölümleri birnäçesini birikdirip, olaryň içinde podrubrika döredilse, okyjy üçinem , ýazyjy üçinem amatly bolaýjak ýaly. Mysal üçin: “Makalalar” bölümine publisistika, edebi makalalar, ýol ýazgylary, söhbetdeşlik goşulsa; “Halk döredijiligine” – rowaýatlar, ertekiler; Men bolsam “Sport we turizmi” “Sport, bedenterbiýe we turizm” diýip ýazardym. Goşgular bölüminde (9000 gowrak eser) lirika, rubagy, türkmen nusgawy lirikasy (gazal, mesnewi, kasyda, tuýug we ş.b.) basnýa, parodiýa, epigramma, degişme (ýumor), aýdym, oda, ballada, sonet, liriki oýlanma, ak goşgy (werlibr), goşguly proza we bş. Şeýdilse tematik goşgyny gözläp tapmak ýeňil düşerdi. “Sözler” bölümini “Dana sözler, aforizmler, sitatalar” bilen çalşylsa gowy bolaýjak ýaly. “Ylahyýet ylmy” bölümini döredip, onuň içine Gurhany, hadyslary, yslamyýet we şerigat kitaplaryny (materiallaryny) we beýleki miras kitaplaryny salsa bolar. “Teatr we kinosungaty” bölüminde “Pýesalar”, “Kinossenariler” podrubrikalary döredilse. “Senagat hojalygyna” senetçilik bilen telekeçilik. Näme üçindir “Terjime eserler” bölümi ýatdan çykypdyr.
Sag boluň, minnetdar
Teswiri diňe saýta agza bolan ulanjylar goşup bilýär. [ Agza bol | Saýta gir ]
0
