18:56 Ejeme meñzeş zenan | |
EJEME MEÑZEŞ ZENAN
Men bu mähriban aýala her gün irden turup, salam berýärin. Onuň mähir-mylakatyna beslenip, täze bir güne başlaýaryn. Aşhana girip, süýjüden-süýji ertirlik taýynlasym gelýär. Çaýyny demläp, desmal bilen basyrýaryn. Ýaş çagaly halyma hysyrdap ýörşüme dözmeýän bolarly. Ol: «Balam, bäbegiň bilen boluber, men irden gatybir çaý-nahar küýsäp hem duramok. Gerek bolsa özüm demlenerin» diýip ýylgyrýar. Ejemem edil şuňa meňzeş sözleri gaýtalardy. Aýdýarka-da gözünden nur dökülip durandyr. «Balam, okuwyňa yhlas edeweri, özüňe ýerliklije timar ber, öýde-içde özüňi saýhally alyp bar, pylanynyň gyzy nähili diýdiräýme». Bular müdimi sözler öýdýän. Bu öýde-de ejemiň jümlelerinden diňe käbir sözler üýtgeýär: «Janym, üstüňe-başyňa ünslüje bolaweri. Her bir zadyňy gelşiripjik geý. Indi ýaz çykdy. Ýaza tabyn eşikleriňi, ýaglyklaryňy el ýüzünde goýup, gyşkylary ýygnaweriň. Aýal maşgalanyň päkizeligine erkek kişiniň üsti-başyny synlabam baha berýändirler. Ýanýoldaşyňa bolan söýgiňi hyzmatyňdan tanaýandyrlar». Indi men ýylgyrýaryn. Sebäbi şeýle sözleri ejem janyň gelnejeme aýdyp duranyny telim gezek eşidipdim. «Ýaş çagaly halyňa ýokary okuw jaýynda okamak aňsat däldir, balam! Tüweleme, oňat maşgala düşeňsoň, şeýdip arkalaşýarlar. Olaryň gadyryny bilgin» diýip, ejem häli-şindi sargaýar. Ýadawlykdanmy, okuw işlerimiziň köpdügindenmi, bilmedim, käteler birhili ukusyzlykdan kösenýärin. Bu-da ýüz keşbime täsir edýän bolmaly. Ýene-de dadyma ejemiň ekiztaýy ýetişýär. Ýüzüme dykgat bilen seredip ol: «Näme, bir ýeriň agyrýarmy ýa-da agtyjagym üçin gije ýatmadyňmy, okuwlaryň bir oňatmy?» diýýär. Men zordan ýylgyryp, baş atýaryn. Ol kanagatlanmaýar. «Hany, bar otagyňa gir-de, biraz dynjyňy al. Agşamlygy soň taýynlarys». Birsalymdan öýümizde mylaýym hüwdi sesi ýaňlanyp gidýär. Sallançakda ýatan oguljygymdan öňürti meýmiräp uklap galanymy hem duýmaýaryn. Şu pursat atasy öýümizde hem kän gezek gaýtalanardy. Ejem hüwdi aýdardy. Uzakly gije keşde çekip, ukusyny ogurladan gelnejem ejeme alkyş baryny okap, kellesini diwara ýaplap, ýadaw gözlerine dynç bererdi. Ýüz keşbi taýyndan biri-birine asla meňzemeýän bu iki zenany deňeşdirip görüp, haýran galýaryn. Olaryň aýdýan sözleri hem, ene hamraklygy-da, durmuş aladalary-da gaty meňzeş. Olaryň biri — meni dünýä beren mähriban ene. Beýlekisi bolsa ýanýoldaşyma janyndan jan beren — gaýynenem. Kerem-keramatyňyza döneýin, mähriban eneler! Ogulgurban ARSLANOWA, Magtymguly adyndaky TDU-nyň taryh fakultetiniň talyby. | |
|
Teswirleriň ählisi: 1 | |
| |