Gaýynenemiñ geñ gylyklary

GAÝYNENEMIÑ GEÑ GYLYKLARY

Öýe eýemsiremek, maşgala baş bolmak baradaky on ýyllap dowam eden başa-baş söweş henizem dowam edýär. Ýöne, ýaryşyñ ikinji tapgyrynda gaýynenem menden ýarym oçko öñe geçdi.

* * *

Gaýynenem bir gün öýden çyksa, gaýynatamyñ üç ýyl uruşda bolup gelendäkisinden köp gürrüñ getirýär.

* * *

Gaýynenem öýe gelende ýygrylyp, wiý, ýylgyryp garşylaýas, gidende çapak çalýas.

* * *

Gaýynenemiñ gelen güni gapymyzdaky Garagözüñem geregi bolanok.

* * *

Öýünde gaýynenesi bolan adam ölen güni soragsyz-idegsiz, behişde barybermeli. Sebäbi ol dirikä dowzahyñ oduna ýanýan adam.

* * *

Gaýynenem gargap-gargap, ähli malyny haram öldürdi. Indem jyny maña düşdi welin, hernä gezek meniñki däldir-dä?!

* * *

Gaýynenemiñ saçy agaryp, gözi küteldi, agzy kemperip, bili büküldi. Ýöne şindi-şindilerem gapymyzda del adam görünse, özüne sakçy gelendir öýdýär.

* * *

Öýde gaýynene han bolsa, giýewisi san bolýar.

* * *

Özünden başga betgüman gaýynenem gyzyny bäbekhanadan çykaranda-da, çagasynyñ agramyny ölçedip aldy.

* * *

Ömür boýy söwdada işläp, terezi bilen bagry badaşan gaýynenem towgunyñ ýumurtgasynam çekip satýar.

* * *

Gaýynenesiniñ bir towgy haram öläýse, äri ölenden beter gynanýar. Bir towgy guzlaýsa welin, ogly bolandan beter begenýär.

* * *

Gaýynenem öýde bir jinneklik iş edäýse, bir humluk minnet edýär.

* * *

Gaýynene galyñlap, halatlap satylýan bolsa, men iñ garyp adam bilen guda bolardym.

* * *

Ertir bazar diýlen güni gaýynenem uzyn gije ýatman, öñ dañynyp, könelden gyñaçlaryny ütükläp dañyny atyraýýar.

* * *

Päliýamanyñ özi garrasa-da, niýeti garramaz eken. Ýüzüniñ hamy taşlanan sanaja dönen gaýynenem şindi-şindilerem kellesine agtygynyñ şaýly tahýasyny geýip, aýnañ öñüne baran bolýar.

* * *

"Günümden öñ garratdyñ..." diýip, gaýynenem ýer ýumruklap, Tañrysyna gargaýar. Ýöne Hudaý gaty geçirimli bolarly. Onuñ özi bilen deñ bolanok.

* * *

Gaýynenem ölende gözüni açyp, armanly gitdi. Sebäbi ol menden öñ ölenine gynandy.

* * *

Gaýynene ölenden soñ ony pul bilen direldip bolýan bolsa, ilçilikdir, synanşanam tapylardy. Ýöne men-ä bahasynyñ üstünde oñşaryn öýdemok.

Allaguly REJEBOW.

"Tokmak" žurnaly, 1991 ý.