Geptorbanyñ galyndysy

GEPTORBANYÑ GALYNDYSY

- Özümiñ şahyrlyk zehininden mahrumdygyny näçe ýyl geçenden soñ bilip galdym.
- Ýeri onsoñ indi ýazañokmy?
- Indi giç. Eýýäm belli şahyr boldum.

* * *

- Sen bu günler görneñok-la, näme işleýärsiñ?
- Roman ýazyp gutaryp barýaryn. Ony saña okap berenimden soñ, ýene bäş bap ýazdym, iki hepde bäri agşamlaryna goñşyma okap berýärin.
- Bolaýypdyr, oña geregem şo-da...

* * *

Bir şahyr beýlekä ýüzlenip:
- Meniñ häzire çenli hiç kimiñ ýazmadyk, soñam ýazmajak temasyndan goşgy döredesim gelýär - diýipdir.
- Ondan añsat zat ýok - diýip, ýoldaşy oña göwünlik beripdir. - Özüñ hakda öwgüli goşgy ýazaý!

* * *

Kitap satýan adamdan söwdanyñ gidişini soraýarlar. Şonda ol:
- Örän erbet - diýip jogap beripdir.
- O näme üçin?
- Sebäbi, puldarlar-a bisowat, sowatlylaram pulsuz. Şeýle ýagdaýda-da, heý, oñly söwda bolarmy?..

* * *

Ýanyna gelen dosty bilen gümür-ýamyr edip oturan hudožnik:
- Mende bir pikir döredi. Ilki şu otagyñ hemme diwarlaryny agardyp, soñam surat çekmekçi. Nähili görýäñ? - diýip ýüzlenende, ýoldaşy şeýle maslahat beripdir:
- Tersine etseñ, gowy bolar. Ilki diwarlara surat çekip çyk-da, soñam ussany çagyryp, agartdyr.

* * *

Bir gezek şahyr Enweri Balhyñ bazaryna aýlanyp ýörkä, üýşmek mähelläniñ üstünden barypdyr. Märekäniñ ortasynda duran biri şahyryñ goşgularyny okaýarmyş. Adamlaram hezil edip ony diñleýärmişler. Enweri ol adamyñ ýanyma baryp:
- Okaýan goşgularyñ kimiñkidigini bilýärmiñ? - diýip sorapdyr.
- Elbetde, bilýän, Enweriniñki.
- Sen Enwerini görüpmidiñ? Ony tanaýarmyñ?
- Heý, tanamanmy? Men onuñ özi ahyryn!
- Eý, toba! Goşgynyñ ogurlanýandygyny gördük, ýöne şahyryñ ogurlanýandygyny henize çenli görmedik! - diýip, Enweri uludan demini alypdyr.

* * *

- Sakgaldaş, düýnki toýuñ bagşysyny neneñ gördüñ?
- Tüýs jöwen bişende aýtdyraýmaly bagşy eken.

* * *

Özüne göwni ýetýän hondanbärsi ýaş aýdymçylañ biri ýaşuly bagşylaryñ birine gygyryp aýdym aýdyp beripdir-de:
- Meñ sesim heý der-de ýarajakmy? - diýip sorapdyr.
- Hawa, zerur ýagdaýlarda derde ýaratsa boljak - diýip, ýaşuly çyny bilen gürläpdir.
- O nähili zerur ýagdaýlarda? - diýip, ýaş aýdymçy gyzyklanypdyr.
Ýaşuly bagşy bolsa oña şeýle jogap beripdir:
- Ynha, aýdaýyn, sirena signaly işlemeýän "Tiz kömek" hem-de ýangyn söndüriji maşynlarda ulansa bolar.

* * *

Bir aljyraññy ýigit kitap dükanyna giripdir-de, sen-men ýok, şeýle diýip sorapdyr:
- Sizde "Wyždan" barmy?
- Näme diýdiñ?! - diýip, satyjy ör-gökden gelipdir.
- Täze çykan "Wyždan" romany barmy diýip soraýan!

* * *

- A gyz, adamym halys günüme goýanok. Mydama teatrdan işden çyk diýip, bir depen ýerini depip dur - diýip, bir aktrisa jorasynyñ ýanynda zeýrenipdir.
- Adamyñy tomaşaçylar satyn alan bolaýmasyn? - diýip, jorasy jogap beripdir.

* * *

Ussat sazanda Jepbar Hansähet Mollagara şypahanasynda bolanda, ýerli öwrenjäniñ biri her gün dutaryny gujaklap gelip, ne çaý-çöregini iýdiripdir, ne-de dem-dynç aldyrypdyr.
Ol her sazy çalyp bolandan soñra:
- Jepbar däde, elim nähili? - diýip, soraýan eken.
Tagam-tagsyrsyz "tiriñ-tiriñlerden" halys ýadan halypa ahyry:
- Inim, şu eliñi başga bir ýerde ulanaýmasañ, ýürek edip, dutara ýetirer ýaly däl - diýip gepini lokgalapdyr.