IŞDÄÑIZ AÇYK BOLSUN
Gijelerne giç ýatyp, Ertirlerne ir turdum: Manydyr, rifma gatyp, Kän-kän GOŞGY gowurdym. Temalaryň içinden Tapyp täzeje tema, Işdämen iýjeklere, Bişirdim men POEMA! Erteki söýýänlere ERTEKI hem gaýnatdym. Tagamly bolar ýaly, Ýalan-ýaşryk kän atdym. Bişirdim barysyny POEZIÝA pejinde. Iýiň, KITAP — saçagyň Başynajyk geçiň-de! Soňundan aýdyň maňa: Men aşpezmi, ýa şahyr?! Ýa-da hijisem dälmi?! Bilmegim gerek ahyr! Işdäňiz açyk bolsun! Sowatman iýseňiz bor! Tolgunmak bilen, aşpez — Ýagny, degişegen AWTOR! HEMRA ŞIROW