Magtymguly -9/ romanyñ dowamy

9.

Wagt ýasyndan agypdy. Medresäniň howlusy çolarypdy. Hüjreleriň käsinde yşyk ýylpyldaýardy, emma daşarda adam-gara görnenokdy.
Magtymguly ýadawdy, kellesini ýassyga beresi gelip durdy. Ol okap oturan kitabyny bir gapdala goýdy-da, dikelip oturdy. Soňra aýak üstüne galdy, ýatnazdan öňürti daşarda bir sellem gezmelemegi ýüregine düwdi. Donuny egnine atanam şoldy welin, gapy garsa açyldy, uzynak pyýada içerik girdi, batly seslendi:
— Essalawmaleýkim!
Magtymguly Şeýdaýyny görüp geň-taň boldy. Ol ýerinden gozganman durşuna onuň, Şeýdaýynyň setirlerini ýatlady:

Şeýdaýy mest bolup düşdüň hyýala,
Meý bilen berdiler doly pyýala.
Meý içip, mest boldum, düşdüm hyýala,
Yşk meniň halyma harap getirdi.

Olar gujaklaşyp, mähirli görüşdiler.
—
—
—
—
—
—
— Agyr ýüki gerdeniňe alypsyň.
— Agyr ýüki gerdenime atdylar! — Magtymguly ýüzüni egşitdi. — Pir ýörite çagyryp «sen şol dabarada hökman gatnaşmaly» diýdi. Nädeýin? Oň bilen eňekleşip bolýamy näme!
— Bir zat çyrşadyňmy?
— Çyrşadym.
Magtymguly aýak üstüne galdy, tekjede duran kitaplardan birini aldy, onuň içinden bir kagyzy çykaryp, gaýtadan dyzyny epdi. Hata ýeňil göz gezdirdi-de, ony howlukman okady:

Patyşa kim niýetin rast eýlese,
Hakdan olgaý herne derhast eýlese.
Kylsa haýr endişe, ol Taňry bakar,
Ýerlere ýagmyr ýagar, otlar çykar.
Düzlener il, çeşmeler bolgaý rowan,
Giňeler halk-u nyzam tapgaý jahan.
Ogry, zalym...

— Dur! — Şeýdaýy Magtymgulynyň golundan şapba ýapyşdy. — Bu goşgy kimiňki?
— Meňki.
— Ýok! Bu goşgy seň goşgyň däl.
— Eýse, kimiňki?
— Kakaň goşgusy.
— Berekella! — Magtymguly ýürekden dillendi. — Nädip bildiň?
— Bilmez ýaly zat ýok. Öten ýyl «Wagzy-azatdan» parçalary bilelikde okapdyk ahyryn.
Şeýdaýy dymdy, pikirlendi. Soňra bir wagt okan serirlerini ýatlady:

Patyşasy bolmasa her ülkäniň. —
Bolmaz imiş haýry-yhsany anyň.

Azaşar ýol ähli, rehbersiz ola,
Dagylar leşger ki, serdrsyz ola.

Göwre läş bolgaý, eger baş bolmsa,
Bitmez iş, Hak lutfy ýoldaş bolmasa...

— Berekella! — Magtymguly dostunyň ýüzüne guwançly garady. — Görýän weli, seňem ýatkeşligiň Nury Kazymyň ýatkeşligiçe bar...
Şeýdaýy gürrüňi özünden sowjak bolup çalyşdy:
— Onsoňam, muň ýaly goşgy üçin Gaýyp han egniňe halat atmaz!
— Meň ondan halat tamakinçiligim ýok.
— Emma oň senden tamakinçiliçi bardyr, öwgüli goşga garaşýandyr. Şony bilip goý!
Magtymguly sesini çykarmady, gabagyny aşak saldy.