Ylhamly gije

YLHAMLY GIJE

Bu gije adatylaryna meňzemän geldi güýz gijeleriniň. Kalbym turuwbaşdan eline galam almaga howlugyp Güneşiň öz öýlerine giderine howlukdy. Ýogsa men Güneşi söýýärdimem. Bu gün bolsa gijäniň tümlügine maýyl boldum.
Öňler heder edýän ümsümligim kalbyma rahatlyk eçilip deregine ullakan ynjalyksyzlygy sowgat etdi. Gursagyma giren ünji hamala tutuş dünýäniň derdi gerdenime çöken ýaly agyrlyk berdi ýüregime...
Hernä hemme zat bähbide ekeni. Elime galam alyp ýazjak gijäm ekeni bu gije.
Ýazdym. Dünýäni undup ýazdym. Ne başgalaryň bir gün bulary okajagy ne-de duýgularymyň ile paş boljagy hakda pikirlendim. Diňe ýazdym.
Tutuş ömrüň ylhamyny egnine atyp gaýdyberipdir öýdýän bu gije. Ukysyzlygyň boýnuma alnany haçanky. Galamyma agram berip ýazylmaga intizar setirlerim ak kagyza howlukdy. Menem hiç birine gatyrganmazdan içimde ornan pikirleri paýlaşdym kagyz bilen.
Kagyzyň agraslygyny diýsene. Näme ýazsam sessiz diňledi oturdy. Ne-hä geň gördi ne-de ýalňyşymy çykardy. Hatda üstümden güljegem bolmady. Nähili wepaly syrdaş. Ynsanlaryň haýsy birine baryp şugünki ýazanlarymdan söz açsam meni ýazgarjagy ikuçsyz. A ak kagyz beýtmedi...
Elimi ýassanan galam ak kagyzy bagryma gysan men sähere sowgatly oýandyk. Ukusyzlyk we argynlygyň deregine dünýä inen setirler bolsa stoluň üstünde arkaýyn ýatyrlar. Olar indi öz orunlaryny tapmaly bolsalaram ykballaryna kaýyl kimleriň kalbyny gobsundyryp kimlere umyt yşygy bolup ýanmaga taýýar otyrlar. Olar ylhamly gijäniň çagalary.
Leýli Jumaniýazowa
Türkmenistanyň telekommunikasiýalar we informatika institutynyň talyby