Bin Ladiniñ haty sosial mediýany başaşak sallady...

USAME BIN LADINIÑ 21 ÝYLLYK HATY SOSIAL MEDIÝANY BAŞAŞAK SALLADY: "BAR ZAT ÝALAN EKEN"

Ak Tam "bulary aýan etmegiñ geregi ýok" diýdi.
"11-nji sentýabr" teraktlary 10 milliard dollara golaý zyýana getiripdi

ABŞ-daky "11-nji sentýabr" teraktlaryny gurnan "El Kaidäniñ" lideri Usame bin Ladiniñ 2002-nji ýylda ýazan haty Gaza urşunda gaýtadan wiral boldy.
Bin Ladiniñ "Amerika hat" ("Letter to America") atly haty sosial mediýa platformasy "TikTok"-da paýlaşma rekordyny täzeledi, ABŞ bolsa muña nägilelik bildirdi.
Wideolardan Birleşen Korollygyñ abraýly "Guardian" gazetiniñ 2002-nji ýylyñ 24-nji noýabryndaky sanynda çap edilen hata link berilendigi sebäpli gazet haty saýtyndan aýyrdy.
"TikTok" bolsa, wideolaryñ gadagan edilendigini mälim edip, # "lettertoamerica hashtag"-i ulgamyñ içindäki gözleg düwmesinden aýyrdy.
ABŞ-nyñ "New York Times" gazeti "TikTok" wideolara gadagançylyk girizmezden öñ gürrüñi gidýän "hashtag"-yñ ulanyjylar tarapyndan jemi 14,2 million gezek gözlenendigini aýtdy.
ABŞ-nyñ 2011-nji ýylyñ 2-nji maýynda Päkistanda geçiren operasiýasynda öldürilen Bin Ladin agzalýan hatynda ABŞ-da ildeşleriniñ jöhitleriñ "guly" bolandygyny öñe sürüpdi.
"El Kaide" toparynyñ lideri hatynda amerikan hökümetiniñ ýöredýän syýasatyny tankyt edip, "Ysraýyl döwletiniñ gurulmagy aradan aýrylmaly jenaýatdyr" diýipdi.
Haty okan käbir "TikTok" ulanyjylary bolsa paýlaşan ýazgylarynda Bin Ladiniñ eden tankydy bellikleriniñ dogrudygyny öñe sürdi.
Bir "TokTok" ulanyjysy "Indi men ABŞ-na hijem öñki göz bilen seredip bilmerin" diýse, ýene biri-de "ABŞ-nyñ dünýäniñ başyna inen towkynäletdigine düşünendigini" aýtdy.
Platformadaky paýlaşmalardan birinde şeýle diýildi:
"Usame bin Ladiniñ "Amerika hatyny" okanymdan soñ Ýakyn Gündogar, "11-nji sentýabr" we "terrorizm" hakda bilýän zatlarymyzyñ barsynyñ ýalandygyna düşündim. Indem öñkim ýaly bolmaga synanyşýan".
ABŞ-nyñ tanymal metbugat organlaryndan "CNN"-iñ habar bermegine görä, platformadan öçürilmänkä 1,6 million prosmotr alan bir wideoda "Haty okan bolsañyz ekzistensial stres geçirseñiz maña habar beriñ. Çünki soñky 20 minudyñ dowamynda öñki ynanýan we başdan ýaşaýan durmuşyma bolan ähli dünýägaraýşym üýtgedi" diýen sözler aýdyldy.
Hat sosial mediýada gyzgyn seslenme döredenem bolsa, Ak Tamyñ metbugat sekretarynyñ kömekçisi Andrew Bates 11-nji sentýabrda gurban bolanlary ýatladyp, "Hiç kimse Usame bin Ladiniñ bolgusyz sözleri bilen özüni baglanyşdyryp, şindizem ýakynlarynyñ ýasyny tutup ýören 2 müñ 977 amerikan maşgalasyna dil ýetirjek bolmasyn" diýip, bolýan zatlara nägileligini bildirdi.
Bates "hamasçy" militaristleriñ Ikinji jahan urşunda nemes faşistleriniñ amala aşyran "Holokostyndan" bäri jöhitlere garşy gönükdirilen iñ uly gyrgynçylygy amala aşyrandygyny öñe sürüp, "muny aýan etmegiñ hiç bir jähtden geregi ýok" diýdi.
Ysraýyl "Izzeddin Kassam" brigadalarynyñ 7-nji oktýabrda başlan "Aksa tupany" operasiýasyna "Demir gylyçlar" operasiýasy bilen jogap beripdi.
Palestinanyñ Saglygy goraýyş ministrliginiñ mälim eden görkezijilerine görä, ysraýyl goşunynyñ bombalamalarynda Gazada 4 müñ 710-y çaga, 3 müñ 160-y hem aýal, jemi 11 müñ 500 adam öldürilip, ýaralananlaryñ sany 27 müñ 490-a ýetdi.
Ysraýyl bolsa Gaza tarapdan gurnalan hüjümlerde 365-i esger, azyndan 1200 adamynyñ öldürilendigini, 5 müñ 132 adamyñam ýaralanandygyny mälim etdi.

# "New York Times", "Wall Street Journal", CNN

Taýýarlan: Guwanç MÄMILIÝEW.

Anna, 17.11.2023 ý.