Ependiniñ gephaltasyndan -3

EPENDINIÑ GEPHALTASYNDAN


Ependi dellek ekeni. Günlerde bir gün saçy ýeñsesine düşüp duran bir ýigit dellekhana gelip, kreslo çöküpdir-de, şeýle diýipdir:
- Babaý, bir kapitalnyý remont edip goýbersene!
Ependiniñ muña ýeñsedamary gatapdyr:
- Ýigit, bu taýy ussahana däl, dellekhana!

* * *

- Kaka, adam geplemäni öwrenenden soñ ýene nämäni öwrense gowy?
- Lal-jim bolmany! - diýip, Ependi gyzyna jogap beripdir.

* * *

Ependi et satyn alypdyr. Gassap oña süñk-sañklary çekip beripdir-de, şeýle diýipdir:
- Agam jan, süñkli ýeriniñ tagamy aýrydyr! - Gassap süýji-süýji gürläpdir. - Ynha, Biribar Adam atanyñ gapyrgasyndan How enemizi ýasapdyr ahyry!
- Hudaý gapyrgadan zenan ýasan bolsa, sen süñkden kaşañ jañ ýasaýañ! - diýip, Ependi gönüsinden gelipdir.

* * *

Bir adam Ependä sala salypdyr:
- Nasretdin aga, oglum boldy, adyna näme daksamkam, maslahat ber?
- Beýleki ogullaryñ ady näme?
- Ulujamyñ ady Paltabaý, ortanjymyñ ady Teşebaý, kiçimiñ ady Orakbaý...
- Körpäñ adyna-da Pyçakbaý dakyp goýber. Onsoñ, ähli demir ugry özüñden öner.

* * *

Ependiniñ aýaly:
- Ezizim, zähmet rugsadyna haçan çykýañ?
- Ony başlygym çözer - diýip, Ependi jogap beripdir.
- Ikimiz dynç almaga haýsy ýere gideris?
- Ony özüñ çözersiñ! - diýip, Ependi göwni bir ýaly jogap beripdir.
- Ýol harjyny nirden alarys?
- Ine, muny özüm çözerin! - diýip, Ependi gülümsiräpdir.

* * *

- Eý oglanjyk nämä zörledip dursuñ? - diýip, Ependi gat-gat jaýlaryñ arasynda şumjaryp duran okuwçydan sorapdyr. - Näçinji klasda okaýañ?
- Bäşinji - diýip, oglanjyk gözlerini owkalapdyr.
- Bäşinji klas bolubam bir aglarlarmy? - diýip, Ependi ony köşeşdiripdir. - Ýeri, näme aglaýañ?
- Azaşdym...
- Azaşdym? Señ özüñ nirä barýañ?
- Mekdebe.
- Bäşinji klas bolup sen indi mekdebiñi-de tapyp bilmän azaşyp ýörmüñ?
- Mundan ozal meni mekdebe kakamyñ şopury äkidip getirýärdi-dä...

"Watan" gazeti, 1995 ý.