Heserli / goşgular

DIŇE ŞU WATANDA

Şäher.
Gije.
Ýaldyraşýan yşyklar
Duşýar ýyldyzlara ho:l gözýetimde.
Bu görnüşi synlanyňda,
arzuwlaň
Kök urar hyýalda, tämiz netiňde.
Wysalyňy alyp gelen aý-ýyllar
Sada durmuşyňy has-da gyzykdy:r.
Birleşer owadan şaýollar bilen
Aýaňdaky syrdan doly çyzyklar.

Şaýat borsuň millionlaryň biri deý,
Bolýan, görýän zatlaň düýşüň däldigne.
Iň şowly ykbala,
iň gözel bagta
Diňe şu Watanda duşulýandygna.

■ BEDEW

Ýyldyrym deý juda ýyndam,
Aýlawlary baglar gider.
Gadamy ot, bili gyldan,
Göwünleri çaglar gider.
Gözelligňe haýran dünýä,
Sen-sen bedewleň naýbaşy.
Gözleňde behişt görünýä,
Eý, Göroglynyň gardaşy.
Galgaýar ýüpek ýallaryň,
Bagtyýar döwrüň badyna.
Beze, şöhratly ýollary,
Şan goşup Watan adyna.
Syn et, türkmeniň düzüne
Asuda, päk asmanyna.
Gulak goý, her bir sözüne,
Aýdymyna, dessanyna.
Kalbymyza aýlan, bedew,
Tarypyň arşy boýlaýar.
Şaýlan bedew, saýlan bedew,
Arkadagym toý toýlaýar.

■ ÝAGYŞ ÝAGANDA

Indi bu şähere däl men nätanyş,
Onuň saçagynda rysgalym, nanym.
Ýöne asman gürläp, ýaganda ýagyş,
Küýseýärin gujagyny obamyň.

Häzir gydyrdanyp ýörendir käbäm,
Tamdyr-ojagyny gorap ýagyşdan.
Çopan getirýändir sürüsin obaň,
Kakam bolsa mallaryny daňyşdy:r.

Ternawyň suwundan dörän kölçede
Ýüzýändir çagalaň kagyz gaýygy.
Çaň-tozandan halas bolan köçeden,
Çekilendir pyýadalaň aýagy.

Horaşaja üçegmizden gelýändir
Ekdi gögerçinleň täsin gur-gury.
Bu howsala asla sebäpsiz däldir,
Görmedim men olar deýin duýgury.

Ürküzensoň dabarasy damjalaň,
Bir tarapdan bezzataryň kemany,
Diýýändirler: «Bizi sowuk penjeden
Goraglan gyz nirde,
Niçikkä haly?».

Bilýän däldir olar özleri hakda
Şol gözeliň ne hyýallar gurýanyn.
Penjiräň öňünde,
12-nji gatda,
Jaýlaň üçegine garap durýanyn.

Hem-de köne dostlarynyň zaryny
Çekdigiçe alýandygny güýç-kuwwat.
Doly bilmeýärler entek baryny —
Çorluja elleriň bolanny duw-ak.

...Şu şäherde gözel günleň dowamy,
Şonuň üçin däl biz asla nätanyş.
Ýöne küýseýärin eziz obamy,
Asman joşa gelip, ýaganda ýagyş.

■ ÝAGYŞ

Bir düşnüksiz howsalasy bar ýaly,
Indi ençe gündür ýagýar ol diňmän.
Ýa derde sataşdy,
Ýa-da ýüregne
Yşkdan uçgun düşdi gözi deý iňňäň.

Ýagyş ýagýar suw-sil edip ýollary,
Kimleň şähdi açyk, kimler darygýar.
Näçe adam öýlerine howluksa
Ýene-de şonçasy daşaryk çykýar.

Her kimiň kalbynda çäksiz tolgunma,
Hoş sözler aýdylýar, ötülýär hata.
Saýawanly gyzjagazny göterip
Han-ha gidip barýar nowjuwan ata.

Jemläp bir damjada müňlerçe syry
Ýagyş bagt paýlaýar töwerek-daşa.
Häzir bir-biregi küýsän aşyklaň
Duşuşygy has lezzetli, başgaça.

Ýagýar hetden aşyp,
Sygman adata,
Bu howsala ýönekeý däl, kiçem däl.
Mazaly ezilen baglar Gün çyksa,
Ýagşyň hikmetini dünýä güjeňlär.

■ HESERLI
(Halky äheňinde)

Synamda yşkyň jerhedi,
Bilmen, bu ne hal heserli.
Bir mütdet karar bermedi,
Ýüregim bimar heserli.

Owal bilmen işbu derdi,
Gül görküni dide gördi,
Ne galdyrdy, ne öltürdi,
Şo:l gözel nigar heserli.

Göze ilmes dünýä maly,
Diýmäňler: «Bar eken ýary»,
Zary men, bir şonuň zary,
Ýetişsin didar heserli.

Zulum etmegeý janyma,
Sallanyp gelse ýanyma,
Zenehdanynyň halyna
Teşne göwün zar heserli.

Bu ne yşkdyr, bu ne söwda,
Barmy munda zerre peýda?
Bizni geda, özüni şa
Eýlän gyza ýar heserli.

■ GÖRMÜŞEM

Hoş hyýaly beslän, oglan,
Aramyzda ýol görmüşem.
Ak bagtymy islän, oglan,
Sende yşkdan hal görmüşem.

Hemme hyrydardyr merde,
Ýan, oduna köňül ber-de,
Kalp aýnasy — didelerde
Bir jöwheri-päl görmüşem.

Geçýär günler hatar-hatar,
Gel, ýaýdanma, ähdiň gutar,
Gara ýeriň pähmin tutan
Paýhas düri kän görmüşem.

Ylham şährin geze-geze,
Toprak-tozun sürtüp göze,
Hany-manyn şirin söze
Pida eýlän jan görmüşem.

Kim tapsa öz göwündeşin
Belent tutar mydam başyn.
Eginlerde döwlet guşun —
Ykbalda döwran görmüşem.

Gurbanjemal ANNAKOWA.