Главная » 2023 » Oktýabr » 3 » Iň gerekli adam / hekaýa
16:14

Iň gerekli adam / hekaýa

IŇ GEREKLI ADAM

Synpdaşymyz Çynaryň ejesi mekdepde işleýär. Özem mekdepde iň gerekli adam. Hawa, şondan wajyp adam ýok mekdepde. Şonuň üçin özüm-ä Çynary juda bagtly hasaplaýan. Synpdaşlarymam maňa goşulsa gerek.
Meňem ejem mekdepde işleýär. Ýöne başga mekdepde. Ikinjidenem, men birinji synpa baran ýylym ejem «üçleri» okadýardy. Ikinjä geçdimem welin, ejem «birleri» aldy. Garaz, ejemiň mekdepde işleýänliginden maňa peýda ýok. Şonuň üçin hem Çynara gözüm gidýär.
Çynar heniz biz oýanmankak ejesiniň mekdebe gelýändigini aýdýar. Hatda müdirdenem öň gelýärmiş. Iň gerekli adam şeýle-de etmeli-dä! Biziň süýji düýşleri terk edip, kynlyk bilen oýanýan, ýaltalyk bilen ertirlik edinýän uçurlarymyzda ol tutuş mekdebi biziň üçin taýýarlap goýýar. Men-ä şol jadylymyka diýýän. Ýogsam, üç-dört sany zenan bilen tutuş mekdebi okuwçylar gelýänçä, gül pürkülen ýaly edip goýmak mümkin däl-ä! Özümiz bilýäs-ä agşama çenli synplaryň, eýwanlaryň ne hala gelýändigini! Çaşyran, ýykan zatlarymyzy düzetmek üçin biziň synpymyzyň okuwçylaryna-ha bir aý wagt gerek bolardy. Çynaryň ejesi bolsa şunça işi birki sagatda edäýýär. Ol hökman jadyly bolmaly. Munuň başga düşündirişi ýok. Ýogsam, kim şunça işden soň hem çagalaryň her arakesmede goşun tutup hüjüm edýän ýerinde ― suw içilýän ýerde ähli gaplary suwdan dolduryp goýjak (mekdebimiziň bir çetinde guýy bar. Çynaryň ejesi bizi şoňa asyl-asyl bolup durmakdan halas edýär. Aslynda, näme üçindir, bizi guýynyň ýanyna eltenoklaram. Bedresini Çynaryň ejesi bukup goýýar), özem bu suw tomusda sowujak, gyşda mylaýym. Ýogsam, kim gar ýagan günlerinde mekdebiň eýwanlaryna uzaýan ýollaryň garyny arassalap, ýüze çykyp biljek çaknyşyklaryň öňüni aljak?! Ýogsa, kim onda-munda entäp, sapaga gijä galan okuwçylary, edil öz perzendi ýaly ezizläp, synpyna çenli eltip gaýtjak?! Çynaryň ejesi şularyň baryna ýetişýär.
Ejesiniň mekdepde işleýändigi üçin bagtlydygyny Çynar gizlejek hem bolanok. Ol heziller edinip, her arakesmede ejesiniň ýanyna gidýär. Synpymyzyň iň garagol oglanlaryna çenli Çynaryň saçyndan çekip ýa galamyny döwüp bilenok. Nädip etjek?! Onuň ejesi mekdepde işleýär ahyryn! Okuwçylar hakynda-ha gürrüňem ýok: ejesiniň mekdepde işleýändigi üçin Çynara mugallymlaram ýüz görýär. Biziň müň bir hupbat bilen alýan bäşliklerimiz Çynar üçin itiň oýunjagy. Şonuň üçin hem ol synpymyzyň iň bäşlikçisi. Hakyny iýmäýin, ejesini arka tutunyp gezenok, Çynaryň özem gowy okaýar.
Ine, bir gün Çynar mekdepde owasyny ýaşdan dolduryp otyr. Sebäbini dessine bildik, şol gün ejesi ýaraman, işden galypdyr. Çynaryň bu gynanjyna hemmämiz goşuldyk. Onuň ejesi bolmasa, biz mekdepde nädip günümizi göreris diýsene! Ony hasam synpymyzyň oglanlary gowy görýär. Heniz ikinji synpda okaýan hem bolsak, iň bäşlikçi gyzyň ejesine ýaranjaňlyk etmegiň iru-giç peýdasynyň degjekdigini bilýäris. Şonuň üçin irden barada-ha gürrüňem ýok, arakesmelerde-de Çynaryň ejesi bilen elleşip salamlaşmak, oňa jinnek ýalyjagam bolsa kömek etmek üçin nobata durýarys. Oglanlar-da, käte suw daşamagyň, zibil döküp gelmegiň üstünde ýaka tutuşýan gezeklerimizem bolýar. Ine, şonda bizi garpyşmakdan ýene Çynaryň ejesi halas edýär. Iň esasy ýerem säheriň süýji ukusyndan asgyn gelip ýa arakesmelerde oýna güýmenip, sapaga gijä galsagam, ol bizi synpa çenli eltip gadýar. Gijä galsaňam, synpa Çynaryň ejesi bilen barsaň hezil, mugallym hiç zat diýenok.
Çynaryň ejesi synpdaş gyzlarymyzyňam göreldesi. Olaryň käbiri-hä, ulalanda hut Çynaryň ejesi bolup işlejekmiş. Dogry-da, kimiň mekdepde iň gerekli adam bolasy gelenok. Arman, zenanlaryň işi, ýogsam, menem ulalamda bir sekundam pikirlenmän Çynaryň ejesi bolardym.
Ýogsa-da, biz onuň adynam bilemzok. Ýöne «Çynaryň ejesi» diýäýýäs. Özüne ýüzlenenimizde bolsa oň ady Daýza. Çynaram ejesiniň adyny aýtjkak bolup duranok. Ýöne haýran galaýmaly, ol welin ählimiziň adymyzy ýekän-ýekän ýatdan bilýär. Çynaryň ejesi muny nädip başarýar diýsene! Belki mekdebiň iň gerekli adamsy hut şeýle-de bolmalydyr.
Indi düşündiňizmi Çynaryň ejesiniň näme üçin mekdepde iň gerekli adamdygyna? Belki, sizem meniň bilen pikirdeşsiňiz. Ýöne pikirdeş bolmanam bilersiňiz, men welin hemişelik öz pikirimde galjak: Çynaryň ejesi mekdepde iň gerekli adam!
Категория: Çagalar edebiýaty | Просмотров: 346 | Добавил: Lebaply4751 | Теги: Agageldi Italmazow | Рейтинг: 5.0/3
Awtoryň başga makalalary

Çagalar edebiýaty bölümiň başga makalalary


Teswirleriň ählisi: 12
0
1 yaran_yagmur_9  
1578
Gaty şüwlümli gürrüň berýärsiňiz. Eli ýeňil hekaýaçy ekeniňiz. Güneşlije bir dünýäsini çekipsiňiz mekdep çagalygynyň. Gumanizme hem ýugrupsyňyz ep-eslije, zähmetkeş zenany arşa galdyryp. Bolýar, sag boluň.

0
5 Lebaply4751  
1389
Köp sag boluň!

0
2 Bagabat  
43
Mähirli hekaýa.
Tüweleme.
Höwri köp bolsun.
Hezil edip okadym.

0
6 Lebaply4751  
1389
Köp sag boluň! Şeýle bolsun-da!

0
3 yaran_yagmur_9  
1578
Dogrudanam, hekaýa çaga akwareli bilen çekilen surat ýaly. Özem onda gara boýag ýok. Hatda "Çynaryň ejesiniň" näsaglaýan hasratly ýeri hem ýagty reňkde, çünki ol çagalaryň çirksiz gussasyna boýalan. Çagalar "indi nädip günümizi görerkäk" diýip gaýga galýarlar. Çünki süpüriji aýalyň, goý, näçe yhlas bilen etse-de, barybir zähmet borjy bolup durýan işlerini olar şahsy ýagşylyk hökmünde kabul edýärler we onuň şahsyýetindäki pula alyp bolmajak sypatlary görmegi we sarpalamagy başarýarlar. Bu çagalardaky ulularda bolmaýan, sebäbi soň köplenç ýitirilýän ajaýyp ukyp. "Durmuşa düşünen", ýüregi kesmekläp giden ulularyň gözünde bolsa ol "bir süpüriji-laý". "Elbetde, eder, etmän gitjek ýeri niremiş, wezipe borjy ahyryn o zatlar". Ulalandan soň süpüriji ata-enesi sebäpli utamjak perzentlerem ýok däldir.

Hekaýada entek ol bulutlar ýok. Häzir "Çynaryň ejesi - deňsiz-taýsyz daýza". Ejesiniň "lowurdysyndan" Çynar gyza-da ep-esli "ýalkym" düşýär. Bujagaz sadaja dünýäde "Bu bäşlikçi gyzyň ejesine" ýaranmak üçin bäsleşýän maňkalyja "giýewler" kalbyňda ýylgyryş döredýär. We biraz hasrat: her niçigem bolsa - ýitirilýän dünýä...

0
7 Lebaply4751  
1389
Hekaýanyň aslynda ulular üçin ýazylandygyny görüp bilipsiňiz.

0
4 Shapak_A9602  
1502
Ulularyñ köpüsi äsgermeýärem tam süpürijini. Hatda mekdepde işleýän mugallymlaryñam käbiri, olara dagy ylymly diýjeksiñ, şolaryñ hem tam süpürijileri äsgermeýändigine janly şaýat boldum.

0
8 Lebaply4751  
1389
Dogry. Şonuň üçin hem ulularyň çagalardan öwrenmeli zatlary gaty kän.

0
9 Babay  
1481
Jemleme ajaýyp bolupdyr. Hemmäniň adyndan belli bir netijä gelinmän, tutan ýerinden kesilmän, okyja top atýan, "Men-ä şeýle diýip pikir edýän, sen nähili pikir edýäň?" diýip, iň soňunda okyjanam hekaýanyň bir parçasyna öwürýän jemleme. Çeperçiligem gowy. Ona aýtmak hem zerur däldir.
Hekaýanyň guýyly ýerini okap otyrkam, öz mekdep guýymyz göz öňeme geldi. Bedresi elmydam gapagynyň üstünde-di, suw içjek wagtymyz ýa-da el-aýagymyzy ýuwjak wagtymyz şondan suw çekip alardyk. Guýynyň beýikligem ýerden bolsa 40-50 sm-dir. Diýjek bolýanym, guýynyň iç-ä ýadyma düşenok, emma, daşy elmydam okuwçylaryň üýşüp durýan ýeri bolansoň, kagyz galyndylary, köke-süýjileň daşlary, dürli klýonka galyndylary hemem guýydan suw çekilip el-aýak ýuwulansoň guýynyň daş-töweregi laý, batga, palçyk. Garaz, arassaja, tämiz däldi-dä. Içe hem şeýledimikä diýip güman edýän. Diýjek bolýanym şolar ýaly ýaramaz şertli guýydan poçti on ýyl suw içip, bize hiç zat bolmadygyna geň galýan. Ýa-da bolsa-da bolandyr, biz bilýän däldiris.
Hekaýanyň guýyly temasyndan öz mekdep guýymyza akyp geçdi pikirim, ondanam mekdep tualetimize. Oňa gürrüňinem edip oturjak däl. Ýöne, otyryp ýatlasaň, biziňem baş alyp çykan kynçylyklarymyz köp eken. :)

0
10 yaran_yagmur_9  
1578
Şony kadaly hasap edensiňiz.

Ol wagt iýmitiň köpüsi natural bolansoň organizmiň kesele garşylyk görkezijiligi güýçlüdir.

Häzir çagalar esasan gaýtadan işlenen, emeli ýol bilen alnan önümleri iýýärler, hereketleri az, tebigatda seýrek bolýarlar.

Şonuň üçinem olaryň indi beýle guýulardan suw içmeýänine şükür etmeli. Bulara täsiri başga bolardy.

0
11 yaran_yagmur_9  
1578
Häzir yzagalak ýurtlarda, meselem, Afrikada mekdeplerde esasan aşagy çukurly ýönekeý hajathanalar ulanylýar. Şoňa ýykylyp ölýän çagalaram bolýar her ýyl. Çaganyň bir eli görnüp ýatyr, çekip çykarsalar, nejasatda demigip ölüpdir. Bu ýurtlara bu ugurdan maksatlaýyn serişde sadaka edýän halkara ynsanperwer gaznalaram bar.

Indi aýdyň: haýsy döwlet beýik? Özi kiçijigem bolsa öz okuwçy çagalary üçin lagym ulgamly naharhana, akýan ýyly suw, mugt süýt, nahar üpjün edýän "güýçsüzje" döwletlermi ýa-da täze-täze ýerlere höküm etmäge ymtylýan, häli biriniň buýsanç bilen aýdyşy ýaly, "dünýäde imperiýa diýip ykrar edilen", emma ilatynyň 70 göterimi lagym ulgamsyz, çukurly agaç hajathanalar bilen oňýan, emma halklara nähili ýaşamalydygyny öwretjek bolýan döwletleriň?

Meniň pikirimçe, döwlet "imperiýa" bolmasyn, emma zenanlary we çagalary lüýk bolup ýatan hajathanalary ulanman, lowurdap duran ýerlere girsinler, ine, şonda ol döwlet - beýik, gaýratly, zor döwlet boldygy.

Her ýurt parahatçylyk bilen, diňe öz halkynyň bähbidini oýlap össe, bolunman durjak zat däl.

Ýok, "men diňe imperiýa bolup ýaşap bilýärin, hallklary täzeden tabyn etjek" diýip dyzasaň, olam bir ýol. Ýöne öňküje günüňi tapaýsaň ýagşy.

0
12 Haweran  
411
Agageldi, çykyşlaryñy seýrekledýäñ.
Saýtda köp çykyş etmegiñi isleýän awtorlarymdansyñyz.

Teswiri diňe saýta agza bolan ulanjylar goşup bilýär.
[ Agza bol | Saýta gir ]