20:44 Internet / satiriki hekaýa | |
INTERNET
Iş otagyma gelip, ýaňy bir stolumyň başyna geçendirin, işdeş gelnejelerimiň biri (gelnejeler diýsemem, olar bary-ýogy iki sanydy) gapyny kakyp, içerik ätledi. Giribem, begenmekden ýaňa oturmana karary ýetmeýän ýaly, gapyň iç tarapynda ozalam idili togalak bolmadyk gözlerini hasam inçeldip, ýylgyrdy durdy. “Oturaýyň” diýip, zordan oturtdym. Gözel gelnejäniň bu bolup durşuna diňkämi dikip, pikirlenmän durup bilmedim. “Ýylgyrmakdan ýaňa erni ernine degenok welin, lotareýasy utaýdymyka”. – Edaradakylaň käbiri gaty zalym-aý. Ol ýylgyrmasyny kesmän sorag berdi “-Näme, göwnüňe degýän barmy, Döwran?! Men stolumyň üstündäki zatlary saýhallamaga durdum. – Wah, göwnüňe degseler ne ýagşy, onda bir çäresini tapsa bor-la. Ýöne aramyzda ýeke ýylgyrýanlar bar. Ine, şolara alaç ýok. Näme diýjek bolanyma henizem düşünip bilmedik Gözel gelneje otaga gireni bäri birinji gezek dodaklaryny degirip, şol bir görnüşde saklady. – Sen bir zad-a diýjek bolýaň, Döwran! – Menem ýylgyryp bilerdim, eger isleseň diýjek bolýan, gelleje! Gözel gelneje bu kakdyrmama-da düşünmän, gaýta ýene özüni müýnli hasaplady. Men gydyrdanmamy goýdum. Ellerimiňaýalaryny ünsli diňleýän görnüşde stola diredim-de oňa ýüzlendim: – Ýeri, ýeri… Oýun etdim-le, gelleje. Näme hyzmat? Ol öýmesiniňçowuny öz ygtyýaryna goýberdi-de, haýallyk bilen gapjygyny açdy. Çekinibräk gürledi: -Neme… Bir ýyl bäri maňa-da sensyr alyp ber, sensyr alyp ber diýip, halys ýalbaramsoň, adamym düýn şuny alyp berdi – diýip, açylan gapjygyndan uly ekeranly telefon çykardy. “Mesele düşnükli”. Işdeşimiň begenjine “şärikdeş” halda ernimi gulagma ýetirdim: -Tüweleme, gutly bolsun, Gözel gelleje, toýly telefon bolsun! Olam birde maňa, birde-de telefonyna seredip, azajyk ýylgyran ýaly etdi-de, “Hawa, sag bol” diýdi. Soňam wagtynyň az, arassalamaly otaglarynyň bolsa heniz biriniň-de başyna barylmanlygyny nygtap, esasy meselä geçdi: -Neme, Döwran jan! Şular ýaly telefonlaryň intirnedine girip, ýeriň aňry ujundaky täzelikleri okap oturmaly diýýäler welin, şuňkynam açyp beräý – diýip, jogaba garaşýan ýaly, birazajyk dymdy-da, ýene sözüniň üstüni ýetirdi. -Özüm oňly düşünmämsoň kimden haýyş etjegmi bilmän, ýaňy Sadaba nirinden girilýänini görkezäý diýsem, olam “Ilki düzmeli” diýdi. “Nestiroýka” diýdimi, “Laýn” diýdimi… “Meň telefonymam düzüp ber-dä onda” diýsem, olam ogluna düzdüripmiş. Artyp galmyş. Şolar ýaly köp bilmişligi bilen telefona gezek gelende ýan beren bolsa, Sadabam indi garrap ugrapdyr. Ýöne mundan öňki “zatlara” aň ýetiren aklyň, gel-gel, bu günki gün telefona düşünip bilmedimi diýseň, “Garrap ugrapdyryn” diýmez. Gaýta “Gözüňe zyýanly bolansoň kän ünsem beremok” diýer ýa-da şoňa meňzeşräk bahanalar bilen özüni aklan bolar. Men bolsa Gözel gelnejäniň janygyp edýän gürrüňine dä-lde, umyt bilen bakyp oturyşyna ünsüm eglendi. Oýun edesim geldi. Ýogsa men kän bir degişgen oglanam däl. Ýöne ýeri gelende degişmegi, onda-da beter degişmegi bijaý oňat görýän. Zandym şeýle. – Başga zat aýtmadymy ol?! Gözel “Ýok, başga zad-a aýtmady ol” diýdi-de, begenip oturanlygyny hem ýadyndan çykaryp, maňa soragly nazaryny gezedi. Men ynandyryjylyk bilen başymy ýaýkadym. Telefony elimde saklap oturşyma “Juk, heýý…” diýdim. – Sadap gelneje-de ýuka ýürek bir zat-da. Sähel bir üýtgeşik zat aýtmaly bolsa, duran ýeri, şol çekinip ýörşi. Aslynda, çekiner ýaly zadam däl welin bi… Sadap gelneje-dä… Edil şol wagt Sözümiñ nähili täsir edýänine göz ýetirmek üçin Gözel gelnejä bakdym. Ol, hakykatdanam, ynanan bolsa nätjek. Seretsem, kakasyndan pul sorap, indem umyt bilen garaşyp duran gyzjagaz ýaly, şeýle bir naýynjarja bolup bakyp duran eken. Zordan nazarymy sowup ýetişdim. Ýogsa onuň bu seredip oturşy oňuna bolup barýan degişmämem terk etdiripd-ä tas. Men: “Esasy zady aýtmandyra ol” diýip, gürrüňime başladym: “Ilki bilen-ä, internede girmek üçin maşgala agzalaňdan “Rugsatnama” gerek. Soňam maşgala sanyňbarada, ýaşaýanlygyň barada oba geňeşligiňizden “Kepilnama” gerek. Paspurdyň bilen adistadyň, nika şadatnamaň kopýalary, birem 3×4-lük suratdan alty sanysy gerek” diýdim. Bulary eşidip, Gözeliň nähili bolanyny bir görsediňiz . Muňa, gözüň bilen göräýmeseň, ynanar ýaly däl … Şonda onuň öýmesiniň gyrasyndan ýalpyldapjyk görünip duran saçlary hüjjerip, birinji gezek giň açylan agzynyň içindäki akja dişleri sanaýmaly bolup göründi. Şol iki aralykda-da mümkin adamsynyň hem görüp bilmedik dyzzyk gözleriniň doly açylanyna-da şaýat bolmak bagty miýesser etdi. O barmana-da: “Hiýhh. Tobaaa, olar ýaly bolsa, geregi ýok oň” – diýdi-de, agzyny gizlän elleri bilen ýaňy bir orta ýaşa ýetip, ýarsyp ugran bedenine ýelmeşip duran köýneginiň ýakasyny galdyryp, bir-ki gezek tüfledi-de, telefonyny gysymlap, zut çykdy. Men degişmämden göwnüm hoş bolup gülüp oturşyma “Soňurrak ötünç soraryn-da” diýip, gözümiň çygyny süpürip galdym. Wepa PIRNEPESOW. | |
|
Teswirleriň ählisi: 2 | |||
| |||