Mähriban

MÄHRIBAN

Goý birikdirmän geçsin bizi ýyllar...
ýollar... ýodalar... Kesişmesin ekwatoryň çyzyklary. Aýry dünýäňde ýaşaber. Ýöne aglama diýjek däl saňa. Gizle diňe gözýaşlarňy. Men seniň, her näme-de bolsa, güýçlidigiňe ynanýan. Göresiň gelse, senem şol pursatda ýatlaýanymy, ýüregiň sesini diňleýänimi unutmagyn hiç haçan. Seniň her wagtky ahwalyňy bilýändirin bary bir. Aýdyber arzyň bolsa maňa, diňlärin. Bilýäňmi juda ýakynymda gürleýäniňi.
Täze günler bilen gatnaýaňmy işiňe? Şol pursatlar aýyryp goýber ähli kineleriňi. Göwnüň tans etsin her säheriň täze sazyna. Giň ulagyň penjiresinden däl, assaja ädimläp, synla-da, dünýäni. Parhsyz geçmäli indi bir hiç zatlardan.
"Garaşgyn bararyn" diýipdim. Ýöne bilýäňmi men nirede eglenýänimi...
Her gün ýaşanda, gyzyl şapakda...
Ýagyşlarda, ýaşlarda her damjalarda eglenýän-dä men.
Onsaňam aýna däl ahyry barýan ýodalam. Çaňly, tozanly ýodalarda men. Sen maňa garaş ýöne bolýamy? Bu ýodalaryň bary bir ýola birigýär ahyry.

Bilbil KAKABAÝEWA.