Men

MEN

Ne ömrümi, ne pulumy gaýgyrdym,
Arş-kürsde,
ters-dürsde
bilmedim ýerläp.
Mawy asman içre gaýgymy sürdüm,
Çöller içre akdym sil deý heserläp.

Yşk ah ursa dünýäniň dürs ýüzünde,
Çöwresinde ýer goduklap, gaý turar.
Ýürekden ataşly sözler üzülse,
Jahany lerzana salar duýgulam.

Keşt eýledim harasada atlanyp,
Men bir apy-tupan,
Gara ýeldirin!
Kalbymda uzaýar gögüň nagrasy,
Arşy çat açdyryp çaksa ýyldyrym.

Goý, heňňamlar biljek bolup kimligmi,
Jedel etsin,
pitjiň atsyn,
pal atsyn!
Alla bilýär, şahyr bolup bildimmi?
Ýöne şahyr kibi ýaşanym hakdyr!

Nobatguly REJEBOW.