Müñ bir many

AFORIZMLER

Söz berip unutdym diýmek, iki gezek aldamakdyr.

* * *

Bela iki bulanýan zatdan geler, eliňden ýa-da diliňden.

* * *

Zyýan çekmeseň ýagşy bolmarsyň, nuruňy dökmeseň ýagty bolmarsyň.

* * *

Eden ýagşylygyň ýarysy gaýdyp gelse hem, baryndan köpdür.

* * *

Alladan gorkanyň ýaşy uzalar, adamdan gorkanyň ýaşy üzüler.

* * *

Ahlagyňy gora, wyždanyňdan sora.
Namysy gora, halka görä ýöre.

* * *

Dünýäde iñ gymmatly iki zat bolsa, biri ynamdyr.

* * *

Akmagyñ öwgüsinden akyllynyñ käýinji ýagşy.

* * *

Öwrenmek ruhuñ çeşmesidir.

* * *

Öwrenmek öwretmekden has peýdalydyr.

* * *

Wepalylylygy itden öwren, ýöne adamlara wepaly bol.

* * *

Duşman gulakdan girer agyzdan çykar.

* * *

Özüñi özüñden özge tanar.

* * *

Dostuñ goltugyndan tut-- ýykylmasyn, duşmanyñ goltugyndan tut--topulmasyn.

* * *

Dostuñ hem, donuñ hem könesi ýagşy, dostuñ könesirehimdar bolar, donuñ könesi ýadygär.

* * *

Ulumsylyk, gedemlik namysjañlyk däldir.

Sapardurdy NAZLYÝEWIÑ "Müñ bir many" kitabynda.

Awtor barada:

Sapardurdy Nazlyýew 1957-nji ýylyň 3-nji sentýabrynda Balkan welaýatynyň Bereket etrabynda doguldy. 1974-nji ýylda orta mekdebi tamamlady. 1975–1977-nji ýyllarda  harby gullukda boldy. 1984-nji ýyl-da Türkmen oba hojalyk institutynyň  agronomçylyk fakultetini tamamlap, alym-agronom hünärine eýe boldy  we dürli wezipelerde zähmet çekdi.
Sapardurdy Nazlyýew türkmen edebiýaty, döredijilik, pederlerimiziň bize galdyran edebi mirasy, däp-dessurlarymyz, durmuşda ynsan gatnaşyklary ýaly mowzuklar bilen mekdep ýyllaryndan bäri gyzyklanyp, bular babatda serine gelen pikirlerini özüçe ýandepderçesine hemişe bellik edip, toplap, olary gazet-žurnallaryň üsti bilen halk köpçüligine ýetirip geldi.
Sapardurdy Nazlyýew häzirki wagtda hormatly dynç  alyşda bolmak bilen, Türkmenbaşy şäherinde ýaşaýar.

Kitap barada

Jaýdar aýdylan sözler ynsan kalbyna baryp ornaýar. Sapardurdy Nazlyýewiň danalyk bilen aýdan sözlerinden düzülen bu kitap onuň aýdyň mysalydyr. Onda adamyň ýaşaýyş-durmuşynyň  ähli taraplaryna degişli aýdylan sözlere gabat gelinýär. Bu bolsa kitabyň awtorynyň durmuşa synçylygyndan, adam häsiýetlerini beletliginden hem‑de belent adamkärçiliginden habar berýär. Onuňam üstesine-de, bu kitap durmuş tejribesiniň, adamyň köpçülik bilen gatnaşyklarynyň beýanydyr. Kitap giň okyjylar köpçüligine niýetlenilendir.