Главная » 2023 » Fewral » 15 » Eziz Amannazarow aradan çykdy...
23:45

Eziz Amannazarow aradan çykdy...


• Şu gün - 15-nji fewralda ýaş şahyr Eziz Amannazarow aradan çykdy. Merhuma iman baýlygyny dileýäris.

◇ Şahyr hakynda

Eziz Baýramgeldiýewiç Amannazarow 1999-njy ýylyň 5-nji iýulynda Aşgabat şäherinde doguldy.
Maşgala ýagdaýy sebäpli Mary welaýatynyň Ýolöten etrabyna göçüp gelýärler.
2019-njy ýylda Ýolöten şäherindäki 12-nji orta mekdebi tamamlap, 2019–2021-nji ýyllar aralygynda harby gullukda bolýar.
Demir ussaçylygy işi bilen meşgullandy.
Eziz Amannazarow 2023-nji ýylyň 15-nji fewralynda biwagt aradan çykdy.

• MEN ŞAHYR DÄL

Ýeri şahyr dälmi, bolman ekenim.
Belki Puşkin, Pyragam däldir şahyr.
Ynanman olara dünýäň sepini,
Aldylar nadanlar, aldylar ahyr.

Aldylar dünýäni Zülkarneýn däl,
Çingiz han däl, olar ýer garbap ýatyr.
Günäsiz halk saýlyp gyrlan nadanlar
Gyrlan çaýyr deýin gögerip otyr.
(Belki olar bilmän gyran däldirler)
Ýöne köki bilen aljak zadyň ýok,
Çünki seni Rüstem edip döreden
Ataň gany şol köklere siňensoň,
Haýsy Rüstem oňa gyljyn ýöreder.

Şol çaýyrlaň töňňe deýin kökleri,
Ýeriň çyzyk açan jaýrygyn ýaryp,
Ikä bölüp, hatda uçdy kepderi,
Şol kökden eklenen gurçugy görüp.

Çarhy pelek çolaşypdyr, çözmäge
Güýçsiz saýlyp, gyra çeklen Pyragy,
Namys edip, şahyr sözün ýazmaga
Çydap bilmän içdi diýseň şeraby,

Ynanardym. Ýöne şahyr däl olar,
Beýle akmak sözüň git, şahyra diý.
Hem siňsin köklere içaly ýaly,
Olardan dünýäni alansoňlar heý
Şahyr saýylmajak gümany barmy,.
Ýöne diý girmänkä göreşe heniz:
- Perişdemiň, Adam, günäň bir azmy?

Ýeri, şahyr dälmi, bolman ekenim,
Belki, Puşkin, Pyragam däldir şahyr.
Nadanlardan alyp bilseň-ä ýagşy,
Almasaň dünýäni, öljekmi ahyr.
Ondan dertden dörän şygrym seçeýin,
Goý, şahyr bolmasam, bolman geçeýin.

Eziz AMANNAZAROW.
Категория: Taryhda şu gün | Просмотров: 976 | Добавил: Haweran | Теги: Eziz Amannazarоw | Рейтинг: 4.1/7
Awtoryň başga makalalary

Taryhda şu gün bölümiň başga makalalary


Teswirleriň ählisi: 7
0
1 Haweran  
411
Nähili manysyz dünýe...
Ýañy açylyp gelýän gunça ýaly ter zehin... Beýle-de bir nowça ölüm bormy diýsene. Dünýäñ öñem bir tekeri sypyk, bir ondan-bir mundan urup, haçan nirä gapgaryljagy belli däl halda şalkyldap barşyna halaýygyñ göwni bar zatdan sowady welin, onda-da beýle ýaş ölüm bolmasa gowy ýaly.
Allaha öwretmäge bendesiniñ çakam bolmaz, hetdem. Ýogsam bolmanda bu biderek dünýäñ sansyzy, ile-güne peýdasyz nekgendesi, garamöý ýaly ebeteýini tapsa öñünden çykany awundyrjak bolup ýören zannyýamany... gytmy aljak diýse...
Nobat bilen, öz islegimiz bilen, ýa zakaz bilen gidilenok-da, edil gelişimizdäki ýaly..

* * *

Neresse, utanjañ oglan bolmaly çakymça. Goşgularyny deñ-duşy @Edebiyatşynas (Merdan Babaýew) agza goýardy. Tankydy bellik edilmegini, gozgayan meseleleriniñ üstünde garşylyklaýyn pikir alşylmagyny isleyän bolmaly, her gezek goşgusy goýlanda, @Edebiyatşynas agza okyjylaryñ goşgy hakda pikirlerini sorardy. Diýmek, tankydy pikire açyk, öz üstünde işlemegi bilýän, ösmäge-kämilleşmäge ilgezik, şol sanda öwgä mätäçlik duýmaýan, ýöne şoña añryýany bilen mynasyp zehinli oglan eken. Alkymymyza geldi, saýtda goşgularyny paýlaşdy, bugdaý sözümizi gysgandyk. Sen bizden razy bol, inim. Şu gynanjy okap, Seniñ ü.n gynanç bildirjek, doga-dileg etjek ildeşlerimiziñ hem dilegleri duş bolsun, alnyña barsyn!
Ýatan ýeriñ ýagty, jaýyñ jennet, perişdeler ýaranyñ, ahyret ýoldaşyñ imanyñ bolsun!

* * *

Nätjek, elimizden başga zat gelmedi, pataña görünmäge mümkinçilik ýok, hem ara daş, hem işden sypynyp bolanok. Şoñ üçinem ýakynlaryña sabyr-kanagat, giñlik diläp, gynanç bildirmek üçin şu blogy paýlaşdyk. Ruhuñ bizden şat bolsun!
Allahym, ahyretde saña jennet guşy bolup ene-atañ öñünden çykmak we olaryñam özüñ bilen bile jennete girmäge sebäpkär boljak ýagşy perzentlerinden etsin!

0
2 sylapberdimuhamov  
1428
Merhuma iman baylygyny dileýän diýen yaly şablon bolan sözler kelläñe gelýär. Bada özüñi ýigrenip gidýäñ.
Jaýy jennetden bolsun!
Imany hemra bolsun!
Bu sözjükler merhuma gerek däl. Ol bu dünýäñ azabyndan dynansoñ...
Men bolsa şeyle şahyr yigidiñ bardygynam bilemok. Başagaý dünýäde...
Gör, nähili gapyl biz...
Ey-y dünýee.

0
3 Yusup  
50
Hemmämizem bu dünýäde ötegçi. Ýöne ölüm bilen ölümiň parhy kän. Ýaş gitmek gynandyrjy. Allah rahmat etsin

0
4 Aydogdy  
1407
Çagasynyñ aýagyna tiken çümse, enañ ýuregine çümen ýaly bolýa. Perzent dagyny çekmek ene-ata, hasam ene üçin kyn. Durmuş oýlaýşyñdan has ýowuz... Enesiniñ ýuregine, kalbyna Allañ ozi giñlik, aram bersin. Eziziñem ýatan ýeri yagty bolsyn.

0
5 Ependi  
284
Neresse, aramyzdan ir gidipdir. Talanty, zehini ir ýetişen oglan eken. Gynandym, nebir şygryýetiň ýaş nahallarynyň biri. Yzynda galanlara, maşgasyna saglyk dileýän! Giňräk bolsunlar.

0
6 Baradin  
1465
Alla jan iman baýlygyny bersin.

0
7 Remezan  
1397
Iman baýlygyny bersin! Goşgularynda welin gidenden soñ düşünýäñ, bu bolsa geleñsizlik ýa-da tanalmaýanlygy üçin üns bermeýäs. Goşgularynda özüniñ haraý isleýändigi barasynda belläp geçipdir. Ýalan barysy ýalan. Özüniñ geljegini öñünden aýdypdyr. Iki dünýäñ owarrasy bolup, özi ahyr ýoluny seçipdir. Hossarlaryna bolsa giñlik bersin. Zehinli ogul, Alla goý, onuñ şahyr bolup dogulup ýaşamagyny dowamyny bersin.

Teswiri diňe saýta agza bolan ulanjylar goşup bilýär.
[ Agza bol | Saýta gir ]