Garagumda

GARAGUMDA

Garagumda garaldym,
Ulaldym Garagumda.
Söýýän ony, gyzgyn ol
Meniň päk ýüregim deý.

“Munda başym agaryp,
Hassalasam owarram.
Ýüze ýalyn çabyrap,
Tüsselese owarram.

Munda bar zat sadadyr,
Munda bar zat tebigy,
Sergin sähraň howasy
Ähli derdiň tebibi.

Çopanlaryň naharnyň
Bolmaz birem erbedi,
Içlekliniň, owmajyň
Üýtgeşikdir lezzeti.

Tagamlydyr, datlydyr,
Süýjüdir hemme nanam,
Ýöne başga tagamy
Sährada gömme nanyň.

Bir käse ak ýag içseň,
Bolýar suwsaman oňup.
Derlemersiň jöwzada,
Gyşda kär etmez sowuk.

Ýüregiňe teselli,
Kalbyňa medetdir çöl.
Bedeniňe berdaşdyr,
Saglykdyr, edepdir çöl.

“Öwren köşek, sähranyň
Şatysyna dözmegi”,
Ine, çopan atamyň
Oňat görýän sözleri.

Özüm edýän atamyň
Güýjüm ýetýän işlerin.
Öwrendim gowa sowup,
Öwrendim ýüp işmegi.

Düýä odun urmagy,
Ýallamagy itleri,
Öwrendim. Çöle şeýdip
Öwrenişip gitmeli.

Hiç halamaz ýaltany
Bedenmiň bekäni çöl,
Şu sözlerden al many
Mertleriň mekany çöl.

Çuň sähranyň guýusy
Atamyň ýüregi deý.
Uzap ýatyr guýguç dek
Zeminiň ýüregine.

Oňa boýnuň uzadyp,
Pyşyrdasaň çalaja.
Sesiňi towlap-towlap
Äkidýär ýüz gulaja.

Bir äpet tüýdük ýaly
Diýersiň “tüweleme”.
Hatda gysgadyr ondan
Uzynak tüweleýem.

Ýüregim meň Garagum,
Gyzgyn ol ýüregim dek.
Söýýän ony, çünki men
Doguldym Garagumda.

Gorky bizden uzakda
Ol bize sary gelmez,
Harasatdan gorkamok,
Gorkamok sary ýelden.

Gorar bizi sowukdan
Çopanlaryň baýlygy:
Ýatajym bar başymda,
Bar egnimde oýlugym.

Gyşyna sähel salym
Sowuk bolanda näme?!
Ýaz ýylgyryp gelende
Guşlar çalarlar nama.

Hol gökde älemgoşar
Öwsüp dur dürli-dürli,
Sähra giň göz ýetenok,
Hatda ýetenok dürbi.

Maňa elin bulaýar
Gülleriň gaty käni,
Düýäm meniň ak gämi
Men onuň kapitany.

Bulutlaň gujagy ak,
Günüň kirpigi gyzyl,
Bu görnüşi synlamak
Nähili hezil, hezil.

Nähili hezil, hezil
Asman ýaşyl, ýaşyl ýer
Ganat gerip çarlak deý
Uçup gidesiň geler.

Ezýaka köýnegimiň
Ýakasyn galgatsa ýel.
Şonda akja çarlaga
Meňzeşdirnem belki men.

Sähra gülden dokalan
Haly – kän-kän gölleri,
Sähra – deňiz, depeler
Äpet-äpet gomlary.

Süýşýär ýuwaş-ýuwaşdan
Goşa tarap “ak gämi”
Çelgi görünýär daşdan
Çagyrýar maýak ýaly.

Gurbandurdy ORAZOW

#çagalara degişli 13-nji goşgy. «Mähek bilen Röwşen. Çagalara degişli goşgulary» kitabyň soňy.