ADOLF GİTLER TÜRKMI?
Gitler elbetde türk däl! Emma, ynha görersiñiz, haçanam bolsa bir gün kimdir bir alasamsygyñ biri "Gitler türk bolupdyr!" diýen samsyklaç gürrüñi orta atar we faşistik Germaniýanyñ amala aşyran ýewreý genosidini türk milletiniñ boýnuna atmagyñ ýollaryny gözläp başlarlar, aramyzdan biri çykybam "Hawa, dogry. Gitler türkdi, murty türk murty, boýy orta boýly, ýagny türk boýy" diýibem oňa güwä geçer. Yzyndanam "Taryhymyz bilen ýüzleşeliñ!" ady bilen köpçülikleýin çykyşlar başlar... Ýagdaýlaryñ şu gidişi bilen şeýle boljagy daşam däl.
"Eý-hoo, heý, şeýle-de bir zat bormy Osmanly döwleti Ispaniýadan, Türkiýe respublikasy-da Gitler Germaniýasyndan gaçan ýewreýleri gujak açyp garşylamadymy? Taryhy hakykatlary beýdibem ýoýmañ ahbetin!" diýenlerem bolar elbetde, olaryñky bu babatda dogrudyram.
Ýöne biziñ aýdýanlarymyzy-da bütinleý nädogry hasaplap bolmaz. Sebäbi hakykatdanam juda geñ-taňsy üýtgeşmeler bolup geçýär. Ikinji jahan urşunda Gitleriñ toýnagyny gyrkan iñ uly we ýeke-täk güýç SSSR däldimi näme? Orsyýediñ "Onuñ alyhezretleri Gyş pasly" däldimi näme zömpük nilli tanklary bilen öñünden çykany mynjyradyp geçen nemes faşistleriniñ öñüne böwet bolan we olary derbi-dagyn eden?
Hut şeýle! Hut şeýleligine şeýle welin, Ýewropanyñ Ykdysady hyzmatdaşlyk we howpsuzlyk guramasy (YHHG) toý-baýramyñ däl, dabaranyñ däl, näme üçin hut faşistler bilen sowetleri adamzada garşy edilen etmişe şärikdeş tutan kararyñ astyna gol çekdikä?
Ýewropanyñ gözünde indi ýewreý genosidiniñ ýeke-täk jogapkäri faşistik Germaniýa we Gitler däl, Gitler bilen deñ derejede Stalin, Germaniýa bilen deñ derejede-de Russiýa jogapkärmişin...
Häzir nobat Russiýada "Taryhymyz bilen ýüzleşeliñ!" diýäýjek ruslary tapmaga geldi, göreliñ bakaly, bu hususda Russiýa Türkiýe ýaly kellesi göçgünlimi?
"Dur-ow, zaluwat, intelligensiýamyzy gereginden artyk gorjalaýañ" dagy diýiji bolaýmañ. Eger şeýtseñiz, onda menem size Kiprde bolup geçenleri we şol günlerden häzirki günlere gelişimizi ýatlatmaga mejbur bolaryn welin, kelläñiz güp çişer.
Özüñiz bilýäñiz, Kiprde aýaga galan rumlar "adada ýeke türk goýman gyrmak" üçin ýaraga ýapyşypdy we türkleriñ ýaşaýan ilatly punktlaryny gabap, ganhorçylykly hereketlere başlapdylar. Türkiýe hem öz gezeginde şertnamada bellenilen hukugyna esaslanyp Kipre giripdi we uly gyrgynçylygyñ öñüni alypdy, munuñ öwezini bolsa embargolar, ykdysasy gysyşlar, halkara arenada süşüşmeler bilen agyr ödäpdi.
Şol gün mehmetjigimizi gözýaşa boglup garşylanlaryñ arasyndan şugünki günde "türk esgeri adada basybalyjydyr" diýenleri çykardylar, döretdiler...
"Biziñ hemmämiz ermeni!" diýenlerem biziñ aramyzdan çykypdy. Şu gidişimiz bilen Gitleriñ aslynyñ türkdügini orta atyp bilerler we muny subut etmekde hiç hili kynçylyk çekmezler...
Özüñiz bilýäñiz, Osmanly goşunlary Wenany iki gezek gabapdy. Bu gabawda ýesir düşenleriñ arasynda türk gyzlary-da bolupdyr. Meselem, häzir Gýotäniñ ejesiniñ gelip çykyşy boýunça Selimiñ neslinden gelýändigini subut etjege meñzeýärler. Ýesir düşen türk erkekleri we gyzlary dinlerini üýtgedensirän bolsalaram, aslynda dinlerinem, milliliklerinem gorap saklapdyrlar. Ynha, şular ýaly zada esaslanyp, haçanam bolsa kimdir biri orta çykyp "Gitleriñem enesi türk bolupdyr" diýmegi daşda däl. Hatda şeýle-de diýip biler: "Musulman we türk ejesi Gitleri barypýatan ýewreý duşmany edip ýetişdirdi. Sebäbi Gurhanda ýewreýleriñ garşysyna köpsanly aýat bar, munuñam üstesine Gitleriñ ejesiniñ ýewreý goñşusy bardy, oñşuklary-da gowy däldi!"
Şeýdip, bir okda iki towşan... Türkler we Gurhan! Ýagny, yslam... Gülkünç gerek? Bolanda näme!..
YHHG-nyñ parlamentar assambleýasynyñ Gitleriñ eden etmişlerine ruslary şärik etmesi-de gülkünç ýalydy, emma bu gülkünç zat amala aşdy...
Etmedik genosidini SSSR-e ýöñkän Ýewropa Staliniñ türki halklara garşy eden genosidini, meselem Krym tatarlaryna garşy geçiren genosidini üns merkezine alasy gelenok, ol wajyp zat däl. Sebäbi olar türki we musulman halklar...
Kiprde türk esgerine basybalyjy we "Ermenileri gyrdyk, taryhymyz bilen ýüzleşeliñ!" diýenlerimiz ruslaryñ türki halklara garşy geçiren genosidine pitiwa edenoklar, etmezlerem!.. Olaryñ pikirine görä, "Türkiler bolsa oñaraýypdyrlar!"
Haçanam bolsa bir gün alasamsygyñ biri çykyp "Gitleriñ ejesi türk bolupdyr" diýende, görersiñiz: Sorosyñ Türkiýede ýaşaýan onlarça zürýady çykyp ilki "Bolup biler" diýer, yzyndanam "Hawa, hakykatdanam şeýle bolsa näme!" diýen bolup emeli subutnnamalar döreder we bir gün ir bilen oýananymyzda gazet sahypalarynda we teleýaýlymlarda "Taryhymyz bilen ýüzleşeliñ!" diýýänler bilen ýüzbe-ýüz bolarsyñyz... Häzirden aýdyp goýdugym bolsun... Şol gün gelende geñirgenip durmañ...
Hasan DEMIR.
@ Gazete_Yenicag, 2009.
-1
