EZIZIM
Baharmy sen, sähermi sen, gülmi sen?!
Şekermi sen, nabatmy sen balmy sen?!
Perimi sen peýkermi sen, aýmy sen?!
Bilmen ne gudratyň baryn ezizim!
Söýgimi sen, mähirmi sen ýazmy sen?
Aýdymy sen, gazalmy sen sazmy sen?!
Laçynmy sen, sülgünmi sen gazmy sen?!
Bilmen ne gudratyň baryn ezizim!
Hurmamy sen, enarmy sen, narmy sen
Şatlykmy sen, gülkimi sen, tarmy sen,
Aklykmy sen, päklik, namys-army sen,
Bilmen ne gudratyň baryn ezizim!
Baýdak boýly, uz basyşly näzleriň,
Daglara deňelýär gyzlyk mertebäň,
Seni ähli zatdan gözel görkezýän,
Seniň utanç-haýaň, edep-terbiýäň.
Gurbanmämmet MEREDOW.
