Dörtlemeler

DÖRTLEMELER

Gör, nije ýükleri göterer egin,
Ýürekde düwüler, gör nije düwün.
Egin ýüke görä döredilipdir,
Erkiňe göräde döräpdir göwün.

*****

Men nobat belläpdim, nobatym ýitdi.
Şum ykbal ýenede keçjallyk etdi.
Meň tabydym götermeli ýigitler,
Maňa öz tabydyn göterdip gitdi.

*****

Ýüküm ýetik, egnimde ýer galmady.
Umytdadym, arman tamam bolmady.
Mätäç bolup, ser aýladym daşyma,
Emma bir dosta-da gözüm ilmedi.

*****

Juwanlyk döwründe ýaşan çagymyz,
Wagtyň gadyryny bilmändiris biz.
Wagt geçýär diýip pikir edýärdik,
Asyl geçip barýas eken özümiz.

*****

Goltugymdan galdyr, egnimden basma,
Göwnüme giňlik sal, döşümi gysma.
Towluragam bolsa ömür tanapy,
Gysgaltma sen ony, ortadan kesme.

Azat NURGELDIÝEW.