Goşgudan galan gyýkyndylar

GOŞGUDAN GALAN GYÝKYNDYLAR

■ Aýy-Güni, ýüzüñe dogan wagty sylmaly.

■ Jeññeliñ jañy ~ jandarlary.

■ Oñat eseriñ başyndan girip, aýagyndan çyksañam, täsirinden çykyp bolanok.

■ Gojalygam bagty çüwene miýesser edýär.

■ Azyndan ýüz ýaşap bilmeseñ, günäni özüñden gözlemeli.

■ "Hudaýa-da gowusy gerek" diýen bolup, ölümem ýuwmarlaýarlar.

■ Mañlaýyña ýazylmadygy kagyza ýazmaly.

■ Çagalygyñ göçülip gaýdylan ýerde galýar.

■ Çemen goşgudanam bogulýar.

■ Çygly ýurduñ güli kän, gurak ýurduñ ~ ýyldyzy.

■ Azyksyz bol ~ ýazyksyz bol!

■ Öýüñden çykmaýan ~ öli.

■ Aždarhany göreñde, ýolbarsy dagam gujaklaberesiñ gelermiş...

■ Ýoluña görä ýöreýşim bar.

■ Oñlanmaýan dostluk derrew soñlanýar.

■ Ogully, gudasyna bir gün ýalbarar, gyzly ~ ölýänçä...

■ Gyzly ~ ýitirer, ogully getirer.

■ Diñe kelläñ däl, ýüregiñem gulajyklary bar.

■ Hoş habaram, edil gymmatbaha sowgat ýaly begendirýär.

■ Şert edeñsoñ, şertnama baglaşmak hökman däl.

■ Sagadyñ sekundomerini, iñlis lukmany Džon Floueriñ, adamyñ ýüreginiñ urşuny barlamak üçin döredendigini bilýärmiñ?

■ "Biziñ dagy bilýän zadymyz ýok eken-ow" diýýänçäñ öwrenibermeli.

■ Oñat eseri okap bolañsoñ, tukatlanýarmyñ?

■ Alkyş alanyñ üçin basanoklar.

■ Genileriñ beýnisiniñ iki sany çykyntgyjygy artykmaç.

■ Sözüñ bölünmegi, äsgerilmezligiñ alamatydyr.

■ Şahsyýet derejesine ýeteñsoñ, has oñat ýazmaly.

■ Görmezlige salynmak, "Baryñ-ýoguñ des-deñ" diýildigidir.

■ "Aýagyñ aşagynda agsaýan aty" çalyşmaly.

■ Ýedi arkañy bilýän bolsañ, ýedi atañam bilip goý: Adam atañ, Nuh atañ, sünnet atañ, azan atañ, öz atañ, gaýnatañ, ylym atañ.

■ Alyp utananyñdan berip utananyñ ýagşy.

■ Hakyda: sesem, ysam, reñkem, tagamam... ýazylýar...

■ Düýşüñe giren merhumy, düýşüñden, aýat okadyp çykarmaly.

■ Yşka düşeniñ gözem yşyga düşeniñki ýaly gapylýar.

■ Bäbejigiñ gulagyny, azan aýtdyryp deşýärler (açýarlar).

■ Giç açylan bagt hem edil güýz ýaly gamgyndyr.

■ Küşt ~ paýhaslaryñ söweşidir.

■ Mertebe ~ adamkärçiligiñ merdiwanydyr.

■ "Şuñ-a hiç zat bolanok" diýilýäniñ täleýini arzuw etmeli däl.

■ Agram düşende, beýniñ yzky bölegi agyrýar.

■ Sadaka bermek üçin sähet soralanok.

■ Kelläñi etegiñe salañda, telpegiñi çykaryp salmaly.

■ Özüñi artyk saýmaly däl, artyk saýdyrmaly.

■ Nalyşyñy Hudaýa ýetirmek üçin ses güýçlendirijiniñ derkary ýok.

■ Janam ýakyberseñ, gutarýar.

■ Ýüzüñ perdesi ~ utanç-haýa.

■ Nahardan, "Doýdum" diýmeli däl, "Boldum" diýmeli.

■ Dilegçä, "Geliñ-geçiñ!" diýmek hökman däl.

■ Garşylañda, öýe, myhmandan öñ girmeli, çykañda soñ çykmaly.

■ Ýasy sowulýança, "Ýogaldy" diýmeli, ýasy sowlansoñ, "Aradan çykdy" diýmeli.

Atajan ANNABERDIÝEW.