Keýmir babamyñ

KEÝMIR BABAMYÑ

Owazadar bolup älem-jahana,
Öz iline hökmi ýörän rowana,
Gazabyñdan ganym geldi amana,
Keýmir atly sahypkyran geçipdir.
ZENUBY

Ak sakgal gojalar söhbet açanda,
Danalar, gerçekler, joşup göçende,
Ruhy diri bu dünýäniñ göçünde -
Ilimiñ gerçegi Keýmir babamyñ.

Adybegiñ ogly Görogly atam,
Atanýaz han, Alp Gazan hatyram,
Hanlyk derejesi on bir arkadan -
Düýegöz dowamy Keýmir babamyñ.

Akyl, gaýrat, paýhas bile jemlenen,
Tutan işi il içinde oñlanan,
"Duşmanyna aždar bolup towlanan",*
Ýollary dogrudyr Keýmir babamyñ.

Ýasman bilen Saltyk atalar seri,
Çonak batyr bolar onuñ pederi,
Hyratda Antguýy dogulan ýeri -
Garagum galkany Keýmir babamyñ.

Kesgir gylyç, ýiti zehin, halat bar,
Mazlumlara, ulus-ile howandar,
Ýigreneni sütem edýän hökümdar -
Adalat eýesi Keýmir babamyñ.

Gözel ilim gul etmegiñ kastynda,
Nedir** gitdi galyp arman astynda,
Ugurly han otyr külüñ üstünde,
Mertebesi belent Keýmir babamyñ.

Tanalandyr Eýran, Turan, Yrakda,
Dilleri dogada, kalby sogapda,
Togsanda amanat tabşyran Hook-da***
Çonaklar tiresi Keýmir babamyñ.

12.02.87

Orazguly ANNAMYRADOW.