Ýa Biribar

ÝA BIRIBAR
Ýa Biribar, gördüm ýaryñ jemalyn,
Boýnuma alaýyn, öpsem webalyn,
Bize rowa gördi ak ýüzde halyn,
Kadyr Möwlam, meni hatyrjem eyle!

Derdine ýarasyn bar hany-manym,
Pälwanym şol bolsun, ýer guçsa ýanym,
Jynazamy çyksyn üzülse janym,
Kadyr Möwlam, meni hatyrjem eyle!

Ýerdäki nur ýaryñ sahyp jemaly,
Gül nepesi- ýalançynyñ şemaly,
Jümle-jahan saýdym gaşy helaly,
Kadyr Möwlam, meni hatyrjem eyle!

Doýa-doýa garap doýa bilmenem,
Ak synasyn köýden goýa bilmenem,
Ýardan öññe reñk, boýa bilmenem,
Kadyr Möwlam, meni hatyrjem eyle!

Ýa şahyr...
Al ýañak, gara göz, sümbül zülpleri,
Kadyr Alla halys beripdir peri.
Dag aşyryp dile saldyñ bu ýeri,
Daglar titireşýän jilwe-näz bilen.

Gelen egbarlanyp çöker dyzyna,
Ugran gaýry-gaýry bakar yzyna.
Kimi zar eýlediñ aýak tozuna,
Daglar titireşýän jilwe-näz bilen.

Perhady döreden sen dälmi eýse,
Ýa şahyr, ýa porhan kim seni söýse,
Ynsan ogly köýer, bir zatda köýse,
Daglar titireşýän jilwe-näz bilen.

Men ölsem aglama, saña gelişmez,
Hatyrjem bol, gybat dile gelişmez,
Kepenim özüñ tik, iller gülüşmez,
Daglar titireşýän jilwe-näz bilen.

Kakabaý YLÝASOW,
Türkmenistanyñ Halk ýazyjysy.