Meniñ täleýim

MENIÑ TÄLEÝIM

Özüme öwgi

Palçy aýal doglan ýylymy sorap,
Aýama äñedip, diýdi: - Eý, oglan,
Añsat düşmez saña özüñi gorap,
rahat ýaşamak,
sen "bars" ýyly doglan!

Gözlere dürtülýän batyrgaýlygyñ,
Başyña müñ gowga getirer günde.
Içinde bolarsyñ howpuñ-gaýlygyñ,
Mydam "ýörärsiñ sen gyljyñ ýüzünde".

Sebäbi, gylygyñ barsyñ gylygy,
Ähli boluşlaryñ bolşudyr barsyñ.
Özgeler oñarar ýaranjañlygy,
Azara-da galma, sen oñarmarsyñ.

Gönümelsiñ, aýdarsyñ sen aç-açan,
Şonuñ üçin senden heder ederler.
Dogry durup salyşmazlar hiç haçan,
Assyrynja "gapan gurup" giderler.

Dostlaşsañyz "ýylan" ikiñiz, meger,
Bir-biriñe peýda getirersiñiz.
Onuñ pähmi seniñ güýjüñi eger
Ugrukdyrsa, kän iş bitirersiñiz.

"Ýylky" jyrtlap, ynjalygyñ gaçyrsa,
Iýmseñem, serip bilersiñ läşin.
Eger sokaýmasa şahyny parsa.
"Sygryñam" dessine görersiñ işin.

"Towşanmy", "towukmy", "itmi"? "balykmy",
"Syçanmy", "maýmynmy", "doñuzmy", "goýun",
Galamasy saña erjeşip bilmez,
Güýjüñe, erkiñe bolarlar boýun.

Duşmanlaryñ degmeseler utarlar,
Degäýseler janlaryna jaý ýokdur.
Başlaryny diñe gaçyp gutarlar,
Ýüzbe-ýüz söweşde saña taý ýokdur.

Ýowuz uçutlardan böküp geçmäge
Täleý çakganlyfyn berendir barsyñ.
Ýöne bars töwekgel - häzir "göçmäge",
Sowukganly bolsañ, uzak ýaşarsyñ...

■ DERÝA

Oglan döwrümizde uly hatamyz:
Köplenç etme diýlen işi ederdik.
Derýadan gorkardy ene-atamyz
"Gitmäñ!" diýerdiler,
Hökman giderdik.

Gorkmazça-da däldi, aždarhañ bar-da,
Howumyz basardy towlanyp barşy.
Agyz urup, kä ol-kä bu kenarda,
Toraññydyr hyşalary goparşy.

...Galmandyr ol öñki derýadan nyşan:
Kä ýerleri ýatladyp dur kanaly.
Öñki haýbaty ýok, haly perişan,
Garrap tapdan düşen bir iner ýaly.

Joşýana meñzänok, esreýäne-de,
Däli Jeýhun diýlip at alan derýa.
Çägesöwje bir kiçijik hanada,
Täleýine kaýyl bolupjyk barýa.

Zeýkeş gazynmakdan bez bolupdyr il,
Kanal geçip, kän ýer duzly käl indi.
Toprag-a ol öñki şirin toprak däl,
Derýa-da ol öñki derýa däl indi.

"Biz Jeýhuny jylawladyk" diýýäris,
Bizi jylawlady biparh kowlan suw.
Bol hasyl ýerine puşman iýýäris,
Soñky puşman bolaýbilse ýagşy bu!

Hemra ŞIROW.