Ýol

ÝOL

Sataşyp bir derde, ertekilerde,
Ýola çykan her bir gaýratly merde,
Üç ýol garaşýardy, uzak bir ýerde,
"Gitse-geler", "Gitse-gelmez",
"Gümana".

O ýodalar bir-birinden aýrady,
Ilersi- ileri, gaýra-gaýrady,
"Gitse-gelerinde" guşlar saýrasa,
"Gümana ýol" gaplanypdy dumana.

Menem hyýallarmyñ raýyny ýykman,
Öz saýlan ýolumdan gitjekdim, hökman,
Çolaşan ýollarda "Ýol ýazgy" tapman,
Seretmek isledim, "Jemşit jamyna".

Ne jam tapdym, geljegime bakara,
Ne ýol tapdym, ömre gazyk kakara,
Dury çeşmäm kimi suwa ýakar-a?
Ertirlere öwrülende zamana,
Ýa siñermi, ömür soñsuz dumana?

Gyzylgül ANNAGYLYJOWA.