Neme diýmesi nämekä? / ýumoreska

NEME DIÝMESI NÄMEKÄ?

Soňky wagtda iş kabinetimdäki telefony bir jyn-a urupdyr. Asyl hat-petege elimi ýetiremok. Günuzyn şol jyrryldap dur.
Ynha, o günem gapydan girip-girmänkäm, başlady jyrryldysyna.
- Hawa, diňleýärin.
- Alýo, bi Bossanlarmy?
- Ýok, edara.
Goýup-goýmankam, täzeden jaň gelýär.
- Hawa.
- Alýo, alýo, Bossanlarmy?
- Ýok-how, jan dogan, bi edara.
Salym geçmän ýene zarňyldap başlady.
- Hawa (aňyrdan näzlije ses eşidilýär).
- Alýo, bi Dädişlermi? Dädiş, senmiň?
- Dädişler däl-de, edara bi.
- Goýsan-a oglan, sesiň-ä Dädişiň seasi...
Bat bilen trubkany ýerine okladym-da, içimden gargynmaga oturdym. Onýança ýene jaň geldi. Göterenimden haýbatly aýals esi göçüräýeýin diýýä.
- Aýu, bi özüňmi?
Aňka-taňka boldum. Dogrusy, näme diýjegimi bilmän sakawladym.
- Ýok, bi... Hawa.
- Näme sakawlap otyrsyň? Bazara bardyňmy? “Al” diýen zatlarymy alyp bildiňmi? Ýatdan çykaranyň dagy ýokdur-da hernä?
- Siz näme barada gürrüň edýäňiz?
- Näme, näme, “siz” diýen bolýaňmy? Bä-ä, haçandan bäri “siz” bolduk?
- Aý, jan dogan, siz başga ýere düşdüňiz.
- Onda näme, agzyňa suw alan ýaly aýtman otyrsyň?
- Wah, gezek bermeseňuiz nädeýin...
Aý, garaz, üznüksiz jaňlardan ýaňa halys bizarym çykdy. Üstesine gaharymam gelýär. Ahyry, bir hyýala münüp, gazap bilen telefon apparaty öňüme çekdim-de, nomeri aýlap başladym.
- Allo, bi elektro-agaragatnaşyk uzeliniň başlygymy?
- Ýok, bi kwartira.
Ýalňyşaýdym öýdýän. Howlukman täzeden aýlap ugradym.
- Allo, salawmaleýkim, hernä uzeliň başlygyna düşendirin-dä?
- Ýok, bi deri kabul edilýän edara.
Ör-gökden gelip, trubkany taşladym. Az-kem köşeşip, täzeden aýlamaga durdum.
- Allo, salam. Maňa uzeliň başlygy Küläýew gerekdi welin...
Aňyrdan janyýangynly ses eşidildi.
- A-how, bizar etdňiz-le. Heriňiz bir zat soran bolup, aňkamy aşyrdyňyz. Näme, edere işiňiz ýokmy? How, bi kwartira, eşidýäňmi, kwar-ti-ra!
- Agam, bagyşlaweri.
- Wah, gözüme görnäýseňiz-ä, nähili bagyşlaýandygymy aýdardym weli...
Hasyr-husur telehony ýerinde goýdum. Yzyny eşidäýsem gowulyk çykmajagy görnüp dur. Görýän weli, bi-de meniň günüme düşeniň biri bolmaly.
Birsalym dommarylyp oturdym. Şol aralykda ýene bir hyýal geldi. “Gel, şunuň nomerlerini çalşyrybam bir aýlap göreýin-le...” Başlaberdim. Şol barmana 4-5 gezek giden uzyn-uzyn zuguldydan soň, trubkany ýaryp barýan haýbatly ses ýaňlandy:
- Küläýew diňleýär.
Bä-ä, gudrat diýibem şuňa aýdaýsaň. Tapan rasionalizatorlyk teklibime begenjimden ýüregim agzymdan çykyp barýar. Herhal, zordan özümi ele alypdyryn.
- Allo, allo... men Uzynguly Tyrrykow, hol pylan edaranyň bäşinji ketdesi. Aý, agam jan, bi telefonymyz halys bulam-bujar bolup gitdi-le.
- Näme, näme?
- Bagyşlaň. Islän ýeriňe jaň edip bolanok, başga ýerlere düşýä. Başga ýerlere jaň edýänlerem, şü telefona düşýärler. Heý, bir...
Indi ol bada-bat jogap gaýtardy.
- Hä, şeý diýsene. Şol şikaýatdan, han ogul, ýükümiz ýetikdir. Aý, onsoňam, şü halka ýaranyp bolanok-how. Ilk-ä telefon nokadyny gurup beriň diýip, daşyňdan müň aýlanýarlar. Soňam “onsy eýle, munsy beýle” diýşip, başyňa ala ýabylynyň gününi salýarlar. Ýöen sen arkaýyn bolaý. Gül ýaly işlederis, ol biziň borjumyz ahyryn. Ine, häzirem şol barada uly iş geçirip otyryn. Asyl gül edersi, daş ederis, hek ederis. Hiç darykmaň. Ynha, aňyrsy bäş-on nemeden, nädersiňiz telefonlaryňyz sagat ýaly işläp dursa...
Monça boldum. Trubkany ýerinde goýup-goýmankam, ýene jaň geldi. Keýpiköklük bilen oňa elimi ýetirdim.
- Hawa.
- Alýo, bi Bossanlarmy?
Mylaýymlyk bilen hoşamaý jogap gaýtardym.
- Diňle, jigim, aňyrsy bäş-on nemeden Bossanlaram bolar, Dädişlerem bolar, hatda deri edarasam bolar. Hiç darykmaň, arkaýyn bolaýyň – diýdim-de, jogaba-da garaşman, ony emaý bilen ýerinde goýdum.
Birdenem akylyma aýlandym. “Allajanlarym, bäş-on nemesi bäş-on günmükän, bäş-on aýmykan ýa-da bäş-on ýyl... Öte eşiden däldirin-ä”.
Hiç hakydama getirip bilmesem näme. Ine, häzire çenlem şony aýyl-saýyl edip bilmän, oda galyp ýörün-dä.

Annaguly HOJAÝEW.

“Watan” gazeti, 1996 ý.