Yhlas

Gülnabat ANNAMUHAMMEDOWA

▶ YHLAS

Daýhan aýasyna düşen däneler,
Seçelendi arzuw kimin boz ýere.
Mahmal ýapynjaly gadym ene ýer,
Gujagyna basdy, hüwdüläp ýene.

Mähirden üwreýär naşy dänäni,
Türkmen topragynyñ mylaýym demi.
Ene söýgüsine ýugrulan şinäñ,
Heý-de, şatlygynyñ bolarmy çeni?!

Tylla zülplerini dökende güneş,
Şinäniñ kalbynda döreýär arzuw.
...Daýhan yhlasynda boý alan maýsa,
Zere öwrülmegi dileg edýär guw.

▶ TUDANA

Tuduñ saýasynda, ýabyñ başynda,
Beýnide möwç urýar pikir sil bolup.
Mazalyja bişen gara tudana,
Suw ýüzüne düşýär gara hal bolup.

Owadan şekile gönükdi gözler,
Beýni-de howlukdy ýazmaga setir.
Bu dünýäñ sowalyn çözüp bilmeseñ,
Ine, saña jogap,
Ajaýyp pikir.

Durmuş gazanynda gaýnaýyp, joşup,
Ornuñ tapmak üçin bişmeklik gerek.
Dünýäñ şirinligne goşulmak üçin,
Şahadan gögele düşmezlik gerek.

▶ SAZLAŞYK

Bu gözel dünýäni goşa didäme,
Sygdyryp bilýärin söýülen wagtym.
Älemiñ gursagna sygmaýan heñiñ,
Kalpda ýañlanşyna geñ galýar bagtam.

Joşgunyma haýran eýjejik serçe,
Bir dem dymyp, diñleýär meni.
Soñra çabga deýin ýüzläp, müñlerçe,
Gezek gaýtalaýar söýgüli heñi.

Jadyly owazdan oýanan güneş,
Nurlap barýar bagtly günleñ barysyn.
Tebigat hen Ynsan ~ Zemine dogan,
Yşk bilen sazlap ýör asman arasyn.

▶ ERK

Gahar joşup, ursa beýnä taýagyn,
Alar mäkäm tutan diliñ jylawun.
Erkiñ gandallasyn el-aýagyñy,
Dişiñ gysyp, öçür gahar alawun.

Gahara bäs gelmän gan guýlan gözler,
Oda ot oklaýan bir nepýagydyr.
Kanagat eýlemän atylan sözler,
Göwünleñ köşgüni ýykan ýalydyr.