Hatyra

HATYRA

Nemli gözlem gubarlanar,
Göç edende ak durnalar!
Awtordan.

Okap gaýga batdym şu gün,
Gazetde gamly goşgyny.
Ýatladym öten-geçeni,
Ýakynlary hem daşkyny.

Görüp-görüşeýin diýip,
Gelipdim oba - öýmüze.
Garry öýmiz deňdi biziň,
Dokuz dogan hemmämize.

Ýardam edip, jaý gurmaga,
Gatnaşypdy adam bary.
Kakam bilen bir hatarda,
Janypkeşdi agalary.

Pederimiň deň-duşlary,
Ah, nähili adamlardy.
Uruş, açlyk ýyllarynyň,
Ýowuzlygyn dadanlardy.

Hanha, diwarda- kesekde,
Bar olaryň el yzlary.
Agyr işlerden kakamyň
Aryp agy:rdy dyzlary.

Penjiräň döwük ýerine,
Pagta ýeňsiz dykylypdyr.
Kemaljanyň süren tigri,
Idegi ýok, ýykylypdyr.

Öz tikenje ýeňsizini,
Uýam Nursadap geýerdi.
Mydam gözi ýolda, Şajan:
Basymrak geliň - diýerdi.

Jigerlerim, öýde galan.
Ysyňyzy sora:ýyn-da!
Geläýiň-dä, gözýaşyma,
Gözýaşyňyz gara:ýyň-da!

...Okap bir gamly goşgyny,
Ýatladym öten geçeni.
Ata ýaşyn ýaşasaň-da,
Kaka küýselýär ekeni.

2020 ý.

* * *

Enäň ýaşy ýeten bolsa-da çene,
Uzak ömür oňa dilenýär ýene.
Ýaş dilemäň, gurbanyňyz bolaýyn -
Diýip, özelenýär bagrygan ene:

Ogul gitdi ýaş agtyjagymdy ýany,
Şolary ýitirip, ýitirdim jany.
Ýene bir pajyga gyzym äkitdi,
Bularsyz durmuşda hiý, barmy many?!

Balalarym bilen öldüm men telim,
Ýöne sowanok tenim.

2015 ý.