Arzuwlar ýörer

ARZUWLAR ÝÖRER

Söwdügim, sendedir maýa gowusy,
Bagry dilendir jañynyñ sesi,
Her saba, her säher göçüñ arkasy,
Agalar begleri arzuwlar ýörer.

Ulgam-ulgam bolup, gollar ýazylar,
Jeren kowar gök monjukly tazylar,
Burny ysyrgaly, çabytly gyzlar,
Hany, ýaýlam diýer, arzuwlar ýörer.

Däli köñül mydam söýer gowuny,
Algyr guşlar belent gurar öýüni,
Türkmen gyzy hatarlamyş maýany,
Hany, ýaýlam diýer, arzuwlar ýörer.

Garajaoglan diýr, ýürekde derdim,
Gözeli öwmäni dilime berdim,
Soltan hanym diýen ýardan aýryldym,
Ýaram ýürekdedir, syzylar ýörer.

✸ Sözüm bar meniñ

Ala gözleriñi söýdügim, dilber,
Saña bir tenhada sözüm bar meniñ.
Atlas ýüküm dost köýünde çözüldi,
Bir zülpi garaga näzim bar meniñ.

Ak gollara al-al hynalar ýakar,
Ala göze syýa sürmeler çeker,
Dosty bolan dostuñ ýoluna bakar,
Dosta gidýän ýolda yzym bar meniñ.

Ýigit bolan gizlin syryn bildirmez,
Gözel bolan gül meñzini soldurmaz,
Her bolar-bolmaza meýil bildirmez,
Bir laçyn awlara bazym bar meniñ.

Garajaoglan diýer, gonanlar göçmez,
Bu aýralyk bizden arasyn açmaz,
Bir däli köñlüm bar, gözelden geçmez,
Gözellerden doýmaz gözüm bar meniñ.

✸ Elinde galdy

Pessaý-pessaý ösen säher ýelleri,
Söwdügim, daglaryñ bilinde galdy.
Bir ýany läledir, bir ýany sünbül,
Köñül mürewwetsiz gelinde galdy.

Gelip oturalyñ usul-edepli,
Päk söÿgimiz bolsun has muhabbetli,
Kümüşsow zülplerden altyn jähekli,
Kemer-guşak gyzyñ bilinde galdy.

Gel, söwdügim, sygynaly Subhana,
Alger Laçyn diýrler awyn gapana,
Maza bolsun al ýañakdan öpene,
Ahy-zarym datly dilinde galdy.

Gel indi, heý Garajaoglan, gel indi,
Gara bagrym dilim-dilim dilindi,
Jiger paralandy, iki bölündi,
Bir bölegi gyzyñ elinde galdy.

✸ Köñlüm bereýin

Kadyr Möwlam, budur senden dilegim
Ber maña bir gözel, köñlüm bereýin.
Itlere bermiş sen, nedir günähim,
Ber maña bir gözel, köñlüm bereýin.

Gerdeni bir garyş, meñsiz bolmasyn,
Örän gözel bolsun, deñsiz bolmasyn,
Uzyn boýly bolsun, jansyz bolmasyn,
Ber maña bir gözel köñlüm bereýin.

Tawus guşy kibi göwsi nagyşly,
Gögerçin duruşly, käklik ötüşli,
Awa goýberilen laçyn bakyşly,
Ber maña bir gözel, köñlüm bereýin.

Garajaoglan diýer, okalyñ namaz,
Haka ýalbaralyñ, edeliñ nyýaz,
Gyzyldan gyrmyzy, akdan ak-beýaz
Ber maña bir gözel, köñlüm bereýin.

Hasan GARAJAOGLAN.