Saýlanan goşgular

• DÜÝŞ

Oslagsyz düýşüme giripsiň gije
Aňlamadym wakalaryň ahwalyn
Ýaşlara dolupdyr gök reňkli dide
Misli hasrat içre teň gördüm halyň.

Nämedir bir zatlar aýtmakçy bolsam
Elleň ümsümligiň edýär-le ümün
Öňler sen hakynda ýazmakçy bolsam
Agyrdy, pikirlem sebäbi ümür.

Niçe ýyl habsarsyz birek-birekden
Işlermize bolduk özbaşdak gümra
Çäräň ýok bolarly düýşe girmekden
Ne sebäpden gamy edindiň hemra.

Bahana tapmaly öýkeleşmäge
Dogrym diýsem ikimizem gedemje
Geçen günlermizi ýatlara salyp
Çaga ýaly gel, bolmaly kejirje.

Häli-häzirlerem jogapsyz sowal
Oýlarymy durman çaýkaýar her ýan
Eger ýaraşmajak bolsaň meň bilen
Oslagsyz düýşüme nämüçin girýäň?!

• Seniň bakyşlaryň

(Aýdym üçin)

Aýdyň gijelerden ýagty
Seniň pynhan bakyşlaryň
Maňa berdi çäksiz bagty
Seniň pynhan bakyşlaryň.

Kalba yşgyň nurun çaýdy
Güller müşgün sähra ýaýdy
Meniň dünýäme serpaýdy
Seniň pynhan bakyşlaryň.

Zülpüň saba ýeller darar
Görsem köňül tapar karar
Aý astyndan ogryn garar
Seniň pynhan bakyşlaryň.

Gara gözleň raýyn ýykman
Bize gülüp bakdy ykbal
Söýgümize baky ykrar
Seniň pynhan bakyşlaryň.

• Poeziýa

Galam, kagyz öwrülipdir
Iň esasy gülberime
Göwnüm indi höwrügipdir
Şygyr gurşan günlerime.

Ýollarym goşga baglanan
Onuň ýakymy nurana
Ylham atyna atlanan
Pikirler şeýle ruhana.

Ümüş-tümyş deý oýlarym
Saplanýar saňa gelemde
Barlygyňdan hiç doýmaryn
Galam, kagyz dur elimde.

• Meniň köşgüm

Sen diýýäň: “Ýaýdanman şygyrlar ýazýaň”
Belki, has başga zat döredýändirin
Köňle erk etmedik duýgularymy
Ak kagyz ýüzünde ýöredýändirin.

Hemra tutup gijeleriň ahwalyn
Göwnüm alyslara gidende seýle
Men hakda pikirleň bolsa garyşyk
Onda ruhuň ruhum bilen garyşyp
Joşýan ylhamyma bir nazar eýle.

Şonda düşünersiň meniň halyma
Ýa-da düşünjelem bolar tersine
Öwrülip goşgulam syrly sowala
Olaryň jogabyn berseň hersine
Soňra sen diýmersiň ýazýarsyň goşgy
Sebäp gurmak isleýärin ýürekden
Goşgudan köşgi.

• Bedew sen

Ynsan hüýli, gamly günde syrdaşym
Şatlygy, gussany aňlan bedew sen
Ýola gitsem maňa hemdem, ýoldaşym
Owazy äleme ýaýran bedew sen.

Görogly zürýatdan görüpdir zyýat
Göz guwanjy kimin gezendir aýap
Müşgillige düşüp çekende perýat
Derdin çekişmäge taýýar bedew sen.

Deňelensiň Süleýmanyň tagtyna
Senli ojaklaryň törem ýagty-la
Bendi hemme periler deý sagtyňa
Görküň asyrlardan aşan bedew sen.

At agynan ýerde tutulmyş toýlar
Aýdylyp waspyňa namadyr boýlar
Saňa duşsa mydam begener roýlar
Sähraýy ülkäniň şasy bedew sen.

Dakyp çyksa esbabyny, şaý-sepin
Gözellige has-da artar höwesiň
Atlanaňda bir durlanar nepesiň
Aýraý mertebäni buşlan bedew sen.

Şöhrat MYRADOW,
Döwletmämmet Azady adyndaky Türkmen milli dünýä dilleri institutynyň koreý dili hünäriniň talyby.